މޭ 6ގެ ހަމަލާއަށް ޚާއްސަ ލަވަ "ބޮން" ރިލީޒްކޮށްފި

މޭ 6 ވަނަ ދުވަހު ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝީދަށް އަމާޒުކޮށް, ދިން ހަމަލާއަށް ޚާއްސަ ލަވަ "ބޮން" ރިލީޒްކޮށްފިއެވެ.

މިޔުޒިޝަން "ކަޔާނޯ" ލިޔެ ތައްޔާރު ކުރި މި ލަވަ ރިލީޒްކޮށްދެއްވީ މިކަމަށްޓަކައި ބޭއްވި ޚާއްސަ ރަސްމިއްޔާތެއްގައި, ރައީސް ނަޝީދުގެ މަންމާފުޅު ޢާބިދާ މުޙައްމަދެވެ. ރައީސް ނަޝީދަށް ހަމަލާ އަމާޒުވި ނީލޯފަރު ހިނގުމާއި، މަޖީދީ މަގު ގުޅޭ ކަންމަތީގައި ބޭއްވި ރަސްމިއްޔާތުގައި މި ލަވަ ފުރަތަމަ ފަހަރަށް ވަނީ ދައްކާލާފައެވެ.

މޭ 6ގެ ހަމަލާއަށް ޚާއްސަ ލަވަ ލޯންޗްކުރުމުގެ ރަސްމިއްޔާތުގައި ވާހަކަދައްކަމުން މިއުޒިޝަން "ކަޔާނޯ" ބުނީ މިޔުޒިކާ އާރޓް ނެތިކޮށްލުމަށް ބަޔަކު އުޅޭއުޅުމާ ދެކޮޅުހަދައި، މިޔުޒިޝަނުން ދިފާއުކޮށްދިނުމުގެ އުއްމީދަކީ ރައީސް ނަޝީދުކަމަށެވެ. އަދި ރައީސް ނަޝީދު އަވަހާރަކޮށްލުމަށް ބޮން ގޮއްވާލުމުން މި ލަވަ ނެރުނީ, މިއުޒިޝަނުންގެ ވާޖިބެއްކަމަށް ދެކޭތީ ޓްރިބިއުޓެއްގެ ގޮތުންކަމަށެވެ. މިއުޒިކީ ދާއިރާއާއި ގިނަ ދުވަސްތަކެއް ވަންދެން ދުރުގައި ހުރުމަށްފަހު "ކަޔާނޯ" އެނބުރިއައީ މި ހަމަލާގެ ސަބަބުން ކުރި އަސަރުގެ ފުންކަމާއި، މި ފަދަ ކަންކަމަށް ހޭލުންތެރިކަން އިތުރުކުރުން ކޮންމެހެންވެސް މުހިންމުކަމަށް ދެކޭތީކަމަށެވެ.

މި ރަސްމިއްޔާތަށްފަހު ވާހަކަފުޅުދައްކަވަމުން ރައްޔިތުންގެ މަޖިލީހުގެ ވިލުފުށީ ދާއިރާގެ މެންބަރު ޙަސަން ޢަފީފް ވަނީ މި ހަރަކާތުންނާއި ލަވައިންވެސް ދިވެހި ރައްޔިތުން ރައީސް ނަޝީދަށް ދެއްވާ ލޯތްބާއި ޤަދަރު ފެނިގެންދާކަމަށް ވިދާޅުވެފައެވެ. އަދި ރާއްޖޭގައި މިފަދަ ބިރުވެރިކަމެއް އޮތުމަށް ދިވެހިން ބޭނުންނުވާކަމަށް ޢަފީފް ވިދާޅުވިއެވެ.

މެއި މަހުގެ 6 ވަނަ ދުވަހުގެ ރޭ ދިން މިހަމަލާގައި ލިބިވަޑައިގެންނެވި އަނިޔާތަކަށް އިނގިރޭސިވިލާތުގައި ފަރުވާ ހޯއްދަވަމުން ގެންދަވާއިރު, ހާލުކޮޅު ޖުމްލަ ގޮތެއްގައި ރަނގަޅު ކަމަށާއި ނަމަވެސް ހަށިކޮޅުގެ ވާތް ފަރާތުގެ ވަރަށް ގިނަ ތަންތަން އަދިވެސް ހުންނަނީ އައްސިވެފައިކަމަށް, ޖުލައި މަހުގެ 27 ވަނަ ދުވަހު އެމަނިކުފާނު ވަނީ ހާމަކުރައްވާފައެވެ.

ރައީސް ނަޝީދަށް ލިބިވަޑައިގެންނެވި އަނިޔާތަކަށް އޭޑީކޭ ހޮސްޕިޓަލްގައި 16 ގަޑިއިރުގެ އޮޕަރޭޝަނެއް ކޮށްފައިވެއެވެ. އައި.އީ.ޑީއެއް ގޮއްވާލުމުގެ ހާދިސާގައި އެމަނިކުފާނުގެ ހަށިކޮޅަށް 10 ރޭޒާ ފުއް ވަދެ ހަށިގަނޑުގެ މުހިއްމު ގުނަވަންތައް ފޫއަޅުވާލާފައިވެއެވެ. އެމަނިކުފާނު އިތުރު ފަރުވާ ހޯއްދެވުމަށް ޖަރުމަނުވިލާތަށް ވަޑައިގެންނެވީ މެއި މަހުގެ 13 ވަނަ ދުވަހުއެވެ. އޭގެފަހުން ޖަރުމަނުވިލާތުގައި ވެސް އިތުރު އޮޕަރޭޝަންތަކެއް ކޮށްފައިވެއެވެ.