ކ. ރަސްފަރީގެ ހުޅަނގު ފަރާތު ފަރަށް އެރި ކާގޯ ބޯޓަށް ފުރުމުގެ ހުއްދަދެވޭނީ ލިބުނު ގެއްލުމުގެ ބަދަލު ދެނެގަތުމަށް ފަހު ކަމަށް ޓްރާންސްޕޯޓް މިނިސްޓްރީން ބުނެފިއެވެ.
ޕެނަމާއަށް ނިސްބަތްވާ 190 މީޓަރުގެ ކާގޯ ބޯޓު ފަރަށް އެރީ މިމަހުގެ 19ވީ ބުރާސްފަތި ދުވަހު މެންދުރު 12:48 ހާއިރުއެވެ. އެ ބޯޓު ފުންކުރުމުގެ މަސައްކަތްތައް ކުރިއަށްދާ ގޮތާބެހޭ ގޮތުން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރު އަހުމަދު އަބްދުލްޣަނީ ވިދާޅުވީ ބޯޓު މިހާރު ފުރުން ހުއްޓުވާފައިވާ ކަމަށާއި، ފުރުމުގެ ހުއްދަ ދެވިގެންދާނީ ލިބިފައިވާ ގެއްލުމުގެ ބަދަލު ދެނެގަތުމަށްފަހު ކަމަށެވެ.
އަބްދުލްޣަނީ ވިދާޅުވީ ބޯޓު ފަރަށް އެރުމުގެ ހާދިސާ ތަހުގީގުކުރާނެ ކަމަށާއި، އިހުމާލުވާ ފަރާތްތަކާ މެދު އަޅަން ޖެހޭ ފިޔަވަޅުތައް އަޅާނެ ކަމަށެވެ. އަދި މިހާތަނަށް ހޯދުނު ހޯދުންތަކުން ބޯޓުގެ ކެޕްޓަންގެ އިހުމާލު ވަރަށް ބޮޑަށް އެބައޮތް ކަމަށް ފާހަގަކުރެވިފައިވާ ކަމަށް އޭނާ ވިދާޅުވިއެވެ. ނަމަވެސް މިހާރު އެންމެ ބޮޑު ސަމާލުކަމެއްދީގެން ކުރަމުންދާ މަސައްކަތަކީ ބޯޓުގައި ހުރި ތެޔޮ ކަނޑަށް ބޭރު ނުވާނެފަދަ ގޮތަކަށް އިންތިޒާމްތައް ހަމަޖެއްސުން ކަމަށެވެ.
މިބޯޓުގެ އިންޖީނުގެ ޔުނިޓް 3 ޓެމްޕަރޭޗަރ މަތިވުމުން އިންޖީނު ނިއްވާލުމުގެ ސަބަބުން އުޅަނދު ލިފްޓްވެ ފަރަށް އަރާފައިވަނީ. އެއީ މިހާރު ޕްލިމިނަރީ ހޯދުންތައް. މިއުޅަނދު ފަރުން ސަލާމަތްކުރުމަށް އުޅަނދުގެ ކެޕްޓަން ކުރަން ޖެހޭ ކަންކަން ކޮށްފައިނެތް ކަން ވެސް ފާހަގަކޮށްލަން ޖެހޭ. އުޅަނދު ފަރަށް އެރުމުގެ ކުރިން އުޅަނދުގެ ކެޕްޓަން އުޅަނދަަށް މިފަދަ މައްސަލައެއް ޖެހިފައިވާނަމަ ކޯސްޓަލް ސްޓޭޓަސްއަށް އަންގާފައިނުވާކަން ވެސް ފާހަގަވޭ. އަދި ކެޕްޓަންގެ ހައިސިއްޔަތުން ނަގަން ޖެހޭ އެކްޝަންތައް ވެސް ނަގާފައިނުވާކަން ވެސް ފާހަގަކުރެވޭ. ޚާއްސަކޮށް ނަގިލިލުން ފަދަ ކަންކަަން ކޮށްފައެއް ނުވޭ.ޑެޕިއުޓީ މިނިސްޓަރު އަހުމަދު އަބްދުލްޣަނީ
މި ބައްދަލުވުމުގައި ވާހަކަދައްކަވަމުން އެންވަޔަރަންމެންޓް ޕްރޮޓެކްޝަން އެޖެންސީގެ ޑިރެކްޓަރ ރިފްޢަތު ނަސީމް ވިދާޅުވީ މި ބޯޓު ފަރަށް އަރާފައިވާ ސަރަހައްދަކީ ހިމާޔަތްކޮށްފައިވާ ސަރަހައްދަކަށް ވުމާއެކު މި ފަރަށް ލިބޭ ގެއްލުންތައް ވަރަށް ޚާއްސަ ކަމެއް ދީގެން ބަލަމުންދާ ކަމަށެވެ. އަދި ބޯޓު ފުންކުރުމަށް އެކި ޕްލޭންތައް ހެދިގެންދާއިރުވެސް ވީހާވެސް ބޮޑަކަށް ތިމާވެއްޓަށް ގެއްލުން ނުވާނެހެން މިކަންކަން ކުރިއަށްގެންދަން އީޕީއޭއިން މަސައްކަތް ކުރަމުންދާކަމަށެވެ.
ބޯޓު ފަރަށް އެރި ކ. ރަސްފަރީ ފަރަކީ ހިމާޔަތްކޮށްފައިވާ ފަރެކެވެ. އެހެންކަމުން ބޯޓު ފުންކުރެވުނުހާ އަވަހަކަށް ފަރަށް ލިބުނު ގެއްލުން ބަލާނެ ކަމަށް އީޕީއޭއިން މީގެ ކުރިން ބުނެފައިވެއެވެ.
ބޯޓު އެއްކޮށް ފަރަށް ލައްވެފައިވާއިރު، ބޯޓު ފުންކުރުމުގެ މަސައްކަތް ފެށޭނީ އަންނަ ސެޕްޓެމްބަރުމަހުގެ 1 ވަނަ ދުވަހު ކަމަށާއި، އުންމީދަކީ 2 ދުވަސްތެރޭ ބޯޓު މުޅިންހެން ފުންކޮށް ނިންމުން ކަމަށް އެމްއެންޑީއެފުން ބުނެއެވެ. އަދި މިހާރުވެސް ބޯޓަށް ކަމެއް ދިމާވެއްޖެނަމަ ބޯޓު ބޭރުކޮށްލެވޭވަރަށް ވަސީލަތްތައް އެބަހުރިކަން އެމްއެންޑީއެފުން ހާމަކޮށްފައިވެއެވެ.
