ކުރީގެ ރައީސް އަބްދުﷲ ޔާމީންގެ މައްޗަށް ދައުލަތުން އުފުލާފައިވާ ދެ ދައުވާއެއްގެ ޝަރީއަތުގެ އަޑުއެހުމެއް ބޭއްވުމަށް އާދީއްތަ ދުވަހަށް ކްރިމިނަލް ކޯޓުން ތާވަލު ކޮށްފިއެވެ.
ދެދައުވާގެ ޝަރީއަތް ވެސް އާދީއްތަ ދުވަހު ހެނދުނު 09:00ށް ތާވަލް ކޮށްފައިވާއިރު މި އަޑުއެހުމަކީ ޔާމީންގެ މައްޗަށް ދައުލަތުން އުފުލާފައިވާ ރިޝަވަތު ގަބޫލުކުރުމުގެ ދައުވާ އަކާއި މަނީ ލޯންޑްރިންގެ ދައުވާއެއްގެ ޝަރީއަތެކެވެ.
މި މައްސަލައާއި ގުޅިގެން އެންމެ ފަހުން ބޭއްވި އަޑުއެހުމުުގައި ދައުލަތުން 86 ހެއްކެއް ހުށަހެޅިއެވެ. މީގެތެރޭގައި ސިޓީތަކާއި، ޗެކްތަކާއި، ފައިސާ ޖަމާކޮށްފައިވާ ކަމުގެ ރަސީދު ވެސް ހިމެނެއެވެ. ދެ ދައުވާއަށް ވެސް ހުރީ އެއް ހެކިތަކެއް ކަމަށް ދައުލަތުން ފާހަގަކުރިއެވެ.
ދިފާއުންވެސް ހުށަހެޅީ ދެ ދައުވާއަށް އެއް ހެކިތަކެކެވެ. ދިފާއުން ވެސް ވަނީ ހެކީގެ ގޮތުގައި ކުރީގެ ބަޔާންތަކާއި ފައިސާގެ ރަސީދުތައް ވެސް ހުށަހަޅާފައެވެ.
އާދީއްތަ ދުވަހުގެ އަޑު އެހުން ފެށުމުގެ ކުރިން ދިފާއުންވަނީ، މި ދައުވާ ޖިނާއީ އަމަލެއްގެ މައްޗަށް ބިނާކޮށްފައި އޮތީ، ޖިނާއީ އަމަލެއް ސާބިތުވާތީ ނޫން ކަމަށް ބުނެފައެވެ. އަދި މި މައްސަލާގައި ދިފާއުން އެދުނު ލިޔުންތައް ނުލިބޭކަމަށް ވެސް ބުންޏެވެ. މިކަމާ ގުޅިގެން ދައުލަތުން ބުނީ، ދިފާއުން އެދިފައިވާ ލިޔުންތަކަކީ، ޖެނުއަރީ މަހުގެ 7 ވަނަ ދުވަހު ބޭއްވި އަޑުއެހުމުގައި ގޮތެއް ނިމިފައިވާ ލިޔުންތަކެއް ކަމަށެވެ. އެގޮތުން އެއީ، ހިއްސާ ނުކުރެވޭނެ ލިޔުންތަކެއްކަމާއި، އޭގެ ސަބަބުތައް ވެސް ބަޔާންކޮށްފައިވާނެކަން ދައުލަތުން ފާހަގަކުރިއެވެ. ދައުލަތުން ބުނީ ދިފާއުން މަސައްކަތްކުރަނީ ޝަރިއަތް ކުރިއަށް ގެންދިޔުން މަޑު ޖެއްސުމަށް ކަމަށެވެ.
