މުލިއާގެ ގޮއްވާލާނެ ކަމަށް ބުނެ އިންޒާރުދިން މީހާ ދޫކޮށްލައިފި

މުލިއާގެ ގޮއްވާލާނެ ކަމަށް ބުނެ އިންޒާރުދިން މީހާ ބަންދުން ދޫކޮށްލައިފިއެވެ.

ރައީސުލްޖުމްހޫރިއްޔާ ދިރިއުޅުއްވާ ރަސްމީގެކޮޅު، މުލިއާގެ ކައިރިއަށްގޮސް، އެތަން ގޮއްވާލާނެކަމަށް ބުނެ އިންޒާރުދިން ދެ މީހުން ހައްޔަރު ކޮށްފައިވަނީ ޖުލައި މަހުގެ 9 ވަނަ ދުވަހުއެވެ.

މުލީއާގެ ކައިރިއަށްގޮސް މި ދެ މީހުން ވަނީ އެ މީހުން އެ ވަގުތު ގެންގުޅުނު ފޮށިގަނޑެއްގައި ބޮމެއް އޮތްކަމަށް ބުނެ އިންޒާރުދީފައެވެ. އަދި އެ ތަން ގޮއްވާލާނެކަމަށް ބުނުމާއެކު ސަލާމަތީ ބާރުތަކުންވަނީ އެ މީހުން ހައްޔަރުކޮށްފައެވެ. އެންމެ ފުރަތަމަ މި ދެ މީހުން ހިފެހެއްޓީ މުލިއާގޭގެ ސަލާމަތީ ކަންކަން ބަލަހައްޓަން ތިބި ސިފައިންނެވެ. ފުލުހުންގެ ޚާއްސަ ޓީމަކުންވަނީ އެ ސަރަހައްދަށްގޮސް، އެމީހުން ގެންގުޅުނު ފޮށިގަނޑާއި އެމީހުން ވެސް ބަލައި ފާސްކޮށް ދެ މީހުން ހައްޔަރުކޮށްފައެވެ.

މި މައްސަލައިގައި ހައްޔަރު ކުރި 2 މީހުންގެ ތެރެއިން ފުރަތަމަ މީހާ 9 ޖުލައި ވީ ހުކުރު ދުވަހުގެ ވަގުތެއްގައި ވަނީ ދޫކޮށްލާފައެވެ. ފޮށިގަނޑުގައި ބޮމެއް އޮތްކަމަށް ބުނި މީހާ ފުލުހުން ދޫކޮށްލާފައިވަނީ މިމަހުގެ 18 ވީ ބުދަ ދުވަހުއެވެ. އެއީ އެމީހާގެ ބަންދުގެ މުއްދަތު ތިން ފަހަރެއްގެ މަތިން އިތުރުކުރުމަށްފަހުއެވެ.

ފުލުހުން ބުނީ އޭނާގެ ބަންދުގެ މުއްދަތު ހަމަވުމާ އެކު ކޯޓުން އޭނާ ދޫކޮށްލާފައިވަނީ, އެމީހުންގެ މައްޗަށް ދަޢުވާ ނުކުރުމަށް ޕްރޮސެކިއުޓަރ ޖެނެރަލްގެ އޮފީހުން ނިންމުމުން ކަމަށެވެ.

މި މައްސަލާގައި ހައްޔަރުކުރި ދެ މީހުންނަކީ ވެސް މަސްތުވާތަކެތީގެ ރެކޯޑް އޮންނަ ދެ މީހުންނެވެ.

މިމީހާ ބަންދުން ދޫކޮށްލާފައިވާއިރު، މުލިއާގޭގެ ގޭޓް ގޮއްވާލާނެކަމުގެ އިންޒާރު މެއި މަހުގެ 30 ވަނަ ދުވަހުގެ ރޭ ދީފައިވާ ކަމަށް ރާއްޖެއެމްވީއަށް އިތުބާރު ހުރި ފަރާތަކުން ކަށަވަރުކޮށްދީފައިވެއެވެ. އަދި އެމައުލޫމާތު ލިބުމާއެކު މުލިއާގޭގެ ސެކިއުރިޓީ ވަރުގަދަ ކޮށް އެސަރަހައްދު މޮނިޓަރ ކުރުމުގައި އަބަދުވެސް ސިފައިން ދަނީ ހަރަކާތްތެރިވަމުންނެވެ.