ވެލިފިނޮޅު ހިއްކުމުން ތިމާވެއްޓަށް ގެއްލުންވަމުންދާތީ އެކަން ދާއިމީގޮތެއްގައި ހުއްޓުވަން ގޮވާލައިފި
ވެލިގަނޑު އައިލެންޑް ރިސޯޓުގެ ބައެއްގެ ގޮތުގައި ހަދާފައިވާ ވެލިފިނޮޅު ބޮޑުކުރަން ފަޅު ހިއްކުމުގެ ތެރޭގައި އެ ސަރަހައްދުގެ ފަރުތަކަށާއި ހިމާޔަތް ކޮށްފައިވާ މަޑިވަރު ފަޅަށް ގެއްލުންވަމުންދާ ކަަމަށް ރަސް
ވެލިފިނޮޅު ތަރައްގީ ކުރާ މައްސަލަ
އއ. އަތޮޅުގައި އޮންނަ ވެލިގަނޑު އައިލެންޑް ރިސޯޓުން މަޑިވަރު ފަޅުގެ ބައެއް ގަވައިދާ ހިލާފަށް ހިއްކަމުންދާތީ އެކަން ހުއްޓުވައި ދިނުމަށް ގޮވާލައި ރައްޔިތުންގެ މަޖިލީހަށް މައްސަލައެއް ހުށަހަޅާ ބަހުސްކޮށްފިއެވެ.
ކްރައުން ކޮމްޕެނީން ހިންގާ ވެލިގަނޑު އައިލެންޑް ރިސޯޓުގެ ބައެއްގެ ގޮތުގައި ހަދާފައިވާ ވެލިފިނޮޅު ބޮޑުކުރަން ފަޅު ހިއްކުމުގެ ތެރޭގައި އެ ސަރަހައްދުގެ ފަރުތަކަށާއި ހިމާޔަތް ކޮށްފައިވާ މަޑިވަރު ފަޅަށް ގެއްލުންވަމުންދާ ކަަމަށް ރަސްދޫ ކައުންސިލުން ވަނީ ބުނެފައެވެ. އަދި އެކަމާ ގުޅިގެން ރަސްދޫގެ ބަޔަކު މުޒާހަރާކުރަން ފެށުމާ ގުޅިގެން އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ) އިން ވަނީ މިވަގުތަށް އެކަން ހުއްޓުވާފައެވެ.
މިކަން ދާއިމީ ގޮތެއްގައި ހުއްޓުވައިދިނުމަށް ސަރުކާރުގެ ކަމާބެހޭ ފަރާތްތަކަށް ގޮވާލާ މައްސަލަ ހުށަހެޅުއްވީ ތޮއްޑޫ ދާއިރާގެ މެމްބަރ ހަސަން ޝިޔާންއެވެ. މައްސަލަ ހުށަހަޅުއްވަމުން ޝިޔާން ވިދާޅުވީ ރަސްދޫ މަޑިވަރު ސަރަހައްދަކީ ގިނަ ބާވަތްތަކެއްގެ ކަނޑުގެ ދިރުން ލިބިގެންވާ އީޕީއޭ އިން 2018 ވަނަ އަހަރުން ފެށިގެން މަސައްކަތް ކުރަން ފަށާފައިވާ ސަރަހައްދެކެވެ. މިގޮތުން މިސަރަހައްދު ހިމާޔަތްކޮށް މެނޭޖްމަންޓް ޕްލޭނެއްގެ ދަށުން ސަރަހައްދު ބެލެހެއްޓުން އއ ރަސްދޫ ކައުންސިލާ ހަވާލުކުރުމަށް އީޕީއޭ އިން ނިންމައި ރަސްދޫ ކައުންސިލަށް 2018 ވަނަ އަހަރު ވަނީ އެކަން އަންގާފައިކަމަށް ޝިޔާން ވިދާޅުވިއެވެ.
