އެނދުގެ އެއްފަޅި ވިޔަސް ހެޔޮ...

"ހަތަރު ކޮޓަރިއަކަށް ބުކިން ހައްދައިގެން ރާއްޖެއަށް އައި އިންޑިޔާގެ 189 މީހަކު އަނބުރާ ފޮނުވާލުމުގެ މަސައްކަތް ފަށައިފިއެވެ."

"ފޭކް ބުކިންގ ހުއްޓުވުމަށް އިތުރު ފިޔަވަޅުތަކެއް އަޅަން ފަށާފައިވާކަމަށް އިމިގްރޭޝަން ކޮންޓްރޯލަރ މުޙައްމަދު އަޙުމަދު ޙުސައިން (ޙަނަފީ) ވިދާޅުވެއްޖެއެވެ."

"ހުއްދަ ނެތް ތަންތަނުގައި ތިބި ފަތުރުވެރިން ހުއްދަ ދީފައިވާ ތަންތަނަށް ބަދަލުކުރުމުގެ މަސައްކަތް ކުރަމުންދާކަމަށް ޓޫރިޒަމް މިނިސްޓްރީން ބުނެފިއެވެ."

"ހުއްދަ ނެތި ތަންތަނުގައި ޓޫރިސްޓުން ބޭތިއްބުމަކީ ޓޫރިޒަމެއްނޫން ކަމަށާއި، އެއީ އިންސާނީ ވަގުފާރި ކަމަށް ޓޫރިޒަމް މިނިސްޓަރ ޑރ. ޢަބްދުﷲ މަޢުޞޫމް ވިދާޅުވެއްޖެއެވެ."

މިއީ މިހާރަކަށް އައިސް ރާއްޖޭގެ އިޤްތިޞާދީ ޙާލަތާއި ފަތުރުވެރިކަމާ ގުޅިގެން ނޫސްތަކުގެ ފަލަ ސުރުޚީތަކުން އިވެމުންދާ ޚަބަރުތަކެވެ. ކޮވިޑުގެ ޙާލަތުގައި ރާއްޖެ އައީ އިޤްތިޞާދީ ރޭހުގައި ރާއްޖޭގެ ފެންވަރުން ރަނގަޅު ކާމިޔާބީތަކެއް ހޯދަމުންނެވެ.

ކޮވިޑާ ގުޅިގެން ބޯޑަރު ބަންދުކޮށްފައި އޮތުމަށްފަހު މިދިޔަ އަހަރުގެ ޖުލައި މަހުގެ 15 ވަނަ ދުވަހު ރާއްޖޭގެ ބޯޑަރު ހުޅުވާލުމަށް ސަރުކާރުން ނިންމި ނިންމުމާއެކު، ސަރަޙައްދީ ޤައުމުތަކުގެ ތެރެއިންވެސް ފަތުރުވެރިކަން އެންމެ ރަނގަޅު އެއް ޤައުމަކަށް ރާއްޖެ ވެގެން ދިޔައެވެ. އޭރު ރާއްޖެއާ ގުޅުވައި އިވެމުން ދިޔަ ޚަބަރުތަކަކީ, ބޯޑަރު ހުޅުވާލަން ނިންމި "ރިސްކީ" ނިންމުމާއެކު ރާއްޖެއިން ހޯދި ކާމިޔާބީގެ ވާހަކައެވެ. ދުވަހެއް ދުވަހަކަށް ފަތުރުވެރިކަން އާރޯވަމުން އަންނަ ވާހަކައެވެ. ރާއްޖެފަދަ ކުޑަ ޤައުމަކާ އަޅާބަލާއިރު އިޤްތިޞާދީ ގޮތުން, ސަރުކާރުން ބޭނުންވި "އިކޮނޮމިކް ބޫމް" ފެންނަމުންދާ ވާހަކައެވެ.