މިކަމާ ގުޅިގެން މައްސަލަ ބައްލަވާ އިސް ގާޒީ އަހުމަދު ޝަކީލް ވިދާޅުވީ، ހެކި ހޯދުމަށް ހުށަހަޅާން ވަކި އުސޫލެއް އޮންނައިރު ދިފާއުން އެދިފައިވަނީ އެ އުސޫލުގެ ތެރެއިން ނޫން ކަމަށެވެ. އެހެން ކަމުން އެ ހެކިތައް ދިފާއާ ހިއްސާ ކުރުމުގެ އަމުރެއް ނެރެދިނުމުގެ ތަނެއް ނެތް ކަމަށެވެ. އަދި އޮންނަ އިޖުރާއަތްތަކުގެ ތެރެއިން ހެކި ހޯދުމަށް ހުށަހަޅާ ފޯމް ހުށަހެޅުމުން ދެން އެކަން ކުރިއަށްދާނެކަން ގާޒީ ފާހަގަކުރެއްވިއެވެ.
ދައުލަތާއި ދިފާއުން ވެސް ހެކި ހުށަހެޅުމަށްފަހު އިތުރު ކަމެއް ހުށަހަޅަން ނެތުމުން އަޑުއެހުން ނިންމާލާފައިވަނީ، ދިފާއުން އެދުނު ގޮތަށް ދައުލަތުން ހުށަހަޅާފައިވާ ލިޔެކިޔުންތައް ހޯދުމަށް އޮންނަ އިޖުރާއަތުގެ ތެރެއިން ފޯމް ހުށަހަޅައިގެން ހެކި ހޯދުމަށް 3 ދުވަސް ވެސް ދިނުމަށްފަހުއެވެ.
މި މައްސަލައިގައި ރައީސް ޔާމީންއާއެކު މަނީ ލޯންޑަރ ކުރުމުގައި އުޅުއްވިކަމުގެ ތުހުމަތުގައި އިތުރު ފަރާތްތަކެއްގެ މައްޗަށް ވެސް ދަޢުވާކޮށްފައިވާއިރު، އޭގެ ތެރޭގައި އެ މަނިކުފާނުގެ އަރިސް ބޭފުޅެއް ކަމުގައިވާ ވިޔަފާރިވެރިޔާ އަދި މީދޫ ދާއިރާގެ މެމްބަރު އަހުމަދު ސިޔާމްގެ މަސްލަޙަތު އޮންނަ ދެ ކުންފުންޏަކާއި، ރައީސް ޔާމީންގެ އަރިސް ބޭފުޅެއް ކަމަށްވާ، މއ. ކުރިކީލަހިޔާ، އަހުމަދު ކްރިކް ރިޒާ ހިމެނެއެވެ.
މި މައްސަލައިގެ ދައުވާތަކުގައި މައިގަނޑުގޮތެއްގައި ބުނެފައިވަނީ ރ. ފުއްގިރި ކުއްޔަށް ދޫކުރުމުގެ މުޢާމަލާތާ ގުޅިގެން ރައީސް ޔާމީން ރިޝްވަތުގެ ފައިސާގެ ގޮތުގައި ހޯއްދެވި، 1،117،000 (އެއްމިލިއަން އެއްލައްކަ ސަތާރަހާސް) ޑޮލަރު ކްރިކް ރިޒާ މެދުވެރިކޮށް އަދި ސަން ކޮންސްޓްރަކްޝަން އެންޑް އިންޖިނިއަރިންގ ޕްރައިވެޓް ލިމިޓެޑާއި، ސަން އިންވެސްޓްމަންޓް ޕްރައިވެޓް ލިމިޓެޑް ބޭނުންކޮށްގެން އެ ފައިސާ މަނީލޯންޑަރ ކުރުމަށްޓަކައި ފައިސަލާކޮށްފައިވާ ކަމަށެވެ.
އެމްއެމްޕީއާރްސީ މައްސަލާގައި ރައީސް ޔާމީން މިހާރުވެސް 5 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާއިރު އެމަނިކުފާނު މިހާރު ހުންނެވީ ވަގުތީ ގޮތުން ގޭ ބަންދުގައެވެ.
