މަޚުލޫފުގެ މައްސަލާގައި ފޮރިން މިނިސްޓްރީން ފާހަގަކުރި މައްސަލަތައް ރައީސް އޮފީހުން ކޮމިޝަނުގެ ސަމާލުކަމަށް ގެނެސްފި
24 އޯގަސްޓު 2021 | އަންގާރަ 16:44ރާއްޖޭގެ ގާނޫނުތަކާ، އަދި ލަންކާ ގާނޫނުތަކާ ޚިލާފަށް ލަންކާ ރައްޔިތެއްގެ ބަޔާން ނެގިކަމަށް ބުނޭ
ޔޫތު މިނިސްޓަރ އަޙުމަދު މަޚްލޫފު- މިނިސްޓަރ މިހާރުވެސް ހުންނެވީ ސަސްޕެންޝަންގައި
އެމްއެމްޕީއާރްސީ ޚިޔާނާތުގެ ތުހުމަތުގައި ސަސްޕެންޝަންގައި ހުންނެވި ޔޫތު މިނިސްޓަރ އަހުމަދު މަހުލޫފުގެ މައްސަލާގައި ފޮރިން މިނިސްޓްރީން ފާހަގަކުރި މައްސަލަތައް ރައީސް އޮފީހުން ރިޔާސީ ކޮމިޝަނުގެ ސަމާލުކަމަށް ގެނެސްފިއެވެ.
މި މައްސަލައާ ގުޅިގެން ކަނޑައެޅިގެން ރާއްޖޭގެ ގާނޫނުތަކާ, އަދި ލަންކާގެ ގާނޫނުތަކާ ޚިލާފަށް ލަންކާ ރައްޔިތެއްގެ ބަޔާން ނެގި މައްސަލައެއް ފެންމަތިވެ, ލަންކާގެ ކަމާގުޅޭ އިދާރާއަކުން އެ މައްސަލަ ބަލަމުންދާ ކަމަށް މިނިސްޓަރ މަޚުލޫފު ދާދި ފަހުން ވަނީ މީސްމީޑިއާ މެދުވެރިކޮށް ވިދާޅުވެފައެވެ. އަދި އެ މައްސަލަ ފޮރިން މިނިސްޓްރީންވެސް ތަހުގީގު ކުރަމުންދާކަން ފާހަގަ ކުރައްވައި މަޚުލޫފު ވަނީ ޖިނާއީ ތަހުގީގު ޒޫމް މެދުވެރިކޮށް ހިންގިއިރު ލަންކާގައި ހުންނަވާ ރާއްޖޭގެ ސަފީރުވެސް އިންނެވިކަމަށް ތުހުމަތު ކުރައްވާފައެވެ.
އޭގެ އިތުރުން، އެންމެ ފަހުން ނޫސްވެރިންނާއެކު ބޭއްވި ބައްދަލުކުރެއްވުމުގައި ރައީސް ޞާލިޙުވެސް ވަނީ ފޮރިން މިނިސްޓްރީން އެކަން ބަލަމުންދާކަން ފާހަގަ ކުރައްވާފައެވެ.
ރާއްޖެއެމްވީއަަށް މައުލޫމާތު ލިބިފައިވާ ގޮތުގައި މި މައްސަލަ ފޮރިން މިނިސްޓްރީން ބެލުމަށްފަހު، އެކަމާ ގުޅޭ ރިޕޯޓު ވަނީ ރައީސް އޮފީހާ ހިއްސާކޮށްފައެވެ. އަދި ރައީސް އޮފީހުން ވަނީ މިނިސްޓްރީގެ ރިޕޯޓުގައި މައްސަލަތަކެއް ފާހަގަކޮށްފައިވާކަން އެސެޓް ރިކަވަރީ ކޮމިޝަނުގެ ސަމާލުކަމަށްވެސް ގެނެސްފައެވެ.
މި މައްސަލާގައި ފެށުނީއްސުރެ އެކި ދިމަދިމާލުން ސިޔާސީ ނުފޫޒު ވަދެފައިވާކަމަށް މަޚުލޫފު ތުހުމަތުކުރައްވައެވެ. މަޚުލޫފު ވިދާޅުވީ، ކުރިން ނިންމަވައިގެން ހުންނެވީ ޕީޖީ އޮފީހުން ގޮތެއް ނިންމުމުން އިސްތިއުފާ ދެއްވުމަށް ކަމަށެވެ. ނަމަވެސް ކަންކަން މިހާ ގޯސްކޮށް ދާތީ, ދަޢުވާ ކުރިޔަސް ދެން އިސްތިއުފާ ދެއްވުމާމެދު ވިސްނަވާނެކަމަށެވެ. އަދި އެކަން ރައީސަށްވެސް ރަސްމީކޮށް ދަންނަވާނެކަން ފާހަގަކުރައްވައި، މަގާމުން ވަކިކުރެއްވުމަކީ ރައީސުލްޖުހޫރިއްޔާއަށް ގާނޫނު އަސާސީން މަތިކޮށްފައިވާ ބާރެއް ކަމުން، ގޮތެއް ނިންމަވާނީ ރައީސް ކަމަށް އޭނާ ވިދާޅުވިއެވެ.
މިމައްސަލައާ ގުޅިގެން ރައީސް އިބްރާހީމް މުޙައްމަދު ޞާލިހު ވިދާޅުވީ އެމްއެމްޕީއާރްސީ ޚިޔާނާތުގެ ތަހުގީގާ ގުޅިގެން މަޚުލޫފުގެ މައްޗަށް ތުހުމަތު ކުރެވޭ މައްސަލައިގައި ޕީޖީ އޮފީހުން އަވަހަށް ގޮތެއް ނިންމަވަން ޖެހޭކަމަށެވެ.
