ނިމިދިޔަ ހުކުރު ދުވަހު އޮތް "ލޫޓުވައިފި، ލޫޓުވައިފި" އެއްވުމުގައި ސޮނިކް ޑިވައިސް ބޭނުންކޮށްފައިވާ އިރު، އެއީ ޤާނޫނީ ގޮތުން ހުއްދަ ކަމެއް ކަމަށް ދެއްކުމަށް މަސައްކަތް ނުކުރެވޭނެ ކަަމަށާއި، އެކަމާއި މެދު ހޯމް މިނިސްޓަރ އަލީ އިހުސާނާއި ބަހުސްކުރައްވަން ތައްޔާރަށް ހުންނެވި ކަމަށް ކުރީގެ ބަންޑާރަނައިބު، ދިޔާނާ ސައީދު ވިދާޅުވެއްޖެއެވެ.

ދިޔާނާ މިފަދައިން ވިދާޅުވެފައި ވަނީ ސޮނިކް ޑިވައިސް ބޭނުންކުރުން ދިފާއުކޮށް އެކްސްގައި އިހުސާން ކުރައްވާފައިވާ ޓްވީޓެއް ރީޓްވީޓް ކުރައްވާ ހިއްސާކުރައްވާފައިވާ މެސެޖެއްގައެވެ. އިހުސާން އަށް ޗެލެންޖްކުރައްވާ ދިޔާނާ ވިދާޅުވީ އިހުސާން ވިދާޅުވި ތަނަކަށް، ވިދާޅުވި ގަޑި އަކު މި މައްސަލައިގައި ބަހުސްކުރައްވަން ވަޑައިގަންނަވާނެ ކަމަށެވެ. އަދި އެ ކަމަކީ ޤާނޫނީ ގޮތުން ހުއްދަކަމެއް ނޫން ކަމަށް ދިޔާނާ ވިދާޅުވިއެވެ.

ދިޔާނާ ވިދާޅުވީ އާއްމުންގެ ކަންފަތް ބަންދުކުރުމަށް ފަހު ރައްޔިތުންނަށް އިޖާބަ ދިނުމަށް ފުރުސަތު ނުދިނުމަކީ ވަރަށް ދަށު ދަރަޖައިގެ އަމަލެއް ކަަމަށް ޤަބޫލުކުރައްވާ ކަމަށެވެ. އަދި ކޮމެންޓް ނުކުރެވޭ ގޮތަށް ފުލުހުން އެ ޕޯސްޓްކޮށްފައިވާކަން ފާހަގަކޮށް ދިޔާނާ ވަނީ އެކަމަށް ވެސް ފާޑު ވިދާޅުވެފައެވެ. އެއީ ބުނަން ބޭނުންވާ އެއްޗެއް ބުނުމަށް ފަހު ދުވެ ފިލުން ކަމަށް ދިޔާނާ ވަނީ ސިފަކުރައްވާފައެވެ.

އިދިކޮޅު އެމްޑީޕީން އޮކްޓޯބަރު 3، ގައި ބޭއްވި މުޒާހަރާގެ ބައިވެރިންނާ ދެކޮޅަށް ފުލުހުން ބޭނުންކުރި ބާރުގަދަ އަޑު އިއްވާ "ސޮނިކް ވެޕަން" އެއް ކަމަށްވާ ލޯންގް ރޭންޖް އެކޯސްޓިކް ޑިވައިސް (އެލްރެޑް) ހަތިޔާރެއްގެ ގޮތުގައި ބޭނުން ކުރީ އަލަށް ނޫންކަމަށާއި އޮކްޓޫބަރު 3 ގައި ބޭނުން ކުރި މޮޑެލްގެ ސޮނިކް ވެޕަން ހަތިޔާރެއްގެ ގޮތުގައި އެންމެ ފުރަތަމަ ބޭނުންކުރަންފެށީ 2023 ވަނަ އަހަރުގެ މެއި މަހު ކަމަށް ވިދާޅުވެ ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވަނީ އިތުރުފުޅު ހައްދަވާފައެވެ. އަދި އެކަމުގެ ސަބަބުން އާއްމުންގެ ފާޑުކިޔުމާއި ވަރަށް ބޮޑަށް އިހުސާނަށް ކުރިމަތިވެވަޑައިގަންނަވާފައިވެއެވެ.