މިފްކޯ އިތުރަށް ތަރައްޤީކުރުމުގެ މަޝްރޫއުގެ އިމްޕްލިމެންޓޭޝަންގެ ފުރަތަމަ މަރުހަލާ ނިމި ކޮންޓްރެކްޓަރެއް ހޯދުމާ ހަމައަށް

އިންޑިއާގެ އެގްޒިމް ބޭންކު މެދުވެރިކޮށް އިންޑިއާ ސަރުކާރުން ދިވެހިރާއްޖެއަށް ފޯރުކޮށްދީފައިވާ 800 މިލިއަން ޑޮލަރުގެ ލައިން އޮފް ކްރެޑިޓްގެ ދަށުން ހިންގަމުންދާ 'އެކްސްޕޭންޝަން އޮފް ކެޕޭސިޓީޒް އޮފް މިފްކޯ' މަޝްރޫއުގެ އިމްޕްލިމެންޓޭޝަންގެ ފުރަތަމަ މަރުހަލާ ފުރިހަމަކޮށް, މަޝްރޫޢުގެ މަސައްކަތް ކުރިއަށް ގެންދާނެ ކޮންޓްރެކްޓަރެއް ހޮވުމުގެ މަރުހަލާ އަވަސް މުސްތަގްބަލެއްގައި ފެށުމަށް ހަމަޖެހިފައިވާކަމަށް އިންޑިޔާ ހައިކޮމިޝަނުން ބުނެފިއެވެ.

މި މަޝްރޫއުގެ ޑީޓެއިލްޑް ޕްރޮޖެކްޓް ރިޕޯޓް (ޑީ.ޕީ.އާރް) ތައްޔާރުކޮށްފައިވަނީ ދިވެހި ސަރުކާރުން ހޮވާފައިވާ ފަރާތަކުންނެވެ. އަދި މި ރިޕޯޓް ވަނީ އިންޑިއާ ސަރުކާރުގެ ޓެކްނިކަލް އޮތޯރިޓީތަކުން ބަލައި ފާސްކޮށްފައެވެ. މި މަޝްރޫޢުގެ މަސައްކަތް ފުރިހަމަ ކުރުމަށް ނަގާނެ ކަމަށް ލަފާކުރެވެނީ 2 އަހަރު ދުވަހުގެ މުއްދަތެކެވެ.

މަޝްރޫޢުގެ ޑީ.ޕީ.އާރް ގައި ވާގޮތުން، މަޝްރޫޢުގެ ފުރިހަމަ ސްކޯޕްގެ ތެރޭގައި އަންނަނިވި ބައިތައް ހިމެނެއެވެ:

1.ފެލިވަރު ފިޝަރީޒް ކޮމްޕްލެކްސް: 100 ޓަނުގެ ކަނޑުމަސް 8 ގަޑިއިރުގެ ޝިފްޓުގައި ގަނޑުކުރެވޭ އައު ރިފްރިޖަރޭޝަން ކޮމްޕްލެކްސްއެއް ޤާއިމް ކުރުމާއި، ލޮނުފެން ގަނޑުކޮށް 80 ޓަނުގެ ކަނޑުމަސް ބެހެއްޓޭނެ ހޯލްޑިން ޓޭންކް ޤާއިމް ކުރުމާއި، 4000 ޓަނުގެ ކޯލްޑް ސްޓޯރޭޖް އަދި އައު ޕަވަރހައުސްއެއް ޤާއިމް ކުރުން.

މީގެ އިތުރުން ފެލިވަރު ފިޝަރީޒް ކޮމްޕްލެކްސްގައި, މަސްދަޅު އުފައްދާ އިތުރު ފެކްޓަރީއަކާއި، ދުވާލެއްގެމައްޗަށް 100 ޓަނުގެ ކަނޑުމަސް ޕްރޮސެސްކޮށް ދަޅުމަހާއި، ކައްކާ ގަނޑުކުރެވިފައިވާ މަސްބުރި އަދި ޕައުޗް ފަދަ އެތައް ޕްރޮޑަކްޓް އުފެއްދޭ ފެސިލިޓީއެއްގެ އިތުރުން، ދުވާލެއްގެމައްޗަށް 40 ޓަނުގެ 'ފިޝްމީލް' އުފެއްދޭ ޕްލާންޓްއަކާއި، ދުވާލެއްގެމައްޗަށް 50 ޓަނުގެ އައިސް އުފެއްދޭ ޕްލާންޓެއްގެ އިތުރުން 100 ޓަނުގެ އައިސް ސްޓޯރެޖް ކެޕޭސިޓީއެއް ޤާއިމް ކުރެވޭނެއެވެ.

2. ގެމަނަފުށި: މި މަޝްރޫއުގެ ސްކޯޕްގެ ތެރޭގައި ގެމަނަފުށީގައި ދުވާލެއްގެމައްޗަށް 50 ޓަނުގެ އައިސް އުފައްދާ ޕްލާންޓެއް ޤާއިމްކުރުމުގެ އިތުރުން 8-10 ޝިޕިން ކޮންޓެއިނަރު ޓްރާންސްޕޯޓް ކުރެވޭ ލޭންޑިން ކްރާފްޓެއް ވެސް ޤާއިމް ކުރެވޭނެއެވެ. މީގެ ސަބަބުން ދިވެހިރާއްޖޭގެ ދެކުނުގެ ސަރަހައްދުގެ މަސްވެރިންނަށް ވަރަށް ބޮޑު އެހީތެރިކަމެއް ލިބިގެންދާނެއެވެ.

މި މަޝްރޫޢަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ސަރުކާރުން ދިވެހިރާއްޖޭގެ މަސްވެރިކަމުގެ ޞިނާޢަތް އިތުރަށް ކުރިއެރުވުމަށްޓަކައި ކުރެވޭ އިސްތިރާޖީ އިންވެސްޓްމެންޓެކެވެ. މިފްކޯ އެކްސްޕޭންޝަން މަޝްރޫޢަކީ އިންޑިއާގެ ލައިން އޮފް ކްރެޑިޓްގެ ދަށުން ދިވެހި ސަރުކާރުން ސިގްނަލްކުރި އެންމެ ފުރަތަމަ މަޝްރޫޢުތަކުގެ ތެރޭގައި ހިމެނޭ މަޝްރޫޢެކެވެ.

މި މަޝްރޫއުގެ ސަބަބުން މަސްވެރިންނަށް ދިމާވެފައިވާ ޕްރޮސެސިން ކެޕޭސިޓީއާއި ސްޓޯރޭޖްގެ ދަތިތަކަށް އެތައް ލުއެއް ލިބިގެންދާނެކަމަށާއި، ދިވެހި މަސްވެރިންގެ އާމްދަނީ އިތުރުވުމަށް މަގުފަހި ވެގެންދާނެއެވެ.