"އިރާދަކުރެއްވިއްޔާ ވޯޓު ކަރުދާހުގައި ނަން އޮންނާނެ"

އެމްޑީޕީގެ ދާއިރާތަކުގެ އިންތިޚާބުގެ ވޯޓު ކަރުދާހުގައި ނަން އޮންނާނެކަމަށް އުއްމީދު ކުރައްވާކަމަށް ޔޫތު މިނިސްޓަރ އަޙުމަދު މަޚުލޫފު ވިދާޅުވެއްޖެއެވެ.

އިންތިޚާބަށް 30 ދުވަހަށް ވެފައިވާއިރު, ކެމްޕޭން ކުރައްވަން ބޭނުންފުޅުވާ ކަމަށާއި ތަފާތުނުކުރުމަށް އެދިވަޑައިގަންނަވާކަމަށް ބަޔާން ކުރައްވައި, މަޚުލޫފު ވަނީ ކުރިމަތި ނުލެއްވޭނެކަމަށް ނިންމި ނިންމުން ރިވިއު ކޮށްދެއްވުމަށް އެދި ހުށަހަޅުއްވާފައެވެ. މަޚުލޫފު އޭރު ވަނީ އިންތިޚާބާބެހޭ ކޮމިޓީއާއި އިސްތިއުނާފު ފަޑިޔާރުންގެ މަޖިލީހަށް ހުށައެޅި ޝަކުވާއަށް އެއްވެސް ޖަވާބެއް ނުލިބި, އިންތިޚާބަށް އެންމެ 30 ދުވަހަށް ވެފައިވާތީ ސިޔާސީ ޕާޓީ ތަކުގެ ބެލެނިވެރި ފަރާތް އީސީއަށްވެސް އެ މައްސަލަ ހުށައަޅުއްވާފައެވެ.

އޭގެ އިތުރުން، މަޚުލޫފުގެ ފަރާތުން މި ނިންމުން ރިވިއު ކުރުމަށްފަހު އެމްޑީޕީގެ އެތެރޭގެ އިންތިޚާބުގައި ވާދަ ނުކުރެއްވޭނެކަމަށް އަންގާރަ ދުވަހު ވަނީ އޭނާއަށް އަންގާފައެވެ.

އެކަމާ ގުޅޭގޮތުން ރާއްޖެއެމްވީއާ ވާހަކަ ދައްކަވަމުން މަޚުލޫފު ވިދާޅުވީ، ވޯޓު ކަރުދާހުގައި އޭނާގެ ނަން އޮންނާނެކަމަށް އުއްމީދު ކުރެއްވޭކަމަށެވެ.

އެމްޑީޕީގެ ދާއިރާތަކުގެ އިންތިޚާބުގައި ވާދަކުރުމަށް ފޯމް ހުށަހަޅާފައިވަނިކޮށް މަޚުލޫފުގެ ޝަރުތު ފުރިހަމަނުވާކަމަށް ޕާޓީގެ ސެކްރެޓޭރިއޭޓްގެ ފަރާތުން އޭނާއަށް އެންގީ 16 އޮގަސްޓްގައެވެ. އަދި ޝަރުތު ފުރިހަމަ ނުވާކަމަށް ނިންމާފައިވަނީ "ޝަރުތު ފުރިހަމަވާ ފަރާތްތައް ބެލުމަށް ކަމާ ގުޅުންހުރި މުއައްސަސާތަކަށް ފޮނުވުމުން, އޭގެތެރެއިން އެންޓި-ކޮރަޕްޝަން ކޮމިޝަނުން, މައްސަލައެއް ވާކަމަށް އަންގާފައިވާތީ" ކަމަށް އޭނާ ވިދާޅުވެފައިވެއެވެ.