މެލޭޝިއާގެ އައު ބޮޑުވަޒީރުކަމުގެ ފުރުސަތު ބޮޑީ މުހިއްޔިއްދީންގެ ނައިބަށް

މެލޭޝިއާގެ އައު ބޮޑުވަޒީރު ކަމަށް، އިސްތިއުފާ ދެއްވި ބޮޑުވަޒީރު މުހިއްޔިއްދީން ޔާސީންގެ ނާއިބު އިސްމާއީ ސަބްރީ ޔައުގޫބަށް ފުރުސަތު ބޮޑު ކަމަށް ބެލެވެން ފަށައިފިއެވެ.

އިސްމާއީލާ ވާދަ ކުރައްވާނެ ކަމަށް ބެލެވެނީ އިދިކޮޅުގެ އަންވަރު އިބްރާހީމެވެ. ޔުނައިޓެޑް މެލޭސް ނޭޝަނަލް އޮގަައިޒޭޝަން (ޔޫއެމްއެންއޯ)ގެ ތާއީދު އިސްމާއީލަށްވަނީ ލިބިފައެވެ. އައު ބޮޑުވަޒީރުކަމަށް ގެންނަން ބޭނުންވާ ކެންޑިޑޭޓެއްގެ ނަން، ވަޓްސްއެޕް މެދުވެރިކޮށް ފޮނުވުމަށް ގާނޫނުހަދާ މަޖިލީހުގެ ތިރި ގޭގޭ މެމްބަރުންނަށް ރަސްގެފާނު ދެއްވާފައިވާ މުހުލަތު މިހާރު މިވަނީ ހަމަވެފައެވެ. މުހުލަތު ދީފައިވަނީ ބުދަ ދުވަހުގެ ހަވީރު 4:00 ޖެހުމާ ހަމައަށެވެ.

ޔޫއެމްއެންއޯއިން ބުނެފައިވަނީ އެ ޕާޓީން ތާއީދުކުރާނެ ކެންޑިޑޭޓެއް އަންގާރަ ދުވަހު ނިންމާފައިވާ ކަމަަށެވެ. އިސްމާއީލްގެ އިތުރުން އެހެން ކެންޑިޑޭޓުންގެ ނަން ވެސް ހުށަހެޅުނު ކަމަށާއި، ތާއީދު ލިބުނީ އިސްމާއީލަށްކަން ޕާޓީންވަނީ ހާމަކޮށްފައެވެ. ތިރިގޭގެ 38 ގޮނޑި ކޮންޓްރޯލްކުރާ މި ޕާޓީން ނުސީދާ ގޮތެއްގައި އެހެން ޕާޓީތައް ވެސް ކޮންޓްރޯލް ކުރެއެވެ. އެހެންކަމުން ޔޫއެމްއެންއޯގެ ތާއީދާއެކު މެލޭޝިއާގެ 9 ވަނަ ބޮޑުވަޒީރަކަށް އިސްމާއީލް ވުމުގެ ފުރުސަތު ބޮޑެވެ. ގާނޫނުހަދާ މަޖިލީހުގެ ތިރި ގޭގައި 222 މެމްބަރުން ތިއްބަވައެވެ.

މެލޭޝިއާގެ އާ ބޮޑުވަޒީރު އައްޔަނުކުރުމުގެ މަސައްކަތް އަންގާރަ ދުވަހު ފެށުމާއެކު، ކޮވިޑްގެ ހާލަތު ކޮންޓްރޯލް ކުރުމަށް ވާދަވެރި ސިޔާސީ ވެރިން އެއްބައިވާން ރަސްގެފާނު ވަނީ ގޮވާލައްވާފައެވެ. ތާއީދު އޮތް ކެންޑިޑޭޓެއް ބެއްލެވުމަށް ފަހު ބޮޑު ވަޒީރުގެ މަގާމަށް އެ ބޭފުޅަކު އައްޔަނު ކުރައްވާނީ ރަސްގެފާނު އަމިއްލަފުޅަށެވެ.

ކޮވިޑާ ގުޅިގެން އިންތިޚާބެއް ނުބޭއްވޭނެ ކަމަށް ރަސްގެފާނު ސުލްތާން އަބްދުﷲ ސުލްތާން އަހުމަދު ޝާހު ވަނީ ނިންމަވާފައެވެ.

ބޮޑުވަޒީރުކަމަށް ވަޑައިގެންނެވިތާ 18 ވަނަ މަހު ކުރެއްވުމަށް ފަހު މުހިއްޔިއްދީން އިސްތިއުފާ ދެއްވީ ގާނޫނުހަދާ މަޖިލީހުގެ ތާއީދު ގެއްލުމުންނެވެ. އޭނާ ވެރިކަމުގައި ހޭދަކުރެއްވި ކުރު މުއްދަތުގައި ގިނަ ފާޑުކިޔުންތަކެއް އަމާޒުވެފައިވާއިރު، އެންމެ ބޮޑަށް ފާޑުކިޔާފައި ވަނީ ކޮވިޑާ ގުޅިގެން އަޅާ ފިޔަވަޅުތަކާ ގުޅޭ ގޮތުންނެވެ.