ރައްޔިތުންގެ މަޖިލީހުގެ ކެނދިކުޅުދޫ ދާއިރާގެ މެންބަރު އަހުމަދު އީސާގެ މައްޗަށް އުފުލާފައިވާ ދައުވާގެ ޝަރީއަތުގެ އަޑުއެހުން ކެންސަލްކޮށްފިއެވެ.
އީސަގެ ގެވެށި އަނިޔާގެ މައްސަލައެއް ފުލުހަށް ހުށަހެޅީ މެއި މަހުގެ 18 ވަނަ ދުވަހުގެ ރެއެވެ. އީސައަށް ތުހުމަތު ކުރެވެނީ، އޭނާގެ ކުރީގެ އަނބިކަނބަލުންނަށް އަނިޔާ ކުރި މައްސަލައެވެ. މި މައްސަލައިގެ އަޑުއެހުމެއް މިއަހަރު ޖޫން މަހު ވެސް ތާވަލުކުރިއެވެ. ނަމަވެސް އެ އަޑުއެހުން ކެންސަލްވެފައިވަނީ މައްސަލަ ބައްލަވާ ގާޒީ ސަލާމުގައި ހުންނެވުމުންކަމަށް އޭރު ކްރިމިނަލް ކޯޓުން މައުލޫމާތު ދީފައިވެއެވެ.
މި މައްސަލައިގައި އަންގާރަ ދުވަހު ވެސް އަޑުއެހުމެއް ތާވަލުކުރިއެވެ. ނަމަވެސް މި އަޑުއެހުން ވެސް ކެންސަލް ވެފައިވާކަމަށް ކްރިމިނަލް ކޯޓުން މައުލޫމާތު ދެއެވެ. އެގޮތުން މި އަޑުއެހުން ކެންސަލްވެފައިވަނީ މައްސަލަ ބައްލަވާ ގާޒީ ހުސައިން ފާއިޒު ރަޝާދު ސަލާމުގައި ހުންނެވުމުންކަން ކޯޓުން ފާހަގަކޮށްފައިވެއެވެ.
އީސަގެ މައްޗަށް އުފުލާފައި ވަނީ ގާނޫނުލްއުގޫބާތުގެ 120 ވަނަ މާއްދާގެ (ހ) ގެ 1 ވަނަ ނަންބަރާ ހަވާލާދީ، އެމާއްދާގެ (ށ) ގެ 2 ވަނަ ނަންބަރުގެ ދަށުން، އަނިޔާއެއް ދިނުމުގެ ކުށުގެ ދައުވާއެވެ.
އީސައަށް ތުހުމަތު ކުރެވޭ ގެވެށި އަނިޔާގެ މައްސަލަ ކުރިއަށް ނުގެންދިއުމަށް އޭނާގެ ފަރާތުން އަނިޔާ ލިބުނު ކަމަށް ބުނާ، އޭނާގެ ކުރީގެ އަނބިކަނބަލުން އަސްރާ ނަސީމް ފުލުސް އޮފީހުގައި ވަނީ އެދިފައެވެ. އަސްރާ އެގޮތަށް އެދުނު ނަމަވެސް، ފުލުހުން ނިންމީ އެ މައްސަލަ ކުރިއަށްގެންދިއުމަށެވެ. އީސަ ވަނީ އޭނާގެ މައްޗަށް ކުރެވޭ ތުހުމަތުތައް ދޮގުކޮށްފައެވެ. އަދި ފުލުހުންނަށް އިތުބާރު އޮތް ކަމަށާއި ދައުލަތުގެ އެންމެހާ މުއައްސަސާތަކަށް އެއްބާރުލުން ދޭނެ ކަމަށް ވަނީ ވިދާޅުވެފައެވެ.