ރަސްދޫ އާއި އެސަރަހައްދުގެ ގިނަ ރަށްރަށުގެ އާންމު ރައްޔިތުން ގެދޮރު އެޅުމާއި އެނޫންވެސް އެކި ބޭނުންތަކަށް ޒަމާނުއްސުރެ އެސަރަހައްދުން ވެލިނަގަމުން ދިޔަ ދިޔުން އެސަރަހައްދު ހިމާޔަތްކުރުމުގެ ސަބަބުން އީޕީއޭން ވަނީ މަނާކޮށްފައި ކަމަށް ޝިޔާން ވިދާޅުވިއެވެ.
ހިމާޔަތްކޮށްފައިވާ މިސަރަހައްދާއި ކައިރިން ފަސް ނަގައި ވެލިފިނޮޅު ނަމުގައި ރަށެއް ހެދުމުގެ މަސައްކަތް ކްރައުން ކޮމްޕެނީގެ ފަރާތުން މިހާރު އަންނަނީ ކުރަމުން ކަމަށް ޝިޔާން ވިދާޅުވިއެވެ. އަދި މިރަށް ހިއްކުމަށް ވެލި ނަގަމުން ގެންދަނީ މީގެކުރިން އީޕީއޭގެ ފަރާތުން އާންމު ރައްޔިތުންނަށް ވެލި ނެގުން މަނާކޮށްފައިވާ ސަރަހައްދުންނެވެ. އަދި މިކަން ކުރިޔަށްދާއިރު އަތޮޅު ކައުންސިލާއި އަދި އެސަރަހައްދުގެ އެއްވެސް ރަށަކާ މަޝްވަރާ އެއްވެސް ވަރަކަށް ކުރެވިފައިނުވުމުގެ އިތުރުން މިކަމަކީ އީޕީއޭއިން ހުއްދަ ލިބިގެން ކުރާކަމެއްކަން އަތޮޅު ކައުންސިލަށް އަދި ސަރަހައްދުގެ އެއްވެސް ރަށަކަށްވެސް ސާފު ނުވާކަމަށް ޝިޔާން ވިދާޅުވިއެވެ.
ޝިޔާން އިތުރަށް ވިދާޅުވީ އެކި ފަހަރު މަތިން ވެލިގަނޑު ރިޒޯޓު މެނޭޖްމަންޓުން ހިމާޔަތް ކުރެވިފައިވާ ސަރަހައްދާއި ކައިރިން ފަސް ނަގައި ހިއްކުމުގެ ސަބަބުން ޒަމާނުއްސުރެ އެސަރަހައްދުގައި އޮންނަ "ކަނޑިފިނޮޅު" މިހާރުވަނީ ނެތިގޮސްފައި ކަމަށެވެ.
މިކަމަކީ މުޅި ސަރަހައްދުގެ އިގްތިޞާދަށް ބޮޑު ގެއްލުމެއް ކުރިމަތިވާނެ ކަމެއްކަމަށް ފެންނާތީ އާއި ހިމާޔަތްކުރެވިފައިވާ ސަރަހައްދެއް ނެތިގޮސްދާނެ ކަމުގެ ބިރާއި ކޮޅެއް މެދެއް ނެތްގޮތަށް ރިޒޯޓްތަކުން ބައުންޑަރީ ހިތުހުރި ގޮތަކަށް ބޮޑުކުރާ ބޮޑުކުރުން ހުއްޓުވުމަށް ސަރުކާރުގެ އިދާރާތަކަށް ގޮވާލާއި މިމައްސަލައަށް ދާއިމީ ހައްލެއް ހޯއްދަވައިދެއްވުން އެދި މިމައްސަލަ ހުށަހަޅުއްވާކަމަށް ޝިޔާން ވިދާޅުވިއެވެ.
މިމައްސަލަ ވަނީ މަޖިލީހަށް ބަލައިގަނެ މެމްބަރުން ބަހުސްކުރައްވާފައެވެ. މި މައްސަލައަށް ބަހުސްކުރެއްވި މެމްބަރުން ވަނީ މިއީ ތިމާވެއްޓަށް ބޮޑެތި ގެއްލުންތަކެއްވަމުން އަންނަ ކަމަކަށްވާތީ މިކަން ހުއްޓުވުމަށް ސަރުކާރުގެ ކަމާބެހޭ ފަރާތްތަކަށް ގޮވާލައްވާފައެވެ.
