ބީއެމްއެލް ކޮމިއުނިޓީ ފަންޑުގެ އެހީގައި ގއ.ގެމަނަފުށީގައި ބީޓެކް ކްލާސްރޫމެއް ތައްޔާރުކޮށްފިއެވެ.
ބީއެމްއެލުން ބުނީ މި ކްލާސްރޫމް ހަދާފައިވަނީ ގއ.ގެމަނަފުށީ ސްކޫލްގައި ކަމަށެވެ. މިއީ ދަރިވަރުން ހޮސްޕިޓަލިޓީ ޞިނާޢަތުގެ މަސައްކަތްތައް ދަސްކުރުމުގައި ޢަމަލީ ތަޖުރިބާ ހޯދުމުގެ ފުރުސަތު ފަހިކޮށްދިނުމުގެ ގޮތުން ބީއެމްއެލްގެ ކޮމިއުނިޓީގެ ފަންޑުގެ އެހީއާއެކު, ދިވެހި މަސްވެރިންގެ ޖަމްޢިއްޔާއިން ތަރައްޤީކުރި ތަނެއްކަމަށް ބީއެމްއެލްއިން ބުނެއެވެ. މި މަޝްރޫޢުގެ ދަށުން, ބީޓެކް ކިޔަވާ ދަރިވަރުންނަށް, ޚިދުމަތުގެ ދާއިރާގެ މަސައްކަތްތައް ޢަމަލީ ގޮތުން ތަޖުރިބާ ހޯދޭނެއެވެ. މި ކްލާސްރޫމުގެ އެހީގައި ހޮސްޕިޓަލިޓީ ދާއިރާގައި މަސައްކަތަށް ނުކުންނަ ދަރިވަރުންނަށް, ކަސްޓަމަރުންނަށް ޚިދުމަތް ދިނުމާއި ކެއްކުމުގެ އަސާސީ ހުނަރު ދަސްކުރުންފަދަ ކަންކަމުގެ ޢަމަލީ ތަޖުރިބާ ހޯދޭނެކަމަށް ބީއެމްއެލްއިން ބުނެއެވެ.
"އަހަރެންގެ ބޭންކް" ކޮމިއުނިޓީ ފަންޑަށް ހުށަހަޅާ ޕްރޮޕޯސަލްތަކަކީ ހިލޭ ސާބަހަށް ކުރާ މަސައްކަތްތަކާއި ތަޢުލީމާއި ކުޅިވަރު ހަރަކާތްތަކުގެ އިތުރުން, ތިމާވެށި ޙިމާޔަތްކުރުން ފަދަ ކަންކަމަށް އަމާޒުކޮށްގެން ހުށަހެޅޭ ޕްރޮޕޯސަލްތަކެކެވެ.
