ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި ހަތަރު ބިލެއް ބަލައިގަނެ އިތުރަށް ދިރާސާކުރުމަށް ކަމާ ގުޅޭ ކޮމިޓީތަކަށް ފޮނުވައިފިއެވެ.

މީގެތެރެއިން ދެ ބިލަކީ ލާމަރުކަޒީ އުސޫލުން ދިވެހިރާއްޖޭގެ އިދާރީ ދާއިރާތައް ހިންގުމުގެ ގާނޫނަށް ގެނައި ބަދަލުތަކާއެކު ގާނޫނުތަކަށް ގެނައުމަށް ހުށަހަޅާފައިވާ އިސްލާހުގެ ދެ ބިލެވެ. އޭގެތެރެއިން އެއް ބިލަކީ ސަރުކާރުގެ ފަރާތުން އިހަވަންދޫ ދާއިރާގެ މެމްބަރު މުހައްމަދު ޝިފާއު ހުށަހަޅުއްވާފައިވާ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާ ބެހޭ ގާނޫނަށް އިސްލާހު ގެނައުމުގެ ބިލެވެ. މިބިލް ވޯޓުގައި ބައިވެރިވެވަޑައިގެންނެވި 44 މެމްބަރުންގެ އިއްތިފާގުން ވަނީ މަޖިލީހަށް ބަލައިގަތުމަށް ފާސްވެފައެވެ. އަދި ބިލް ދިރާސާކުރުމަށް ފޮނުވާފައިވަނީ ލާމަރުކަޒީ ކޮމިޓީއަށެވެ.

ލާމަރުކަޒީ ގާނޫނާ ގުޅިގެން ގާނޫނުތަކަށް ބަދަލު ގެނައުމަށް ސަރުކާރުގެ ފަރާތުން ދާންދޫ ދާއިރާގެ މެމްބަރު ޔައުގޫބް އަބްދުﷲ ހުށަހަޅުއްވާފައިވާ ދައުލަތުގެ މާލިއްޔަތުގެ ގާނޫނަށް އިސްލާހު ގެނައުމުގެ ބިލް ވަނީ 45 މެމްބަރުންގެ އިއްތިފާގުން މަޖިލީހަށް ބަލައިގެންފައެވެ. މިބިލް ދިރާސާކުރުމަށް ފޮނުވާފައިވަނީ ލާމަރުކަޒީ ކޮމިޓީ އަދި މާލިއްޔަތު ކޮމިޓީގެ ޖޮއިންޓް ކޮމިޓީއަށެވެ.

ސަރުކާރުގެ ފަރާތުން ހެންވޭރު އުތުރު ދާއިރާގެ މެމްބަރު އިބްރާހީމް މުއިއްޒު ހުށަހަޅުއްވާފައިވާ އުފަންވުމާއި މަރުވުން ރަޖިސްޓްރީކުރުމާއި އުފަންދުވަހުގެ ސެޓްފިކެޓް އަދި ދިވެހި ރައްޔިތެއްކަން އަންގައިދޭ ކާޑު ހެއްދުމާ ބެހޭ ބިލް މަޖިލީހަށް ބަލައިގެންފައިވަނީ ވޯޓުގައި ބައިވެރިވެވަޑައިގެންނެވި 45 މެމްބަރުންގެ އިއްތިފާގުންނެވެ. މިބިލް ދިރާސާކުރުމަށް ފޮނުވާފައިވަނީ ގައުމީ ތަރައްޤީ އާއި ތަރިކައިގެ ކޮމިޓީ އަދި އިޖުތިމާއީ ކޮމިޓީގެ ޖޮއިންޓް ކޮމިޓީ އަށެވެ. މި ބިލަކީ ދިވެހިރާއްޖޭގައި އުފަންވާ ކުދިންގެ އުފަންވުން ރަޖިސްޓްރީކުރުމާ ގުޅޭ އުސޫލުތަކާއި ދިވެހިރާއްޖޭގައި އުފަންވާ ކުދިންނަށް އުފަންދުވަހުގެ ސެޓްފިކެޓާއި ދިވެހި ރައްޔިތެއްކަން އަންގައިދޭ ކާޑު ހައްދައިދިނުމާ ގުޅޭ އުސޫލުތަކާއި ރާއްޖޭގައި މަރުވާ މީހުންގެ މަރު ސާބިތުކުރުމާއި ރާއްޖޭގައި މަރުވާ މީހުންގެ މަރުވުން ރަޖިސްޓްރީކުރުމާ ގުޅޭ އުސޫލުތައް ބަޔާންކުރުމަށްޓަކައި ގާއިމުކުރަންޖެހޭ ގާނޫނީ އޮނިގަނޑު ގާއިމުކުރުމަށް ހުށަހަޅާފައިވާ ބިލެކެވެ.

ސަރުކާރުގެ ފަރާތުން ކަނޑިތީމު ދާއިރާގެ މެމްބަރު އަބްދުﷲ ޝަހީމް އަބްދުލްހަކީމް ހުށަހަޅުއްވާފައިވާ ޖަނަވާރުގެ ސިއްހަތާ ބެހޭ ބިލް ބަލައިގެންފައިވަނީ ވޯޓުގައި ބައިވެރިވެވަޑައިގެންނެވި 44 މެމްބަރުންގެ އިއްތިފާގުންނެވެ. މި ބިލް ދިރާސާކުރުމަށް ފޮނުވާފައިވަނީ އިޖުތިމާއީ ކޮމިޓީއަށެވެ.

މި ބިލަކީ ރާއްޖެއަށް ޖަނަވާރާއި ޖަނަވާރުގެ އުފެއްދުންތަކާއި ޖަނަވާރުގެ ބޭހާއި ކާނާއާއި އެނޫން ވެސް ތަކެތި އިމްޕޯޓުކުރުމާއި އެކްސްޕޯޓުކުރުމާ ގުޅޭ އުސޫލުތައް ކަނޑައެޅުމާއި ރާއްޖޭގައި ދެމެހެއްޓެނެވި އަދި ރައްކާތެރި ގޮތެއްގައި ޖަނަވާރު ގެންގުޅުމާބެހޭ އުސޫލުތަކުގެ ބިލެކެވެ.