އާރްބާ ބެޑްމިންޓަން ޗެމްޕިއަންޝިޕް ކާމިޔާބުކަމާއެކު ނިންމާލައިފި

ކާމިޔާބު ބެޑްމިންޓަން ކުޅުންތެރިޔާ އަފްނާން ރަޝީދުގެ އެކަޑަމީން ބޭއްވި އާރްބާ ބެޑްމިންޓަން ޗެމްޕިއަންޝިޕް ކާމިޔާބުކަމާއެކު ނިންމާލައިފިއެވެ.

މި އަހަރުގެ މާޗް މަހު އާރްބާ ބެޑްމިންޓަން އެކަޑަމީ އިފްތިތާހު ކޮށްފައިވާއިރު އެކަޑަމީގެ ފުރަތަމަ މުބާރާތް ބާއްވާފައިވަނީ، ބުދަ ދުވަހުއެވެ. މި މުބާރާތުގައި ވާދަކުރީ ސިލެކްޝަނެއްގެ ތެރެއިން ހޮވާލެވުނު 12 ކުދިންނެވެ. ސިލެކްޝަނުގައި އެކަޑަމީގެ 30 ވަރަކަށް ކުޅުންތެރިން ބައިވެރިވެފައިވެއެވެ.

އަފްނާން ބުނީ މި މުބާރާތް ބޭއްވުމުގެ އެންމެ ބޮޑު މަގުސަދަކީ ކުދިން މޯޓިވޭޓް ކުރުމާއި، މުބާރާތްތަކުގެ މާހައުލަށް ކުޅުންތެރިން ހޭނެވުން ކަމަށެވެ. އެކަޑަމީގައި ޕްރެކްޓިސް ކުރަމުންދާތާ ގިނަ ދުވަސްތަކެއް ވެފައިވާއިރު، ކުޅުންތެރިން މޯޓިވޭޓް ކުރެވޭނެ އެންމެ ރަނގަޅު ގޮތަކީ މުބާރާތެއް އިންތިޒާމު ކޮށްގެން ރޭވުމެއްގެ ތެރެއިން ކުރިއަށް ދިއުން ކަމަށް ފެންނާތީ އެ ގޮތަށް ކުރިޔަށް ގެންދިޔައީ ކަމަށް އަފްނާން ބުންޏެވެ.

އަފްނާން ބުނީ ކުރިޔަށް އޮތް ތަނުގައި އެ އެކަޑަމީން، އެކަޑަމީން ބޭރު ކުޅުންތެރިންނަށްވެސް ހުޅުވާލައިގެން މުބާރާތްތައް ކުރިޔަށް ގެންދިޔުމަށް ރާވާފައިވާ ކަމަށެވެ.

އަފްނާން ބުނީ ކުޅިވަރުގެ ތެރެއިން ރަނގަޅު ޖީލެއް ބިނާކުރުމުގެ އަމާޒުގައި އޭނާ ކުރާ ކަންތައްތަކުގައި ބެލެނިވެރިންނާއި އާއިލާގެ ސަޕޯޓް ވަރަށް ފުރިހަމައަށް ލިބޭ ކަމަށާއި، އެހެން ނޫންނަމަ މިކަން ރަނގަޅަށް ކުރިޔަށް ނުގެންދެވޭނެ ކަމަށެވެ. އެހެންކަމުން އެ ހުރިހާ ފަރާތްތަކުން ވެދެއްވާ އެހީއަށް އަފްނާން ވަނީ ޝުކުރުއަދާ ކޮށްފައެވެ.