"ދައުލަތުން ހޯދަން މަސައްކަތްކުރާ ފައިސާގެ މައްސަލަ ސުޕްރީމް ކޯޓުގައި ވަނީ އިސްތިއުނާފުކޮށްފައި"
ޖޫރިމަނާގެ ގޮތުގައި ދެއްކުމަށް އަމުރު ކޮށްފައިވަނީ ފަސް މިލިއަން ޔޫއެސް ޑޮލަރު
ރައީސް ޔާމިން ކޯޓަށް ހާޒިރުކުރުން
ކުރީގެ ރައީސް ޔާމީން އަބްދުލްގައްޔޫމްގެ މައްޗަށް ކުރި ހުކުމާ ގުޅިގެން ކޯޓު މެދުވެރިކޮށް ހޯދަން މަސައްކަތްކުރާ ފައިސާއަކީ ދިވެހިރާއްޖޭގެ ސުޕްރީމްކޯޓުގައި އިސްތިއުނާފްކޮށްފައިވާ މައްސަލައެއް ކަމަށް ރައީސް ޔާމީންގެ ގާނޫނީ ވަކީލުންގެ ޓީމުން ބުނެފިއެވެ.
ކްރިމިނަލް ކޯޓުން ރައީސް ޔާމީންގެ މައްޗަށް ދައުލަތުން ކުރި، މަނީ ލޯންޑްރިންގގެ ޢަމަލެއް ހިންގުމުގެ ކުށް ސާބިތުވާ ކަމަށް ކަނޑައަޅައި، އެ ކުށުގެ ޢުޤޫބާތެއްގެ ގޮތުން ރައީސް ޔާމީން ފަސް އަހަރު ދުވަހުގެ މުއްދަތަށް ޖަލަށް ލުމާއެކު 5،000،000.00 (ފަސް މިލިއަން) އެމެރިކާ ޑޮލަރުން ޖޫރިމަނާކޮށް، އެ ފައިސާ މަދުވެގެން 6 މަސްދުވަހުގެ ތެރޭގައި މީރާއަށް ދެއްކުމަށް އެ ފަރާތަށް އަންގައި، 28 ނޮވެންބަރު 2019 ގައި ވަނީ ހުކުމްކޮށްފައެވެ
އެ ޙުކުމްކޮށްފައި ވީނަމަވެސް، އެ މުއްދަތުގެ ތެރޭގައި ރައީސް ޔާމީންގެ ފަރާތުން އެ ފައިސާ ދައްކާފައިނުވާތީ، ޓެކްސް ނެގުމާބެހޭ އިދާރީ ޤާނޫނުގެ 50 ވަނަ މާއްދާގައި ބަޔާންކޮށްފައިވާ އުޞޫލާ އެއްގޮތަށް، ރައީސް ޔާމީން ދައްކަންޖެހޭ ޖޫރިމަނާ ފައިސާ ހޯދުމަށްޓަކައި، އެ މައްސަލައިގެ އެންމެހައި ލިޔެކިޔުންތައް އޭޖީ އޮފީހުން މީރާއަށް ފޮނުވިއެވެ. އެގޮތުން ޓެކްސް ނެގުމާބެހޭ އިދާރީ ޤާނޫނުގެ ދަށުން 30 ދުވަހުގެ ތެރޭގައި އެ ފައިސާ ދައުލަތަށް ދެއްކުމަށް އަންގައި 26 ޖޫން 2021 ގައި މީރާ އިން ރައީސް ޔާމީނަށް ފޮނުވި ނޯޓިސްއާ ޙަވާލުވެވަޑައިގެން، އެ ނޯޓިސްގައިވާ މުއްދަތުގައި ވެސް ފައިސާ ދައްކާފައި ނުވާކަމަށް އޭޖީ އޮފީހުން މައުލޫމާތު ދެއެވެ.
މިކަމާ ގުޅިގެން ރައީސް ޔާމީންގެ ގާނޫނީ ވަކީލުންގެ ޓީމުން ނެރުނު ބަޔާނެއްގައި ބުނީ ކްރިމިނަލް ކޯޓުން ކުރި ހުކުމްގައި ދައުލަތަށް ދައްކަންޖެހޭ ކަމަށް ކަނޑައަޅާފައިވާ ޖޫރިމަނާ ފައިސާގެ މައްސަލަ ސުޕްރީމްކޯޓުގައި ވަނީ އިސްތިއުނާފް ކޮށްފައި ކަަމަށެވެ. އަދި އެކަން މޯލްޑިވްސް އިންލަންޑް ރެވެނިއު އޮތޯރިޓީއާއި ކަމާބެހޭ މުއައްސަސާ ތަކަށް ލިޔުމުން އަންގާފައިވާ ކަމަށް ވަނީ ބުނެފައެވެ.
އެ ހުކުމް އިސްތިއުނާފުކުރުމަށް ނިންމައި ސުޕްރީމް ކޯޓުން އެ މައްސަލަ ރެޖިސްޓަރ ކޮށްފައިވަނިކޮށް، ދަށު ކޯޓުގެ ހުކުމުގެ ޖޫރިމަނާއާގުޅޭ ބައި ތަންފީޒުކުރުމަށް ދައުލަތުން މަސައްކަތް ކުރުމަކީ ރައީސް ޔާމީނަށް ގާނޫނުއަސާސީގެ 56 ވަނަ މާއްދާގެ ދަށުން ލިބިވަޑައިގަންނަވާ އިސްތިއުނާފުކުރުމުގެ ހައްގަށް ދައުލަތުން ހުރަސްއެޅުން ކަމުގައި ދެކޭ ކަމަށް އެމަނިކުފާނުގެ ގާނޫނީ ވަކީލުން ބުނެފައިވެއެވެ. އަދި މިއީ ކަންބޮޑުވާ ކަމެއް ކަމުގައި ވަނީ ބުނެފައެވެ.
