އއ. ވެލިފިނޮޅުން ވެލި ނަގާ މައްސަލަ ދެފަރާތުން މަޝްވަރާކޮށްގެން ހައްލުކުރަމުންދާކަމަށް އެންވަޔަރަންމަންޓަލް ޕްރޮޓެކްޝަން އެޖެންސީ (އީޕީއޭ)އިން ބުނެފިއެވެ.
ކްރައުން ކޮމްޕެނީ މޯލްޑިވްސްގެ ފަރާތުން ހިންގާ ވެލިގަނޑު އައިލެންޑް ރިސޯޓު އޮންނަ ފަޅުތެރެއިން ބޮޑުސަރަހައްދެއް ހިއްކަމުން ގެންދާ މައްސަލައެއް ފެންމަތިވެފައިވާއިރު، މިކަމާ ގިނަ ބަޔަކު ގެންދަނީ ކަންބޮޑުވުން ފާޅުކުރަމުންނެވެ. އއ.އަތޮޅު ކައުންސިލުން ވެސް އެކަމާ ކަންބޮޑުވުން ފާޅުކުރަމުންދާ ދަނޑިވަޅެއްގައި, ރާއްޖެއެމްވީން ކުރި ސުވާލަކަށް ޖަވާބުދެއްވަމުން އެންވަޔަރަންމަންޓަލް ޕްރޮޓެކްޝަން އެޖެންސީގެ ޑިރެކްޓަރ ޖެނެރަލް އިބްރާހީމް ނަޢީމް ވިދާޅުވީ, ފިނޮޅުން ވެލި ނަގާތީ އެ މައްސަލަ ގޯސްވެގެން ސަރުކާރުގެ ޓީމެއް އެރަށަށް ފޮނުވަން މަސައްކަތް ކުރި ކަމަށެވެ. އެހެންނަމަވެސް އެކި ސަބަބުތަކާހުރެ އެ ޓީމަށް އެ ރަށަށް ދެވޭވަރު ވެފައި ނުވާކަމަށެވެ.
ނަޢީމް ވިދާޅުވީ މިވަގުތު އެރަށުން ވެލި ނެގުން ހުއްޓާލާފައިވާ ކަމަށެވެ. އަދި މިކަމުގައި ހިމެނޭ ހުރިހާ ފަރާތްތަކާ މަޝްވަރާކޮށްގެން މި މައްސަލަ ހައްލުކުރުމަށް މަސައްކަތްކުރަމުންދާ ކަމަށެވެ.
ކްރައުން ކޮމްޕެނީން ހިންގާ ވެލިގަނޑު އައިލެންޑް ރިސޯޓުގެ ބައެއްގެ ގޮތުގައި ހަދާފައިވާ ވެލިފިނޮޅު ބޮޑުކުރަން ފަޅު ހިއްކުމުގެ ތެރޭގައި އެ ސަރަހައްދުގެ ފަރުތަކަށާއި ހިމާޔަތް ކޮށްފައިވާ މަޑިވަރު ފަޅަށް ގެއްލުންވަމުންދާ ކަަމަށް ރަސްދޫ ކައުންސިލުން ވަނީ ބުނެފައެވެ. އަދި އެކަމާ ގުޅިގެން ރަސްދޫގެ ބަޔަކު ވަނީ މުޒާހަރާވެސް ކޮށްފައެވެ.
މިކަން ދާއިމީ ގޮތެއްގައި ހުއްޓުވައިދިނުމަށް ސަރުކާރުގެ ކަމާބެހޭ ފަރާތްތަކަށް ގޮވާލައި ރައްޔިތުންގެ މަޖިލީހަށް މައްސަލަ ހުށަހެޅުއްވީ ތޮއްޑޫ ދާއިރާގެ މެމްބަރ ޙަސަން ޝިޔާންއެވެ. މައްސަލަ ހުށަހަޅުއްވަމުން ޝިޔާން ވިދާޅުވީ ރަސްދޫ މަޑިވަރު ސަރަހައްދަކީ ގިނަ ބާވަތްތަކެއްގެ ކަނޑުގެ ދިރުން ލިބިގެންވާ, އީޕީއޭ އިން 2018 ވަނަ އަހަރުން ފެށިގެން ހިމާޔަތްކޮށްފައިވާ ސަރަހައްދެއްކަމަށެވެ. މިގޮތުން މިސަރަހައްދު ހިމާޔަތްކޮށް މެނޭޖްމަންޓް ޕްލޭނެއްގެ ދަށުން ސަރަހައްދު ބެލެހެއްޓުން އއ. ރަސްދޫ ކައުންސިލާ ހަވާލުކުރުމަށް އީޕީއޭ އިން ނިންމައި, ރަސްދޫ ކައުންސިލަށް 2018 ވަނަ އަހަރު ވަނީ އެކަން އަންގާފައިކަމަށް ޝިޔާން ވިދާޅުވިއެވެ.
ރަސްދޫއާއި އެސަރަހައްދުގެ ގިނަ ރަށްރަށުގެ އާންމު ރައްޔިތުން ގެދޮރު އެޅުމާއި އެނޫންވެސް އެކި ބޭނުންތަކަށް ޒަމާނުއްސުރެ އެސަރަހައްދުން ވެލިނަގަމުން ދިޔަ ދިޔުން އެސަރަހައްދު ހިމާޔަތްކުރުމުގެ ސަބަބުން އީޕީއޭން ވަނީ މަނާކޮށްފައި ކަމަށް ޝިޔާން ވިދާޅުވިއެވެ.
ހިމާޔަތްކޮށްފައިވާ މިސަރަހައްދާ ކައިރިން ފަސް ނަގައި ވެލިފިނޮޅުގެ ނަމުގައި ރަށެއް ހެދުމުގެ މަސައްކަތް ކްރައުން ކޮމްޕެނީގެ ފަރާތުން މިހާރު އަންނަނީ ކުރަމުން ކަމަށް ޝިޔާން ވިދާޅުވިއެވެ. އަދި މިރަށް ހިއްކުމަށް ވެލި ނަގަމުން ގެންދަނީ މީގެކުރިން އީޕީއޭގެ ފަރާތުން އާންމު ރައްޔިތުންނަށް ވެލި ނެގުން މަނާކޮށްފައިވާ ސަރަހައްދުންނެވެ. އަދި މިކަން ކުރިޔަށްދާއިރު އަތޮޅު ކައުންސިލާއި އަދި އެސަރަހައްދުގެ އެއްވެސް ރަށަކާ އެއްވެސް ވަރަކަށް މަޝްވަރާކުރެވިފައި ނުވުމުގެ އިތުރުން މިކަމަކީ އީޕީއޭއިން ހުއްދަ ލިބިގެން ކުރާކަމެއްކަން އަތޮޅު ކައުންސިލަށް އަދި ސަރަހައްދުގެ އެއްވެސް ރަށަކަށްވެސް ސާފު ނުވާކަމަށް ޝިޔާން ވިދާޅުވިއެވެ.