އެންމެ ފަހުން އެ ވާހަކަތައް ދުނިޔޭގެ ނޫސްތަކުގެ ފަލަ ސުރުޚީއަށްވެސް އެރީއެވެ. ފަތުރުވެރިކަމުގެ ރައްކާތެރި މަންޒިލެއްގެ ގޮތުގައި ކޮވިޑުގެ ތެރޭގައިވެސް ރާއްޖެ އެތައް ގުނައަކަށް މަޤްބޫލުވެގެން ދިޔައީއެވެ. ބޭރުގެ އެކި ފަންނާނުންވެސް ކޮވިޑުގެ ޙާލަތުގައި ސިކުނޑިއަށް ލުއެއް ދިނުމަށް އަންނަ މަންޒިލަކަށް ރާއްޖެ ވެގެން ދިޔައީ ސަރަޙައްދީ އެތައް ޤައުމެއްގެ ބޯޑަރު ބަންދުކޮށްފައި އޮއްވައެވެ.

މިހާރުގެ އަދަދުތަކަށް ބަލާއިރުވެސް, ކޮވިޑުގެ ޙާލަތުގެ ކުރިން ރާއްޖެއަށް އައި އަދަދަށްވުރެ ގިނައިން ފަތުރުވެރިން އެބަ އާދެއެވެ. އެއީވެސް ރާއްޖެއަށް މީގެ ކުރިން އެންމެ ގިނައިން ފަތުރުވެރިން އަންނަމުން ދިޔަ މާރކެޓްތައް ނުހިމަނައެވެ. ޗައިނާ ފަދަ ޤައުމުތަކުން އައި އެތައް ލައްކަ ފަތުރުވެރިންނެއް ނުހިމަނާވެސް, އާންމު ޙާލަތުގައި އަންނަ މިންވަރަށް ފަތުރުވެރިން އައުމަކީ އުފާވެރި ސިގްނަލެކެވެ. ނަމަވެސް މިކަމަށް މިއަދު ނުރައްކަލުގެ ބޮޑު ހިޔަންޏެއް އެޅިފައިވާ މަންޒަރު މިދަނީ ފެންނަމުންނެވެ. ދެންމެ ފާހަގަކޮށްލި ސުރުޚީތަކަކީ އޭގެ ކުޑަ މިންވަރެކެވެ.

އުސޫލުތަކާ ޚިލާފަށް ގިނަ އަދަދެއްގެ ފަތުރުވެރިން ރާއްޖޭގައި ޗުއްޓީ ހޭދަކުރަމުންދާ ކަމުގެ މައުލޫމާތު ލިބެމުންދާތީ, މިނިސްޓްރީން މިހާރު ވަނީ ޚާއްސަ އިންސްޕެކްޝަނެއް ފަށާފައެވެ. އޮޅުވާލައިގެން ސައްހަ ނޫން ބުކިންތަކެއް ދިނުމުގެ ސަބަބުން މާލޭގައި ތާށިވި 27 ފަތުރުވެރިއަކު ސަރުކާރުގެ ބެލުމުގެ ދަށުގައި މިވަގުތުވެސް އެބަތިއްބެވެ. އޭގެ ތެރޭގައި ގިނަ އަދަދެއްގެ ކުޑަކުދިންވެސް ހިމެނޭއިރު، އެމީހުންނަށް އޮޅުވާލައިގެން ރާއްޖެއަށް ގެނައި މީހާ މިހާރު ހައްޔަރު ކޮށްފައިވާ ކަމަށް ވެއެވެ.

