ޕީޖީން ގޮތެއް ނިންމަންދެން މަޚްލޫފުގެ ސަސްޕެންޝަން ދެމި އޮންނާނެ: މަބްރޫކް
މަގާމުގެ މަސްއޫލިއްޔަތުން މަޚްލޫފު އެކަހެރިކުރީ އެ މައްސަލަ ބަލަން އުދަނގޫތަކެއް ކުރިމަތިވާނެތީ
ސަސްޕެންޑްކޮށްފައިވާ، ޔޫތު މިނިސްޓަރު އަޙުމަދު މަޚްލޫފު
ޕްރޮސެކިއުޓަރ ޖެނެރަލް (ޕީޖީ) އޮފީހުން ގޮތެއް ނިންމަންދެން އެމްއެމްޕީއާރްސީ ޚިޔާނާތުގެ މައްސަލާގައި ސަސްޕެންޑްކޮށްފައިވާ ޔޫތު މިނިސްޓަރު އަޙުމަދު މަޚްލޫފުގެ ސަސްޕެންޝަން ދެމި އޮންނާނެކަމަށް ސަރުކާރުން ބުނެފިއެވެ.
ބުދަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އެއޮފީހުގެ ތަރުޖަމާނު މަބްރޫކް ޢަޒީޒު ވިދާޅުވީ ޕީޖީ އޮފީހަށް މައްސަލަ ދާ ހިސާބުން ސަސްޕެންޑް ކުރުމަކީ އަބަދު ވެސް އަމަލުކުރާ އުސޫލުކަމާއި، ޕީޖީން ގޮތެއް ނިންމަންދެން ސަސްޕެންޝަން ދެމި އޮންނާނެ ކަމަށެވެ. އަދި މަގާމުގެ މަސްއޫލިއްޔަތުން މަޚުލޫފު އެކަހެރިކުރީ އެ މައްސަލަ ބަލަން އުދަނގޫތަކެއް ކުރިމަތިވާނެތީ ކަމަށެވެ.
މަބްރޫކް ވިދާޅުވީ މިނިސްޓަރަކު ނެތި މިނިސްޓްރީއެއް ހިންގުމަކީ ވަރަށް ދަތިކަމެއް ކަމަށާއި، ގިނަ އުނދަގޫތަކާއި ކުރިމަތިވާ ކަމަށެވެ. ނަމަވެސް މަޚްލޫފުގެ މައްސަލައިގެ ތެރެއަށް ސަރުކާރުން ނުވަންނާނެ ކަމަށެވެ.
މަޚްލޫފު ސަސްޕެންޝަނުގައި ހުންނަވާތާ ތިން މަހަށްވުރެ ގިނަ ދުވަސް ވަނީ ވެފައެވެ.
މިމައްސަލައާ ގުޅިގެން ފުލުހުން ބުނެފައިވަނީ އޭނާގެ މައްޗަށް ތުހުމަތުކުރެވޭ މައްސަލައިގައި އިތުރު އައު ހެކިތަކެއް ހޯދުމުގެ މަސައްކަތް ފުލުހުން ކުރަމުންނުދާ ކަމަށެވެ. ނަމަވެސް ޕީޖީގެ އެދުމުގެ މަތިން ތަހުގީގުގައި ކުރިން ވެސް ހޯދައިފައި ހުރި ބައެއް ހެކިތަކާ ގުޅޭ ބައެއް ކަންކަން އިތުރަށް ސާފުކޮށްދިނުމަށް ޕީޖީން އެދިފައިވާތީ އެ މަސައްކަތް ފުލުހުން ކުރިއަށް ގެންދާ ކަމަށެވެ.
އެމްއެމްޕީއާރްސީ މެދުވެރިކޮށް ހިންގި ޚިޔާނާތުގެ މައްސަލާގައި ދައުވާކުރަން ޝަރީއަތާ ހަމައަށް ގެންގޮސްފިނަމަ "ދައުލަތް އޮރިޔާން"ވާނެ ކަމަށާއި، ސިޔާސީ ނުފޫޒު ވަދެފައިވާކަމަށް މަޚ7ލޫފު ތުހުމަތު ކުރައްވާފައިވެއެވެ. މި ތުހުމަތުތަކަށް ރައްދު ދެއްވައި ޕީޖީ ޙުސައިން ޝަމީމް ވިދާޅުވީ މި މައްސަލާގައި ފުރިހަމަ ކުރަން ޖެހޭ މަސައްކަތްތައް ކުރިއަށްދާ ކަމަށެވެ. އެގޮތުން ފުލުހުންނާއެކު މަސައްކަތްތަކެއް ކުރަމުންދާކަން ފީޖީ ފާހަގަކުރެއްވިއެވެ.
މި މައްސަލައިގައި މަޚްލޫފު ވިދާޅުވީ، ކުރިން ނިންމަވައިގެން ހުންނެވީ ޕީޖީ އޮފީހުން ގޮތެއް ނިންމުމުން އިސްތިއުފާ ދެއްވުމަށް ކަމަށެވެ. ނަމަވެސް ކަންކަން މިހާ ގޯސްކޮށް ދާތީ ދައުވާ ކުރިޔަސް ދެން އިސްތިއުފާ ދެއްވުމާމެދު ވިސްނަވާނެކަމަށް މަޚުލޫފު ވިދާޅުވިއެވެ. އަދި އެކަން ރައީސަށް ވެސް ރަސްމީކޮށް ދަންނަވާނެކަން ފާހަގަކުރައްވައި އޭނާ ވިދާޅުވީ، މަގާމުން ވަކިކުރުމަކީ ރައީސުލްޖުހޫރިއްޔާއަށް ގާނޫނު އަސާސީން މަތިކޮށްފައިވާ ބާރެއް ކަމުން، ގޮތެއް ނިންމަވާނީ ރައީސް ކަމަށެވެ.
