ކާބުލްގެ ހާމިދު ކަރްޒާއީ އެއަރޕޯޓުގެ ބޭރުގައި މީހުން ތޮއްޖެހި ހަމަނުޖެހުން ހިނގަން ފަށައިފިއެވެ.

އެއަރޕޯޓު ކައިރިއަށް އެއްވާ މީހުން އަންނަނީ އެއްދުވަހުން އަނެއް ދުވަހަށް އިތުރުވަމުންނެވެ.

އޮގަސްޓު މަހުގެ 15 ވަނަ ދުވަހު ތާލިބާނުން ވެރިކަމަށް އައުމުން އެތައް ހާސް ބަޔަކު ދަނީ ގައުމުން ފުރުމަށް ކާބުލް އެއާޕޯޓަށް ޖަމާވެފައެވެ. މިހާތަނަށް އެމެރިކާގެ އެހީތެރިކަމާއެކު 17،000 މީހުން ފުރުވާލާފައި ވާއިރު، އޭގެ ތެރެއިން 2،500 މީހުންނަކީ އެމެރިކާ ރައްޔިތުންނެވެ. ޖަރުމަނުން ވެސް ވަނީ އަސްކަރީ ފްލައިޓުތަކުގައި 2،500 އަށް ވުރެ ގިނަ މީހުން ގެންގޮސްފައެވެ. އިނގިރޭސި ވިލާތާއި ފްރާންސް އަދި ބެލްޖިއަމް ފަދަ ގައުމުތަކުން ވެސް އަންނަނީ ފްލައިޓުތަކުގައި މީހުން ގެންދިޔުމުގެ މަސައްކަތް ކުރަމުންނެވެ.

ހަނގުރާމަވެރި ބަަޔަކާ ދެކޮޅަށް ހިނގި ހަމަނުޖެހުމެއްގައި ދިން ބަޑީގެ ހަމަލާއެއްގައި އެއަރޕޯޓުގެ ސަލާމަތީ ކަންކަން ބަލަހައްޓަމުން ދިޔަ މީހަކު ވެސް ވަނީ މަރުވެފައެވެ. މަރު ވެފައިވަނީ އަފްޣާން ރައްޔިތެއްކަމަށް ރިޕޯޓުތައް ބުނެއެވެ. ހަނގުރާމަވެރިން ހަމަލާދޭން ފެށުމުން އެއަރޕޯޓުގައި ތިބި އަފްޣާންގެ ސެކިއުރިޓީ ގާޑުންވަނީ ރައްދުގައި ބަޑީގެ ހަމަލާ ދޭން ފަށާފައެވެ.

މި ހާދިސާ ހިނގާފައިވަނީ އެއަރޕޯޓުގެ އުތުރު ގޭޓާ ދިމާއިން ކަމަށް ރިޕޯޓު ކޮށްފައިވެއެވެ.