ޑަބްލިއުޓީއެމްގެ ރެޖިސްޓްރޭޝަން އެމްއެމްޕީއާރުސީން ފަށައިފި

ވޯލްޑް ޓްރެވަލް މާކެޓް، ލަންޑަންގެ ރެޖިސްޓްރޭޝަން މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ފަށައިފިއެވެ.

އަންގާރަ ދުވަހު އެމްއެމްޕީއާރުސީ އިން ޑަބްލިއުޓީއެމްގެ ރެޖިސްޓްރޭޝަންގެ މަސައްކަތްތައް ފަށާފައިވާއިރު، މި މަސައްކަތް ކުރިއަށް ގެންދަނީ ސްޓެލްކޯގެ ހޯލްގައެވެ.

ރާއްޖެޓީވީއާ ވާހަކަދައްކަވަމުން އެމްއެމްޕީއާރުސީގެ މެނޭޖިން ޑިރެކްޓަރ ތޮއްޔިބު މުހައްމަދު ވިދާޅުވީ ރެޖިސްޓްރޭޝަން ޕްރޮސެސް ކުރިއަށް ގެންދަނީ ފުރަތަމަ އަންނަ މީހާއަށް ފުރަތަމަ އިސްކަންދޭ އުސޫލުން ކަމަށެވެ. އަދި އޮންލައިންކޮށް ރެޖިސްޓްރޭޝަންގެ ޕްރޮސެސް ކުރިއަށް ގެންދިއުމުގެ ބަދަލުގައި ފިޒިކަލްކޮށް މި ޕްރޮސެސް ކުރިއަށްގެންދަން ނިންމީ ވީހާވެސް ހަަމަހަމަ ފުރުސަތު ހުރިހާ ފަރާތްތަކަށް ދިނުމަށް ކަމަށް ތޮއްޔިބު ވިދާޅުވިއެވެ.

ތޮއްޔިބު ވިދާޅުވީ ކޮވިޑް-19ގެ ސަބަބުން ޑަބްލިއުޓީއެމް ނުބާއްވާ އޮތުމަށްފަހު މިއަހަރުގެ ނޮވެމްބަރު މަހު ބާއްވަން ތާވާލުކޮށްފައިވާ ކަމަށާއި، މިއަހަރުގެ ފެއަރ ބާއްވަނީ ރައްކާތެރިކަމުގެ ގިނަ ފިޔަވަޅުތަކާއެކު ކަމަށެވެ. އެގޮތުން އާންމުކޮށް އެމްއެމްޕީއާރުސީން މީގެ ކުރިން ނަގާ ސްޓޭންޑުގައި ފެއަރގައި ބައިވެރިވުމުގެ ފުރުސަތު ދެވެނީ ވަރަށް މަދު ބަޔަކަށް ކަމަށާއި އެހެން ކަމުން ދެ ސްޓޭންޑުގެ ޖާގަ ހޯދައި މިހާރު 100 ފަރާތަކަށް ފެއަރގައި ބައިވެރިވުމުގެ ފުރުސަތު ހޯދިފައިވާކަމަށް ތޮއްޔިބު ވިދާޅުވިއެވެ.

މި ފެއަރއަށް ޑިމާންޑު އެބައޮތް ކަމަށާއި ރާއްޖެ އަކީ މިވަގުތު ދުނިޔޭގެ ލީޑިން ޑެސްޓިނޭޝަން ކަމުން ފެއަރގެ ސަބަބުން ފަތުރުވެރިކަމުގެ ސިނާއަތުގެ ވިޔަފާރިތަކަށް އައު ފުރުސަތުތަކެއް ހުޅުވިގެންދާނެ ކަމަށް ތޮއްޔިބު ވަނީ ފާހަގަކުރައްވާފައެވެ.

ވޯލްޑް ޓްރެވަލް މާކެޓް، ލަންޑަން ފެއަރ އަކީ ފަތުރުވެރިކަމުގެ މާކެޓުގައި ދުނިޔޭގެ ފެންވަރުގައި ބޭއްވޭ އެންމެ ބޮޑު އެއް ފެއަރއެވެ. މި އަހަރުގެ ފެއަރ ބޭއްވުމަށް ހަމަޖެހިފައި ވަނީ ނޮވެމްބަރު މަހުގެ އެކަކުން ތިން ވަނަ ދުވަހަށެވެ.