އަހަރުގެ މިހާތަނަށް 11،146 ފްލައިޓް މޫވްމެންޓް، އެންމެ ގިނަ ދަތުރުކުރީ އެމިރޭޓްސްއިން
އެންމެ ގިނަ ދަތުރުތައް ބާއްވައި އެންމެ ގިނަ ފަސިންޖަރުން އުފުލާފައިވަނީ އެމިރޭޓްސްއިން
ވެލާނާ އިންޓަރނޭޝަނަލް އެއާޕޯޓު
މި އަހަރުގެ މިހާތަނަށް ޖުމްލަ 11،146 ބައިނަލްއަގުވާމީ ދަތުރު ރާއްޖެއަށް ކޮށްފައިވާކަމަށް ޓޫރިޒަމް މިނިސްޓްރީން ބުނެފިއެވެ.
ކޮވިޑް-19ގެ ހާލަތާއެކު ރާއްޖޭގެ ބޯޑަރު ބަންދުކުރުމަށްފަހު އަލުން ހުޅުވާލީ 2020 ވަނަ އަހަރު ޖުލައި 15 ގައެވެ. ބޯޑަރު ހުޅުވާލި ފަހުން މީގެ ކުރިން ރާއްޖެއަށް ޝެޑިއުލްތައް ދަތުރުތައް ބާއްވަމުން އައި ގިނަ އެއާލައިންތަކަކުން ވަނީ އަލުން ދަތުރުތައް ފަށާފައެވެ. މިހާތަނަށް އައި އިރު 33 އެއާލައިނެއްގެ ޝެޑިއުލް ދަތުރުތައް ފަށާފައިވާކަމަށް ޓޫރިޒަމް މިނިސްޓްރީން އެންމެ ފަހުން އާންމުކުރި ރިޕޯޓުން ދައްކައެވެ.
މި އަހަރުގެ މިހާތަނަށް މި އެއާލައިންތަކުން 11،146 ބައިނަލްއަގުވާމީ ދަތުރުކޮށްފައިވާކަމަށް ޓޫރިޒަމް މިނިސްޓްރީން ވަނީ ހާމަކޮށްފައެވެ. މިގޮތުން އެންމެ ގިނަ ދަތުރުތައް ކޮށްފައިވަނީ އެމިރޭޓްސްއިން ކަމަށް ޓޫރިޒަމް މިނިސްޓްރީން ބުނެއެވެ. އެމިރޭޓްސްއިން މިހާތަނަށް 145،158 ފަސިންޖަރުންނާއެކު 1،706 ދަތުރު ކޮށްފައިވެއެވެ. މި ލިސްޓުގެ ދެވަނައިގައި އުޅެނީ ގަތަރު އެއާވޭސްއެވެ. މިހާތަނަށް އައި އިރު ގަތަރު އެއާވޭސްއިން 125،900 ފަސިންޖަރުންނާއެކު 1،426 ދަތުރު ކޮށްފައިވެއެވެ. ތިންވަނައިގައި އުޅެނީ އެއިރޯފްލޮޓެވެ. އެއިރޯފްލޮޓުން 95،441 ފަސިންޖަރުންނާއެކު 610 ދަތުރު ކޮށްފައިވާއިރު، އިންޑިގޯއިން 84،942 ފަތުރުވެރިންނާއެކު 1،290 ދަތުރު ބާއްވާފައިވާކަމަށް ޓޫރިޒަމް މިނިސްޓްރީން ބުނެފައިވެއެވެ.
މިއަހަރުގެ މިހާތަނަށް ރާއްޖެއަށް ދަތުރުތައް ބޭއްވި އެއާލައިންތަކުން 738،496 ފަސިންޖަރުން އުފުލާފައިވާކަމަށް ޓޫރިޒަމް މިނިސްޓްރީން ވަނީ ހާމަކޮށްފައެވެ.
މީގެ އިތުރުން ބައިނަލްއަގުވާމީ ޗާޓަރޑް ދަތުރުތަކުގެ ގޮތުގައި 464 ދަތުރު މި އަހަރު ބާއްވާފައިވާކަމަށް ޓޫރިޒަމް މިނިސްޓްރީން ބުނެއެވެ. މި ދަތުރުތަކުގައި 40،187 ފަސިންޖަރުން އުފުލާފައިވާކަމަށް ވަނީ ރެކޯޑުކޮށްފައެވެ. މި އަހަރު އެންމެ ގިނަ ބައިނަލްއަގުވާމީ ޗާޓަރޑް ދަތުރުތައް ކޮށްފައިވަނީ އެއާ އަސްތާނާއިންނެވެ. އެއާ އަސްތާނާއިން 148 ދަތުރު ކޮށްފައިވާއިރު،، އެ އެއަރލައިނުން 12،032 ފަސިންޖަރުން އުފުލާފައިވެއެވެ.
ކޮވިޑް-19 ކޮންޓްރޯލްކުރުމަށް އަޅާފައިވާ ބައެއް ފިޔަވަޅުތަކާއެކު ދިވެހިރާއްޖެ ފަތުރުވެރިކަން ހުޅުވާލާފައިވާއިރު، މިހާތަނަށް ރާއްޖެ ޒިޔާރަތްކުރި ފަތުރުވެރިންގެ އަދަދު ވަނީ 732،896 އަށް އަރާފައެވެ. މިއާއެކު ދުވަހަކަށްވުރެ ދުވަހެއް ރާއްޖޭގެ އެއާޕޯޓު ވެސް ދަނީ ބާރުބޮޑުވަމުންނެވެ. މިއަހަރު ނިމުމުގެ ކުރިން 1.5 މިލިއަން ފަތުރުވެރިން ގެނައުމަކީ ސަރުކާރުގެ އަމާޒެކެވެ.
