މިނިސްޓަރ ޝާހިދު ތައިލެންޑްގެ ޚާރިޖީ ވަޒީރާ ވަރޗުއަލްކޮށް ބައްދަލުކުރައްވައިފި

ފޮރިން މިނިސްޓަރ ޢަބްދުﷲ ޝާހިދު ތައިލެންޑްގެ ބޮޑުވަޒީރުގެ ނައިބު އަދި ޚާރިޖީ ވަޒީރު ޑޮން ޕްރަމުދްވިނާއީއާ ވަރޗުއަލްކޮށް ބައްދަލުކުރައްވައިފިއެވެ.

މި ބައްދަލުކުރެއްވުމުގައި ދެޤައުމުގެ ގުޅުންތައް އިތުރަށް ބަދަހިކުރުމާ ބެހޭގޮތުން ދެބޭފުޅުން މަޝްވަރާކުރެއްވިއެވެ. އަދި ކޮވިޑް-19ގެ ޙާލަތު ދެ ޤައުމުގައި އޮތް ގޮތާއި، މި ބަލިމަޑުކަމުން އަރައިގަތުމަށް ދެޤައުމުގައި ކުރެވޭ މަސައްކަތާއި ރައްކާތެރިކަމުގެ ފިޔަވަޅުތަކުގެ އިތުރުން، ކޮވިޑް-19ގެ ސަބަބުން ލިބުނު ގެއްލުންތަކުން އަރައިގަތުމަށް ކުރެވޭ މަސައްކަތާ ބެހޭ ގޮތުން ދެ ވަޒީރުން މަޝްވަރާކުރެއްވިއެވެ.

މިނިސްޓަރ ޝާހިދު ވަނީ, ވޭތުވެދިޔަ ތަނުގައި، ޚާއްސަކޮށް ކޮވިޑް-19ގެ ބަލިމަޑުކަމުގައި ތައިލެންޑުން ދިވެހިރާއްޖެއަށް ފޯރުކޮށްދީފައިވާ އެހީތެރިކަމަށްޓަކައި ޝުކުރު އަދާކުރައްވާފައެވެ. މީގެ އިތުރުން ތަޢުލީމު، ޒުވާނުން، އަދި ސަޤާފަތާއި ފަތުރުވެރިކަން ފަދަ އެކި ދާއިރާތަކުން ދެޤައުމު ގުޅިގެން އިތުރަށް މަސައްކަތްކުރުމާއި، އދ. ގެ ތެރެއިން ދެޤައުމު ގުޅިގެން އިތުރަށް މަސައްކަތްކުރުމާ ބެހޭ ގޮތުން ދެ ބޭފުޅުން މަޝްވަރާކުރެއްވިއެވެ.