އޭއެފްސީ ކަޕުގެ ދެކުނު އޭޝިއާއަށް ޚާއްސަ ގްރޫޕުގެ ދެވަނަ މެޗުގައި އިންޑިއާގެ އޭކޭޓީ މޯހަން ބަގާނާ ދެކޮޅަށް ނުކުންނައިރު އެ ޓީމަކީ މި ގްރޫޕުގައި އޮތް އެންމެ ވަރުގަދަ ޓީމު ކަމަށާއި، އެހެންނަމަވެސް އެ ޓީމަށް ދޫ ނުދޭނެ ކަމަށް ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުގެ ކޯޗު ރިސްޓޯ ވިޑަކޮވިޗް ބުނެފިއެވެ.

އޭއެފްސީ ކަޕުގެ ގްރޫޕް ޑީގައި މޯހަން ބަގާނާ ދެކޮޅަށް ހޮނިހިރު ދުވަހުގެރޭ ކުޅެން އޮތް މެޗުގެ ކުރިން ހުކުރު ދުވަހު ބޭއްވި ނޫސްވެރިންގެ ބައްދަލުވުގައި ވާހަކަދައްކަމުން ވިޑަކޮވިޗް ބުނީ ބަޝުންދަރާ އަތުން ބަލިވުމުން މާޒިޔާއަށް ޕްރެޝަރު ބޮޑު ކަމަށާއި، އެކަމަކު މިކަހަލަ މުބާރާތެއްގައި ޕްރެޝަރުގެ ވާހަކަ ދެއްކެން ނޯންނާނެ ކަމަށެވެ.

އަދި މޯހަން ބަގާނަކީ އެ ގްރޫޕުގައި އޮތް އެންމެ ވަރުގަދަ ޓީމު ކަމަށާއި، އެކަމަކު އެ ޓީމަށް ދޫ ނުދީ މާޒިޔާއިން ނުކުންނާނީ 100 އިންސައްތަ ދެއްކުމަށް ކަމަށް ވިޑަކޮވިޗް ބުންޏެވެ. އަދި މި ވަގުތު ވިސްނުން ހުރީ މޯހަން ބަގާން ބަލިކޮށް ގްރޫޕުގައި ކުރިއަށްދިޔުމަށް ކަމަށްޗެސް ވިޑަކޮވިޗް ބުންޏެވެ. އަދި ބުނީ މި މެޗަށް ނުކުންނައިރު ބަޝުންދަރާ މެޗުގައިވީ ކަންތައްތަކުގެ ވާހަކަ ދައްކަން ބޭނުންނުވާ ކަމަށާއި، މާޒިޔާއަށް އަދި މި މުބާރާތުގައި ކުރިއަށް ދިޔުމުގެ ފުރުސަތު އެބައޮތް ކަމަށެވެ.

މި މުބާރާތުގައި މާޒިޔާއިން ކުޅުނު ފުރަތަމަ މެޗުން ބަންގްލަދޭޝްގެ ޗެމްޕިއަން ބަޝުންދަރާ ކިންގްސް އަތުން ވަނީ 2-0 ގެ ނަތީޖާއަކުން ބަލިވެފައެވެ.

މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން މާޒިޔާގެ ވައިސް ކެޕްޓަން މުހައްމަދު އިރުފާން (އިރޭ) ބުނީ މި ކަހަލަ މެޗުތައް ކުޅޭއިރު، ކޮންމެ މެޗަކީވެސް ޕްރެޝަރު މެޗެއް ކަމަށާއި، އެހެންކަމުން ލިބޭ ކޮންމެ ފުރުސަތެއްގެ ބޭނުން ހިފަން ޖެހޭ ކަމަށެވެ.

އޭއެފްސީ ކަޕުގެ ގްރޫޕް ޑީގައި މާޒިޔާ އާއި މޯހަން ބަގާން ބައްދަލުކުރާ މެޗު ފަށާނީ ހޮނިހިރު ދުވަހުގެރޭ ރާއްޖެ ގަޑިން 21:00 ގައެވެ.