މިދިޔަ މަހު އިންޑިއާއިން ބައިލައްކައަށްވުރެ ގިނަ މީހުން އައި: އެމްއޭސީއެލް
3 ސެޕްޓެމްބަރު 2021 | ހުކުރު 08:06މި އަހަރު އެންމެ ގިނަ ބަޔަކު ރާއްޖެ އައިސްފައިވަނީ އޮގަސްޓު މަހު
އެއަރ އިންޑިއާގެ މަތިންދާ ބޯޓެއް
މިދިޔަ މަހު އިންޑިއާއިން ބައިލައްކައަށްވުރެ ގިނަ މީހުން ރާއްޖެ އައިސްފައިވާކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން ބުނެފިއެވެ.
ރާއްޖެޓީވީގެ ފަށާއިރު ޕްރޮގްރާމަށް ދެއްވި އިންޓަރވިއުއެއްގައި އެމްއޭސީއެލްގެ ޓަރމިނަލް އޮޕަރޭޝަންސް ޖެނެރަލް މެނޭޖަރ، އިބްރާހިމް ހުސައިން ވިދާޅުވީ މިދިޔަ އޮގަސްޓު މަސް ފާހަގަކޮށްލެވެނީ އެއާޕޯޓަށް ބާރުބޮޑު މަހެއްގެ ގޮތުގައި ކަމަށެވެ. އޮގަސްޓުމަހު 143،599 ފަސިންޖަރުން ރާއްޖެ އައިސްފައިވާ ކަމަށާއި، މިއީ މިއަހަރު އެންމެ ގިނަ ފަތުރުވެރިން ރާއްޖެ އައި މަސް ކަމަށް އިބްރާހިމް ވިދާޅުވިއެވެ.
އިބްރާހިމް ވިދާޅުވީ އޮގަސްޓު މަހު ރާއްޖެ އެތެރެވި މީހުންގެ ތެރޭގައި ގިނައީ އިންޑިއާ މީހުން ކަމަށެވެ. އެގޮތުން އިންޑިއާއަށް ނިސްބަތްވާ 54،094 މީހަކު އޮގަސްޓު މަހު ރާއްޖެ އައިސްފައިވާކަމަށް އޭނާ ވިދާޅުވިއެވެ. ދެވަނައިގައި ހިމެނެނީ ރަޝިއާ ކަމަށާއި، ރަޝިއާއިން 17،069 މީހުން ރާއްޖެ އައިސްފައިވާކަމަށާއި، ތިންވަނައިގައި ހިމެނޭ ޖަރމަނީން 9،916 މީހުން އައިސްފައިވާކަމަށް އިބްރާހިމް ވިދާޅުވިއެވެ.
އިބްރާހިމް ވަނީ މި އަހަރުގެ މިހާތަނަށް ވަކި ވަކި މަސްތަކުގައި އައި ފަސިންޖަރުންގެ އަދަދުތައްވެސް ތަފްސީލުކޮށްދެއްވާފައެވެ. އެގޮތުން ޖެނުއަރީ މަހު 92،000 މީހުން އައިސްފައިވާ ކަމަށާއި، ފެބްރުއަރީ މަހު 96،000 މީހުން، މާޗު މަހު 109،000 ފަސިންޖަރުން، އެޕްރީލް މަހު 91،000 މީހުން، މެއިމަހު 64،000 މީހުން، ޖޫން މަހު 56،000 މީހުން، ޖުލައި މަހު 101،000 މީހުން އަދި އޮގަސްޓު މަހު 143،599 މީހުން ވަނީ ރާއްޖެ އައިސްފައެވެ.
އޮގަސްޓު މަހު ރާއްޖެ އައި މީހުންގެ އަދަދު އެހެން ހުރިހާ މަހަކާ އަޅާ ބަލާއިރު އިތުރުވެފައިވާއިރު، އޮކްޓޯބަރ، ނޮވެމްބަރ، އަދި ޑިސެމްބަރ ސީޒަން ފެށުމުން އެއާޕޯޓު އިތުރަށް ބާރުބޮޑުވެގެންދާނެ ކަމަށް އުންމީދުކުރާކަމަށް އިބްރާހިމް ވަނީ ވިދާޅުވެފައެވެ. އަދި މިއަހަރު ރާއްޖެ ގެނައުމަށް ކަނޑައަޅާފައިވާ 1.5 މިލިއަން ފަތުރުވެރިންގެ އަމާޒަށް ވާސިލްވެވޭނެ ކަމުގެ އުންމީދު އެބައޮތް ކަމަށް އިބްރާހިމް ވަނީ ވިދާޅުވެފައެވެ.
ރާއްޖޭގެ ފަތުރުވެރިކަމަށް ބަލާއިރު، މި އަހަރު ރާއްޖެ އައި ފަތުރުވެރިންގެ އަދަދު ފާއިތުވި އަހަރާ އަޅާބަލާއިރު، 91.2 އިންސައްތަ އިތުރުވެފައިވާ ކަމަށް ޓޫރިޒަމް މިނިސްޓްރީން ބުނެފައިވެއެވެ. އެގޮތުން 2020 ވަނަ އަހަރުގެ އޮގަސްޓް މަހުގެ 29 ވަނަ ދުވަހުގެ ނިޔަލަށް 391,832 ފަތުރުވެރިން ރާއްޖެ އައިސްފައިވާއިރު، މި އަހަރުގެ މި މުއްދަތުގައި 749,186 ފަތުރުވެރިން ވަނީ ރާއްޖެ އައިސްފައެވެ. މިހާރު އަންނަ ފަތުރުވެރިންގެ ނިސްބަތަށް ބަލައި، ރާއްޖޭގެ ފަތުރުވެރިކަން ދެން ދާނީ ރަނގަޅުވަމުން ކަމަށް މި ދާއިރާގެ މާހިރުން ބުނެއެވެ.
