ބެންގަލޫރާއި ބަޝުންދަރާގެ ކުރިމަތިލުން އެއްވަރު

އޭއެފްސީ ކަޕުގެ ދެކުނު އޭޝިއާއަށް ޚާއްސަ ގްރޫޕުގައި ކުޅުނު ދެވަނަ މެޗުން އިންޑިއާގެ ބެންގަލޫރު އެފްސީ އާއި ބަންގްލަދޭޝްގެ ޗެމްޕިއަން ބަޝުންދަރާ ކިންގްސް ބައްދަލުކުރި މެޗު އެއްވަރުވެއްޖެއެވެ.

ހޮނިހިރު ދުވަހުގެ ހަވީރު ގައުމީ ފުޓްބޯޅަ ދަނޑުގައި ކުޅުނު މި މެޗު އެއްވަރުވީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.

މި މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މެޗުގެ ކުރީކޮޅު ބަޝުންދަރާގެ ފޯވާޑް ރޮބްސަބް ޑަ ސިލްވާއަށް ވަނީ ލަނޑު ޖަހަން ހުސް ފުރުސަތެއް ލިބި ބޭކާރުވެފައެވެ. އެގޮތުން އޭރިއާ ބޭރުގައި ހުރެ އޭނާ ފޮނުވާލި ހަމަލާ ދިޔައީ ގޯލާ އަމާޒުނުވެ ބޭރަށެވެ. އޭގެ ފަހުން މެޗުގެ 18 ވަނަ މިނެޓުގައި ބެންގަލޫރުގެ ފޯވާޑް ބިޑިޔަޝަގަރު ސިންހަށް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. އަދި އޭގެ ދެ މިނެޓު ފަހުން ބެންގަލޫރުގެ ބްރެޒިލް ފޯވާޑް ކްލޭޓަން ސިލްވާއަށްވެސް ލަނޑު ޖަހަން ރަނގަޅު ފުރުސަތެއް ލިބިފައެވެ.

މި މެޗުގެ ދެވަނަ ހާފުގައި ބަޝުންދަރާއިން ކުރިއަށް ޖެހި މެޗުގެ ކޮންޓްރޯލް ނެގިއިރު، މެޗުގެ 55 ވަނަ މިނެޓުގައި އޭރިއާ ތެރެއިން ރޮބީނިއޯ ފޮނުވާލި ނުރައްކާތެރި ހަމަލާގެ ހުރަހަކަށްވީ ބެންގަލޫރުގެ ގޯލްކީޕަރު ގްރުޕްރީތު ސިންގް ސަންދޫއެވެ. އަދި މެޗުގެ 73 ވަނަ މިނެޓުގައި ބެންގަލޫރުގެ ބްރެޒިލް ޑިފެންޑަރު އެލަން ކޮސްޓާ ބޮލުން ފޮނުވާލި ހަމަލާއެއް ވަނީ ގޯލުގެ ހުރަސް ދަނޑިއަށް އަމާޒުވެފައެވެ.

އޭއެފްސީ ކަޕުގެ ގްރޫޕް ޑީގައި ބެންގަލޫރާއި ބަޝުންދަރާ ބައްދަލުކުރި މެޗު އެއްވަރުވިއިރު، މި މުބާރާތުގައި ކުޅުނު ފުރަތަމަ މެޗުން ބެންގަލޫރު ވަނީ އޭޓީކޭ މޯހަން ބަގާން އަތުން 2-0 ގެ ނަތީޖާއަކުން ބަލިވެފައެވެ. އަދި ގްރޫޕުގެ ފުރަތަމަ މެޗުގައި ބަޝުންދަރާ ވަނީ ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުގެ މައްޗަށް 2-0 ގެ ނަތީޖާއަކުން ކުރި ހޯދާފައެވެ.

ގްރޫޕް ސްޓޭޖުގައި ބެންގަލޫރާއި ބަޝުންދަރާއިން މިހާތަނަށް ދެ މެޗު ކުޅެފައިވާއިރު، މި ވަގުތު ތާވަލުގެ އެއްވަނައިގައި އޮތީ ބަޝުންދަރާއެވެ. އެ ޓީމަށް ވަނީ ކުޅުނު ދެ މެޗުން ހަތަރު ޕޮއިންޓް ލިބިފައެވެ. ދެވަނައިގައި އޮތް މޯހަން ބަގާނަށް އެއް މެޗުން ތިން ޕޮއިންޓް ލިބިފައިވާއިރު، ތިންވަނައިގައި އޮތް ބެންގަލޫރަށް ދެ މެޗުން ލިބިފައިވަނީ އެންމެ ޕޮއިންޓެކެވެ. އަދި ތާވަލުގެ ފުލުގައި މާޒިޔާ އޮތީ ޕޮއިންޓެއް ނުލިބިއެވެ.