ފުރަތަމަ މެޗުން ޗެމްޕިއަން އިންޓައަށް ފަސޭހަ މޮޅެއް

މި ސީޒަނުގެ އިޓާލިއަން ލީގުގައި ކުޅުނު ފުރަތަމަ މެޗުން ޖެނޯއާ އަތުން ފަސޭހަކަމާއެކު އެންމެ ފަހުގެ ޗެމްޕިއަން އިންޓަ މިލާން މޮޅުވެއްޖެއެވެ.

އަމިއްލަ ދަނޑުގައި ކުޅުނު މެޗުން އިންޓަ މޮޅުވީ 4-0 ގެ ނަތީޖާއަކުންނެވެ.

މި މެޗުގައި އިންޓައިން މޮޅު ކުޅުމެއް ދެއްކިއިރު، މެޗުގެ ހަވަނަ މިނެޓުގައި އެ ޓީމުން ވަނީ ލީޑު ނަގާފައެވެ. ހަކަން ޗަޅަނޮގްލޫ ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ މިލާން ސްކްރިނިއާއެވެ. އަދި އޭގެ އަށް މިނެޓު ފަހުން އޭރިއާ ބޭރުން ފޮނުވާލި ބާރު ހަމަލާއަކުން ޗަޅަނޮގްލޫ ވަނީ ލަނޑެއް ޖަހައި، އިންޓަގެ ލީޑު ފުޅާކޮށްދީފައެވެ.

މެޗުގެ ދެވަނަ ހާފުގައިވެސް އިންޓައިން ގިނަ ހަމަލާތަކެއް އުފެއްދިއިރު، އެ ޓީމުގެ ތިންވަނަ ލަނޑު ފެނިގެންގޮސްފައިވަނީ މެޗުގެ 74 ވަނަ މިނެޓުގައެވެ. ނިކޯލޯ ބަރެއްލާގެ އެހީއާއެކު މި ލަނޑު އެ ޓީމަށް ކާމިޔާބުކޮށްދިނީ އާޓޫރޯ ވިޑާލެވެ. އަދި މެޗު ނިމެން ތިން މިނެޓަށް ވެފައި ވަނިކޮށް ނިޑާލް ހުރަސްކޮށްދިން ބޯޅައަކުން އެޑިން ޒެކޯ ވަނީ އިންޓަގެ ހަތަރުވަނަ ލަނޑު ކާމިޔާބުކޮށްދީފައެވެ. މިއީ މި ފަހަރުގެ ޓްރާންސްފާގައި ރޯމާ ދޫކޮށް އިންޓައާ ގުޅުނު ޒެކޯ އެ ޓީމަށް ކާމިޔާބުކޮށްދިން ފުރަތަމަ ލަނޑެވެ.

މި މޮޅާއެކު އިންޓައިން މި ސީޒަނުގެ އިޓާލިއަން ލީގުގެ ފެށުން ރަނގަޅުކުރިއިރު، މިއީ އައު ކޯޗު ސިމޯން އިންޒާގީގެ އިރުޝާދުގެ ދަށުން ލީގުގައި އިންޓައިން ކުޅުނު ފުރަތަމަ މެޗެވެ. މިދިޔަ ސީޒަނުގައި އިޓާލިއަން ލީގުގެ ޗެމްޕިއަންކަން އިންޓައަށް ހޯދައިދިނުމަށްފަހު އެ ޓީމުގެ ކޯޗުގެ މަގާމުން އެންޓޯނިއޯ ކޮންޓޭ ވަނީ ވަކިވެފައެވެ.

ލީގުގައި އިންޓައިން ދެން މެޗެއް ކުޅޭނީ އަންނަ ހުކުރު ދުވަހެވެ. އެ ދުވަހު ރަށުން ބޭރުގައި އިންޓަ ނުކުންނާނީ ވެރޯނާއާ ދެކޮޅަށެވެ.