އެމްޑީޕީގެ އެތެރޭގެ އިންތިޚާބުގައި އަކްރަމަށް ވާދަ ކުރެއްވޭނެކަމަށް ނިންމައިފި
އޭސީސީން އަކްރަމްގެ މައްސަލައެއް ބަލަމުން ނުދާކަމަށް އެ ކޮމިޝަނުން ބުނެފައިވޭ
ހޯރަފުއްޓަށް އެމްޓީސީސީގެ ބޭފުޅުންނާއި، އެ ދާއިރާގެ މެންބަރު ކުރެއްވި ޒިޔާރަތުގައި އަކްރަމް ކަމާލުއްދީން ބައިވެރިވެވަޑައިގަންނަވަނީ
އެމްޑީޕީގެ, ދާއިރާތަކުގެ އިންތިޚާބުގައި ވާދަކުރެއްވުމުގެ ފުރުސަތު އަކްރަމް ކަމާލުއްދީނަށް އެރުވުމަށް އެ ޕާޓީން ނިންމައިފިއެވެ.
އެމްޑީޕީގެ ދާއިރާތަކުގެ އިންތިޚާބަށް ކުރިމަތިލެއްވި ކެންޑިޑޭޓުންގެ ތެރެއިން, ޤައުމީ ހިންގާ ކޮމިޓީގެ ނިންމުމާ އެއްގޮތަށް ޝަރުތު ހަމަވާ ބޭފުޅުން ބެލުމަށް ކަމާ ގުޅުންހުރި އިދާރާތަކަށް ފޮނުވުމުން އޭގެ ތެރެއިން އަކްރަމްގެ މައްސަލައެއް ބަލަމުން އަންނަ ކަމަށް އޭސީސީން ބުނެފައިވާކަން ފާހަގަކޮށް އަކްރަމްއަށް ވާދަ ނުކުރެއްވޭނެ ކަމަށް ޕާޓީން މީގެ ކުރިން އަކްރަމްއަށް އެންގިއެވެ. އަކްރަމަށް އިންތިޚާބުގައި ވާދަކުރެއްވުމުގެ ފުރުސަތު ނާރުވަން ނިންމިއިރު، އޭސީސީން އަކްރަމްގެ މައްސަލައެއް ބަލަމުން ނުދާކަމަށް އެ ކޮމިޝަނުން އަކްރަމަށް ވަނީ އަންގާފައެވެ.
އެއާއެކު އެމްޑީޕީގެ މި ނިންމުން އަލުން މުރާޖަޢާ ކޮށްދެއްވައި, ޕާޓީން ކަނޑައަޅާފައިވާ އުސޫލުތަކާ އެއްގޮތަށް އެމްޑީޕީގެ, ދާއިރާތަކުގެ އިންތިޚާބުގައި ވާދަކުރެއްވުމުގެ ފުރުސަތު ހަމަޖައްސަވައި ދެއްވުމަށް އަކްރަމް ކަމާލުއްދީން އެމްޑީޕީގައި އެދިވަޑައިގެންނެވީ އޯގަސްޓު މަހުގެ 16 ވަނަ ދުވަހުއެވެ. އެމްޑީޕީގެ ޗެއަރ ޕާރސަން ޙަސަން ލަޠީފަށް އެޑްރެސް ކުރައްވައި، އަންގާރަ ދުވަހު އަކްރަމްގެ ފަރާތުން ފޮނުވި ސީޓީގައި މައިގަނޑު 10 ކަމެއް ފާހަގަކުރައްވާފައިވެއެވެ. އަކްރަމް ވިދާޅުވެފައިވަނީ، ޕާޓީގެ ދާއިރާތަކުގެ އިންތިޚާބުގައި ވާދަކުރައްވާ ފަރާތްތަކުގެ ޝަރުތުތައް ޕާޓީގެ އެއްވެސް ގަވާއިދެއްގައި ބަޔާންކޮށްފައި ނުވާކަމަަށެވެ.
މި މައްސަލަ އަކްރަމްގެ ފަރާތުން ހުށައެޅުއްވުމުން ޤައުމީ މަޖިލީހުން އެކުލަވާލި, ދާއިރާތަކުގެ އިންތިޚާބާ ބެހޭ ކޮމިޓީން ވަނީ އަކްރަމަށް ކުރިމަތިލެއްވޭނެކަމަށް ނިންމާފައެވެ. މިކަން އެމްޑީޕީގެ ޤައުމީ ހިންގާ ކޮމިޓީގެ މެމްބަރަކު ވަނީ ރާއްޖެއެމްވީއަށް ކަށަވަރު ކޮށްދެއްވާފައެވެ.
އޭސީސީން 2018ގައި ނެރުނު ލިސްޓެއްގައި ނަން ހިމެނިފައިވާތީ، އެކަމާ ގުޅޭގޮތުން އެކޮމިޝަނަށް ފޮނުވި ސިޓީގެ ޖަވާބުގައި, އަކްރަމްގެ މައްޗަށް ތުހުމަތު ކުރެވޭ ކޮރަޕްޝަންގެ އެއްވެސް މައްސަލައެއް އެކޮމިޝަނުން ބަލަމުން ނުދާކަމަށް އެ ކޮމިޝަނުން ވަނީ އަކްރަމްއަށް އަންގާފައެވެ. އެމްއެމްޕީއާރުސީގެ ޚިޔާނާތާ ގުޅިގެން ތުހުމަތެއްކޮށް އެއްވެސް ތަޙުޤީޤެއް މިހާތަނަށް ހިންގާފައި ނުވާއިރު، އަދި އެއްވެސް ފިޔަވަޅެއް އެޅުމަށް މިހާތަނަށް އޭސީސީން އެއްވެސް މުއައްސަސާއަކަށް ފޮނުވާފައިނުވާއިރު, ވާދަ ނުކުރެވޭނެ ކަމަށް ނިންމި ނިންމުމަކީ ސައްހަ ނިންމުމެއް ނޫންކަމަށް އަކްރަމް ވަނީ އޭރުވެސް ވިދާޅުވެފައެވެ.
ކުރިޔަށް އޮތް ދައުރަށް މާލެ ދާއިރާގެ ރައީސްކަމަށް ކުރިމަތި ލެއްވުމަށް ގަސްތު ކުރައްވާކަން ފާހަގަ ކުރައްވައި އަކްރަމް ވަނީ އެމްޑީޕީގެ މެންބަރުންނާއި ހެޔޮއެދޭ ފަރާތްތަކުން ތާއީދު ކުރެއްވުން އެދިވަޑައިގަންނަވާފައެވެ. ޕްލޭނިންގ މިނިސްޓްރީގެ ސްޓޭޓް މިނިސްޓަރުކަންވެސް ކުރައްވަމުން ގެންދަވާ އަކްރަމްއަކީ މިހާރު މި ހިނގަމުންދާ ދައުރުގައިވެސް މާލޭ ދާއިރާގެ ރައީސްއެވެ.
