"މާހައުލާއި ތިމާވެއްޓަށް ރައްކާތެރިވެގެން ތަރައްގީގެ މަސައްކަތް އަޅުގަނޑުމެންނަށް ކުރެވޭނެތޯ؟"
ރާއްޖޭގައި ގިރަމުންދާ މިންވަރަކީ ކަންބޮޑުވާ މިންވަރަށް އޮތް ކަމެއްތޯ ދެނެގަންނަން ޖެހޭ: ނަޝީދު
ރައްޔިތުންގެ މަޖިލީހުގެ ރައީސް. މުހައްމަދު ނަޝީދު
މާހައުލާއި ތިމާވެއްޓަށް ރައްކާތެރިވެގެން ތަރައްޤީގެ މަސައްކަތް ކުރިއަށް ގެންދެވޭތޯ ބަލަން ޖެހޭ ކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ފާއިތުވި ދުވަސްތަކުގައި އިރުވައި މޫސުމުގެ ހަޅަޖެހިއިރު ރަށްގިރުން އާދަޔާ ޚިލާފަށް އިތުރުވެފައިވާތީ ރައްޔިތުންގެ މަޖިލީހުގެ އެންވަޔަރމަންޓް އެންޑް ކްލައިމެޓް ޗޭންޖް ކޮމިޓީގެ ކުއްލި ބައްދަލުވުމުގައި ވާހަކަދައްކަވަމުން ރައީސް ނަޝީދު ވިދާޅުވީ ހުޅަނގުން އިރުވަޔަށް ވައި ބަދަލުވިއިރު އެ ހަޅައިގައި ދިވެހިރާއްޖޭގެ ރަށްތަކަށް މީގެ ކުރިން ނުކުރާ ބާވަތުގެ އަސަރެއް ނުވަތަ ބަދަލެއް އަތުވެއްޖެކަމަށް އެކި ގޮތްގޮތުން ކޮމިޓީއަށާއި އެ މަނިކުފާނަށްވެސް މަޢުލޫމާތު ލިބިފައިވާ ކަމަށެވެ.
އޮސްޓްރޭލިއާގައި އެނދި އަލިފާންގަނޑަށް އިޝާރާތް ކުރައްވާ ރައީސް ނަޝީދު ވިދާޅުވީ ކޮންމެ އަހަރަކުވެސް އޮސްޓްރޭލިއާގައި އަލިފާން ރޯވެގެން އުޅޭ ޚަބަރު ފެންނަ ކަމަށެވެ. ނަމަވެސް މިއަހަރު އޮސްޓްރޭލިއާގައި ރޯވެ އެނދީ އެއަށްވުރެ މާ ބޮޑުކޮށް ކަމަށެވެ. ރައީސް ނަޝީދު ވިދާޅުވީ ދިވެހި ރާއްޖޭގައި ގިރަމުންދާ މިންވަރަކީ ކަންބޮޑުވާ މިންވަރަށް އޮތް ކަމެއްތޯ ދެނެގަންނަން ޖެހޭ ކަމަށެވެ.
ރައީސް ނަޝީދު އިތުރަށް ވިދާޅުވީ މިކަމަކީ އެއްވެސް ސަރުކާރަކަށް ކުއްލިއަކަށް ޙައްލު ގެނެވެން އޮތް ކަމެއް ނޫން ކަމަށެވެ. އަދި ރަށްގިރުމުގެ ސަބަބުތަކާއި އަދި އެކަންކަން ހިނގާ މިންވަރާއި ގުޅޭގޮތުން ތަހުލީލުކޮށް ހޯދިދާނެކަމަށެވެ. އަދި މިކަމުން އަރައިގަނެވެން ހުރި މަގުތަކަކީ ކޮބައިތޯ ހޯދާ، އެކަންކަމުގެ މައްޗަށް ސިޔާސަތުތައް އެތުރިގެން ދިއުމަކީވެސް ބޭނުންތެރި ކަމެއް ކަމަށް އެމަނިކުފާނު ވިދާޅުވިއެވެ.
ކޮމެޓީގައި ވާހަކަ ދައްކަވަމުން ރައީސް ނަޝީދު ވިދާޅުވީ މި މައްސަލަ އިތުރަށް ބޮޑު ވެއްޖެނަމަ ސަރުކާރަށް އެކަމުގައި ކުރެވޭނެ މާބޮޑު ކަމެއް ނޯންނާނެ ކަމަށެވެ. އަދި އެކަން ފާހަގަކުރައްވާ ރައީސް ނަޝީދު ވިދާޅުވީ މިބާވަތުގެ ކަންކަން ދިމާވުމުން ދިވެހިން ޢަމަލު ކުރާނެ ގޮތާއި ގުޅޭގޮތުންވެސް ވިސްނަން ޖެހޭ ކަމަށެވެ.
އެމަނިކުފާނު ވިދާޅުވީ ތަރައްޤީގެ މަޝްރޫއުތައް ހުއްޓާނީ ކިހާ މިންވަރަކަށްތޯ ބަލަންޖެހޭ ކަމަށެވެ. އަދި ތަރައްޤީގެ ކޮންމެ މަޝްރޫޢެއްވެސް ހިންގަނީ ޤައުމުގެ އުފެއްދުންތެރިކަން އިތުރުކުރަން ކަމަށެވެ.
މި ކޮމިޓީ ބައްދަލުވުމުގައި ފާއިތުވި ދުވަސްތަކުގައި އެކަނިވެސް ރަށްރަށަށް ލިބިފައިވާ ގެއްލުންތައް ފޮޓޯތަކުން ފެނިގެން ގޮސްފައިވެއެވެ.
ކޮމިޓީއާ ހިއްސާކޮށްފައިވާ ބައެއް ރަށްރަށުގެ ތެރޭގައި ބ އަތޮޅުގެ ގިނަ ރަށްރަށާއި، ރ އަތޮޅުގެ ރަށްރަށް ހިމެނެއެވެ. އޭގެއިތުރުން، އައްޑޫ ސިޓީ މީދޫ ފުއްޓަރާއި ދިމާލުން ގިރަމުން އަންނަ ޞަރަޙައްދުގެ ފޮޓޯތައްވެސް ދައްކާލާފައިވާއިރު، މަޖިލީހުގެ ރައީސް ވިދާޅުވީ، އެކަމުގެ ސަބަބުން އައްޑޫ މީދޫ ކުޅިއަށް ލޮނުފެން ވަދެ، ތިމާވެށީގެ ގޮތުން ބޮޑެތި ގެއްލުންތަކެއް ލިބިގެން ދިއުމުގެ ފުރުޞަތު ބޮޑު ކަމަށެވެ. މީގެއިތުރުން ނ ފޮއްދޫއާއި، ގދ ނަޑެއްލާއާއި، ދ ވާނީއާއި، ހއ ވަށަފަރުގެ އިތުރުންވެސް ގިނަ ރަށްރަށުގެ ފޮޓޯތައް ކޮމިޓީގައި ދައްކާލާފައިވެއެވެ.
