ރިފްއަތު އޭސީސީ އަށް ހާޒިރުކުރިއިރު ކުރާ ތުހުމަތު ސާފެއް ނުކޮށްދެވުނު، އެއީ ޖިނާއީ ކުށެއް: ވަކީލް ނޫރުއްސަލާމް
ކުރާ ތުހުމަތެއް ސާފުކޮށްދިނުމަކީ ތަހުގީގެއްގެ އެންމެ އަސާސީ އެއް ސިފަ
ރިފްއަތުގެ ގާނޫނީ ވަކީލު ނޫރުއްސަލާމް އަބޫބަކުރު
ކުރީގެ ބަންޑާރު ނައިބު އަލްއުސްތާޛް އިބްރާހީމް ރިފްއަތު، އެންޓި ކޮރަޕްޝަން ކޮމިޝަން (އޭސީސީ) އަށް ހާޒިރު ކޮށްފައި ވަނީ އޭނާގެ މައްޗަށް ކުރާ ތުހުމަތެއް ވެސް ނެތި ކަމަށާއި އެއީ ޖިނާއީ ކުށެއް ކަމަށް ރިފްއަތުގެ ޤާނޫނީ ވަކީލް ނޫރުއްސަލާމް އަބޫބަކުރު ވިދާޅުވެއްޖެއެވެ.
އޭނާ އެފަދައިން ވިދާޅުވީ ކުރީގެ ބަންޑާރަ ނައިބު އިބްރާހިމް ރިފްއަތު އޭސީސީ އަށް ހާޒިރުކުރުމާއި ގުޅޭ ގޮތުން ރާއްޖެއެމްވީ އަށް ދެއްވި ބަސްތީގަތުމެއްގައެވެ.
އޭނާ ވިދާޅުވީ ރިފްއަތު އާއި މެދު ކުރާ ތުހުމަތު އޭސީސީ އަށް ސާފުކޮށް ނުދެވޭ ކަމަށެވެ. އެއީ ތަހުގީގެއްގެ އެންމެ އަސާސީ އެއް ސިފަ ކަމަށާއި އެކަން ވެސް ސާފު ނުވާތީ އޭސީސީ އިން ރިފްއަތު އާއި މެދު ބަލާ މައްސަލަ އާއި މެދު ސުވާލު އުފެދޭކަން ވަކީލުގެ ވާހަކައިގައި ފާހަގަކުރެއްވިއެވެ.
މީގެ އިތުރުން އެއްވެސް އިދާރާ އަކަށް މީހަކު ހާޒިރުކުރެވޭނީ އެ މީހަކަށް ކުރާ ތުހުމަތެއް އޮވެގެން ކަމަށާއި އެ މީހަކާއި މެދު ކުރާ ތުހުމަތު ސާފު ވުމަކީ އިދާރާތަކަށް ހާޒިރުކުރާ މީހުންގެ ހައްގެއް ކަމަށް އެނާ ވަނީ ވިދާޅުވެފައެވެ. ރިފްއަތު އޭސީސީ އަށް ހާޒިރުކުރާނެ ސަބަބުވެރި އެއްވެސް ކަމެއް އޭސީސީ އަށް ދެއްކިފައި ނުވުމާއި އެކު ރިފްއަތު އޭސީސީ އަށް ހާޒިރު ކުރީ ރަނގަޅަށް ނޫން ކަމަށް އޭނާ ވިދާޅުވިއެވެ.
އަޅުގަނޑަށް ފާހަގަކުރެވުނު ކަމަކީ ތަހުގީގެއް ޚާއްސަކޮށް ކޮރަޕްޝަންގެ ތުހުމަތު ވިޔަސް އެހެން ތަހުގީގެއް ވިޔަސް އެންމެ މައިގަނޑު އެއް ކަންތައް އޭސީސީ އިން ވަނީ ދޫކޮށްލާފަ. އެއީ ތުހުމަތެއް ނެތް އަދި ތުހުމަތު ސާފެއްވެސް ނުކޮށްދެވުނު، ނަމަވެސް ތަހުގީގަށް ހާޒިރު ކުރާ ފަރާތުގެ ހައްގެއް އެއީ... އެ ހައްގު ފޯރުކޮށްނުދީ ތަހުގީގު ކުރިޔަށް ގެންދިޔައީ. އެއްވެސް ކަހަލަ ތުހުމަތެއް ނެތި މީހަކު އެގޮތަށް ހާޒިރުކުރުމަކީ އެއީ ޖިނާއީ ކުށެއް. ޤާނޫނުލް އުގޫބާތުގެ 512 ވަނަ މާއްދާގަ އެބަ ބުނޭ ދައުލަތުގެ މުވައްޒަފަކަށް ހުއްދަ ނެތް ކަމެއް ކުރުމަކީ އެއީ ކުށެއް ކަމަށް.ޤާނޫނީ ވަކީލް ނޫރުއްސަލާމް އަބޫބަކުރު
ހަމައެހެންމެ ރިފްއަތު ހާޒިރުކުރުމަށް ފަހު ރިފްއަތާ ދެކޮޅަށް އޭސީސީ އިން ދެއްކި ބައެއް ލިޔުންތައް ހޯދަން އެދުމުން އެ ލިޔުންތައްވެސް ފޯރުކޮށްދީފައި ނުވާ ކަމަށާއި، އެއީ ވެސް ޖިނާއީ އިޖުރާތުގެ ގާނޫނުން ރިފްއަތު އަށް ލިބެންޖެހޭ ހައްގެއް ނިގުޅައިގަތުން ކަމަށް ވަކީލް ވަނީ ވިދާޅުވެފަވެއެވެ.
ކުރީގެ ރައީސް އިބްރާހީމް މުހައްމަދު ސާލިހުގެ ސަރުކާރުގައި ބަންޑާރަ ނައިބުގެ މަޤާމު އަދާ ކުރެއްވި ރިފްއަތު އޭސީސީ އަށް ޙާޒިރު ކޮށްފައި ވަނީ ބުރާސްފަތި ދުވަހުގެ މެންދުރު ފަހު 14:30 ގައެވެ. ރިފްއަތު އޭސީސީ އަށް ހާޒިރުވި ވަގުތު، އެ ސަރަހައްދުގައި އެމްޑީޕީގެ މެމްބަރުން ވަނީ އެއްވެ، އަޑު އުފުލާފައެވެ.