ދެން މީހުންގެ ސަމާލުކަން ދަމައިގަތް އަނެއް ވާހަަކައަކީ ހަތަރު ކޮޓަރިއަކަށް ބުކިން ހައްދައިގެން ރާއްޖެއަށް އައި އިންޑިޔާގެ 189 މީހަކު އަނބުރާ ފޮނުވާލުމުގެ މަސައްކަތް ފެށި ވާހަކައެވެ. އެކަންވެސް ސަމާލުކަމަށް އައީ އެންމެ 4 ކޮޓަރިއަށް 200އާ ގާތްކުރާ އަދަދަށް މީހުން ބުކިން ހައްދާފައި އޮތުމުންނެވެ. ޚާއްސަކޮށް އިންޑިއާ ފަތުރުވެރިން އެކިއެކި އޭޖެންޓުން މެދުވެރިކޮށް ގެނެސް، އަމިއްލަ ގޭގޭގައި ކަރަންޓީން ކުރުވާ ވާހަކައަކީ މިހާރު އެންމެން ދަންނަ ބޮޑު ސިއްރެކެވެ. ޑެލްޓާ ވޭރިއަންޓު ފަދަ ނުރައްކާތެރި އެތައް ވޭރިއަންޓެއް ފެތުރެމުންދާއިރުވެސް ތިމާއާއި، ކައިރީގައި ތިބޭ އެހެން އެންމެންވެސް ނުރައްކަލަކަށް ހުށައަޅަނީ, ލިބޭ ފައިސާކޮޅެއްގެ ދަހިވެތިކަމުގައެވެ. ވެރިރަށް މާލޭގައިވެސް މިކަން ފުޅާ ދާއިރާއެއްގައި ކުރަމުންދާއިރު، ފަތުރުވެރިން ގެންނަ އޭޖެންޓުން އެކަމަށް އެތައް ޑޮލަރެއް ނަގާކަމަށް ވެއެވެ. ކަރަންޓީނުގައި ބަހައްޓާ ގޭގެ ވެރިފަރާތައްވެސް މިކަމުގައި ބޮޑު ފައިދާއެއް ވެއެވެ.

ނަމަވެސް ހަގީގަތަކީ އުސޫލުތަކާއި ޚިލާފަށް, އާންމުން ދިރިއުޅޭ ތަންތަނުގައި މިގޮތަށް ކަރަންޓީން ކުރުމުން ނުރައްކަލަށް ހުށައެޅިގެން ދަނީ ހަމައެކަނި އެ ފައިސާ ބަލައިގަންނަ މީހާ ނޫންކަމެވެ. އުސޫލުތަކާއި ޤަވާއިދުތަކާ ޚިލާފަށް ކުރާ މި ވިޔަފާރީގައި ގޭގެ އަމިއްލަ އެނދުގެ އެއް ފަޅިވެސް ދޭން މިއަދު ބައެއް މީހުން ތިބީ ތައްޔާރަށެވެ. ބޮޑު އަގުގައި ކުއްޔަށް ތަންތަން ނަގައިގެންވެސް މިއަދު މި ވިޔަފާރި ކުރަމުންދަނީއެވެ. އެކަމުގެ ސަބަބުން ރާއްޖެ އަންނަ ބައެއް ފަތުރުވެރިން އަނބުރާ ދާންޖެހި، އަނެއް ބަޔަކު ތާށިވެ، އިންސާނީ ވަގުފާރީގެ ހާއްޔަކަށް މިއޮއްގެން ބަދަލުވަނީއެވެ.

ރާއްޖޭގެ ރީތި ނަން ކިލަނބުވެ، ބައިނަލްއަޤުވާމީ ދުނިޔޭގައި ރާއްޖެއަކީ ފަތުރުވެރިކަމުގެ ނަމުގައި އިންސާނީ ވަގުފާރި ހިންގާ ޤައުމެއްގެ ގޮތުގައި ނަންވެ ނުދަނީވެސް މިކަން ހުއްޓާލަން އެބަޖެހެއެވެ. އަދި މިކަންކަން ހުއްޓުވުމަށް ކަމާބެހޭ ފަރާތްތަކުންވެސް ހަރުދަނާ، އަވަސް ފިޔަވަޅުތަކެއް އަޅަން ޖެހެއެވެ. ޑޮލަރު ކޮޅެއްގެ ބޭނުމުގައި އަމިއްލަ އެނދުގެ އެއް ފަޅި ދީގެން، ޤައުމު ބަލިމަޑުކަމެއްގެ ތެރެއަށް ވައްޓާލަން ޖާގަދެވޭކަށް ނެތްކަން ދައްކަދޭން އެބަޖެހެއެވެ.