ރައީސް ޔާމީންގެ ގާނޫނީ ވަކީލުން ބުނީ މިއީ މިވަގުތު ގައުމުގައި ހުރި ބޮޑެތި މައްސަލަތަކުގެ ފޯކަސް ބަދަލުކޮށް، ސަރުކާރުގެ އިސް ފަރާތްތަކުގެ މައްޗަށް ތުހުމަތުކުރެވޭ ބޮޑެތި ކޮރަޕްޝަނުގެ ތުހުމަތުތައް އޮއްބާލުމުގެ ބޭނުމުގައި ދައުލަތުގެ ވަސީލަތްތަކާއި ބާރުތައް ބޭނުންކޮށްގެން ހިންގާ ވަރަށް ފިނޑި އަމަލެއް ކަމަށެވެ.
ބަންޑާރަނައިބުގެ މި ނިންމެވުމަކީ ޤާނޫނުގެ ރައްކާތެރިކަން ކަށަވަރުކުރުމަށްވުރެ ރައީސް ޔާމީނާ ޒާތީ ގޮތުން ދިމާކޮށް، ފުރައްސާރަކުރުމުގެ ގޮތުން ހިންގާ ވިޔާނުދާ އަދި އެކަމުގައި އެއްވެސް ޤާނޫނީ ހުއްޖަތެއް ނެތް އަމަލެއްކަމުގައި ބުނެފައިވެއެވެ.
މިކަމާއި ގުޅޭ ގޮތުން އެޓަރނީ ޖެނެރަލްގެ އޮފީހުން ބުނެފައިވަނީ މައްސަލައެއް އިސްތިއުނާފުކުރެވުމަކީ، ދަށު ކޯޓުން ނިންމާފައިވާ މައްސަލައެއް ޙުކުމް ތަންފީޛުކުރުން އޮޓަމެޓިކުން ފަސްކުރަންޖެހޭ ސަބަބެއް ނޫން ކަމަށާއި، ދަށު ކޯޓުގެ ނިންމުމެއް އިސްތިއުނާފުކުރުމަށްފަހު އެ ނިންމުން ތަންފީޛުކުރުން ފަސްކުރުމުގެ އަމުރެއް އިސްތިއުނާފީ ކޯޓުން ނުނެރޭހާ ހިނދަކު އެ ނިންމުން ތަންފީޛުކުރުމަށް ހުށަހެޅުމަށް ހުރަހެއް ނެތް ކަމުގައި ދިވެހިރާއްޖޭގެ ސުޕްރީމު ކޯޓުން ނިންމަވާފައިވާ މޯލްޑިވްސް އިންލޭންޑް ރެވެނިއު އޮތޯރިޓީ ވ. މޯލްޑިވްސް ކޮލިޓީ ސީފުޑް ޕްރައިވެޓް ލިމިޓެޑް މައްސަލައިގައި ކަނޑައަޅުއްވާފައިވޭ.
ދައުލަތަށް ލިބެންޖެހޭ މި ފައިސާ ހޯދުމަށް 24 އޮގަސްޓް 2021 ގައި އޭޖީ އޮފީހުން ވަނީ ސިވިލް ކޯޓަށް ހުކުމް ތަންފީޒު ކޮށްދިނުމުގެ މައްސަލައެއް ހުށަހަޅާފައެވެ. މި މައްސަލާގައި އޭޖީ އޮފީހުން އެދިފައިވަނީ ކްރިމިނަލް ކޯޓުގެ ޙުކުމުގައި، ޢަބްދުﷲ ޔާމީން ޢަބްދުލްޤައްޔޫމްގެ ފަރާތުން ޖޫރިމަނާގެ ގޮތުގައި ދެއްކުމަށް އަމުރުކޮށްފައިވާ 5،000،000 މިލިއަން އެމެރިކާ ޑޮލަރު އެއްފަހަރާ ދައުލަތަށް ދެއްކުމަށް އަމުރުކޮށްދެއްވުމަށެވެ.
މިހާތަނަށް ސަރުކާރަކުން ހިންގި އެންމެބޮޑު ހިޔާނާތް ކަމަށްވާ، ރައީސް ޔާމީންގެ ވެރިކަމުގައި ހިންގި އެމްއެމްޕީއާރުސީގެ ހިޔާނާތުގެ މައްސަލައިގައި ހިމެނޭ، ގއ. ވޮޑަމުލާގެ އިކުއިޒިޝަން ކޯސްޓްގެ ގޮތުގައި ދައުލަތަށް ލިބެންޖެހޭ 1،000،000 ޑޮލަރު ރައީސް ޔާމީންގެ އެކައުންޓަށް ޖަމާކޮށްފައިވާއިރު، އެމްއެމްޕީއާރުސީގެ އިތުރު މައްސަލަތަކެއްގެ ތަހުގީގުތައް ކުރިއަށްދެއެވެ.
