މޯހަން ބަގާންއާ ދެކޮޅަށް ކުޅުމަށް މާޒިޔާ ކަލްކަތާ އަށް ފުރައިފި

އޭއެފްސީ ކަޕްގެ ގްރޫޕް ސްޓޭޖުގައި މޯހަން ބަގާންއާ ދެކޮޅަށް ކުޅުމަށް ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަން ކުލަބު އިންޑިއާގެ ކަލްކަތާ އަށް ފުރައިފި އެވެ.

ހޯމަ ދުވަހު ފަތިހު މާޒިޔާ ކަލްކަތާ އަށް ފުރާފައިވާއިރު، މޯހަން ބަގާން އާއި މާޒިޔާ ބައްދަލުކުރާ މެޗު ކުޅުމަށް ހަމަޖެހިފައިވަނީ ބުދަ ދުވަހު އެވެ.

އޭއެފްސީ ކަޕްގައި މާޒިޔާ ވަނީ އެޓީމު ކުޅުނު ދެ މެޗުގެ ތެރެއިން އެއް މެޗު ކާމިޔާބުކޮށްފައެވެ. އެހެންނަމަވެސް އަނެއް މެޗުން އެޓީމު ވަނީ ބަލިވެފައެވެ.

މާޒިޔާ ހިމެނޭ ގްރޫޕަށް ބަލާއިރު، ކުޅުނު ދެ މެޗުވެސް ކާމިޔާބުކޮށް ގްރޫޕްގެ އެއްވަނައިގައި އޮތީ ބެންގަލޫރު އެފްސީ އެވެ. ދެވަނައިގައި ތިން ޕޮއިންޓާއެކު މޯހަން ބާގަން އޮތް އިރު، ތިންވަނައިގައި ހަމަ އެ އަދަދަށް ޕޮއިންޓް ހޯދައިގެން އޮތީ މާޒިޔާއެވެ. ގްރޫޕްގެ ފުލުގައި ޕޮއިންޓެއް ނުލިބި އޮތީ ބަނގްލަދޭޝްގެ އަބާނީ ލިމިޓެޑް އެވެ.

ދެވަނަ ބުރަށް ކޮލިފައިވުމުގެ ފުރުސަތު އަދިވެސް މާޒިޔާ އަށް އޮތް އިރު، އެޓީމު ވަނީ ލީގުގައި އެންމެ ފަހުން ކުޅުނު މެޗު ނިއުރޭޑިއަންޓް ސްޕޯޓްސް ކްލަބާ ވާދަކޮށް މޮޅުވެފައެވެ. އެގޮތުން މިއީ މި މެޗާ ކުރިމަތިލާއިރު އެޓީމަށް ލިބޭނެ އިތުރު ހިތްވަރަކަށް ވާނެ ކަމަށް މާޒިޔާގެ ކޯޗު ވަނީ ބުނެފައެވެ.

މާޒިޔާއާ ދެކޮޅަށް ނިކުންނަ މޯހަން ބަގާން ވަނީ ޕްލޭއޮފްގައި ރާއްޖޭގެ ވެލެންސިއާއާ ދެކޮޅަށް ކުޅެފައެވެ. ފުރަތަމަ ލެގު ރާއްޖޭގައި ކުޅެ އެއްވަރުވިއިރު، ދެވަނަ ލެގުގައި ބޮޑު ތަފާތަކުން މޯހަން ބަގާން ވަނީ މޮޅުވެފައެވެ.