އެމްޑީޕީގެ އެތެރޭގެ އިންތިޚާބުގައި ވާދަނުކުރެވޭނެކަމަށް ނިންމާފައިވާ ނިންމުމަކީ ގާނޫނީ އިމުން ބޭރުން ޕާޓީގެ ގަވާއިދާ ޚިލާފަށް ނިންމާފައިވާ ނިންމުމެއް: މަޚުލޫފް

އެމްޑީޕީގެ ދާއިރާތަކުގެ އިންތިޚާބުގައި ވާދަކުރުމަށް ޝަރުތު ފުރިހަމަ ނުވާކަމަށް ނިންމާފައިވާ ނިންމުމަކީ ގާނޫނީ އިމުގެ ބޭރުން ޕާޓީގެ ގަވާއިދުތަކާއި އުސޫލުތަކާއި ޚިލާފަށް ނިންމާފައިވާ ނިންމުމެއްކަން ސާބިތުވާތީ ޝަރުތު ފުރިހަމަ ނުވާކަމަށް ނިންމާފައިވާ ނިންމުން އަލުން މުރާޖަޢާކޮށް އެމްޑީޕީގެ ދާއިރާތަކުގެ އިންތިޚާބުގައި ވާދަކުރުމުގެ ފުރުސަތު ފަހިކޮށްދިނުމަށް އަހުމަދު މަޚުލޫފް އެޕާޓީގެ ކިބައިން އެދިވަޑައިގެންފިއެވެ.

ކުރިޔަށް އޮތް އެމްޑީޕީގެ އެތެރޭގެ އިންތިޚާބުގައި ވާދަކުރުމުގެ ޝަރުތު ފުރިހަމަނުވާކަން އެމްޑީޕީން އެންގުމުން މަޚުލޫފް ވަނީ އެޕާޓީގެ ޗެއަރ ޕާސަން ހަސަން ލަތީފް އަދި އިސްތިއުނާފް ފަނޑިޔާރު މަޖިލީހަށް އެނިންމުން މުރާޖަޢާކޮށްދިނުމަށް އެދި ސިޓީ ފޮނުއްވާފައެވެ.

އެމްއެމްޕީއާރުސީގެ ޚިޔާނާތުގެ މައްސަލަޔަކާ ގުޅިގެން ޔޫތް މިނިސްޓަރުކަމުގައި ހުންނެވި މަޚުލޫފް ހުންނެވީ ސަސްޕެންޝަނުގައެވެ.

މަޚުލޫފް ފޮނުއްވާފައިވާ ސިޓީގައި ވިދާޅުވެފައިވަނީ އެމްޑީޕީގެ ދާއިރާތަކުގެ އިންތިޚާބުގައި ވާދަކުރުމަށް ފޯމް ހުށަހަޅާފައިވަނިކޮށް ޕާޓީގެ ސެކްރެޓޭރިއޭޓްގެ ފަރާތުން 16 އޮގަސްޓްގައި ޝަރުތު ފުރިހަމަނުވާކަމަށް އަންގާފައިވާކަމަށެވެ. އަދި ޝަރުތު ފުރިހަމަ ނުވާކަމަށް ނިންމާފައިވަނީ "ޝަރުތު ފުރިހަމަވާ ފަރާތްތައް ބެލުމަށް، ކަމާ ގުޅުންހުރި މުއައްސަސާތަކަށް ފޮނުވުމުން އޭގެތެރެއިން އެންޓި-ކޮރަޕްޝަން ކޮމިޝަނުން އަޅުގަނޑުގެ މައްސަލައެއް ވާކަމަށް އަންގާފައިވާތީ" ކަމަށް ބަޔާންކޮށްފައިވާކަމަށެވެ.

ސިޓީގައި ޝަރުތު ފުރިހަމަނުވާކަމަށް ބަޔާންކޮށްފައިވީނަމަވެސް ގާނޫނީ ގޮތުން އެމްޑީޕީގެ ދާއިރާތަކުގެ އިންތިޚާބުގައި ވާދަކުރުމުގެ ޝަރުތު ފުރިހަމަވާކަމަށް އަމިއްލަފުޅަށް ގަބޫލުކުރައްވާކަމަށް މަޚުލޫފްގެ ސިޓީގައި ބަޔާންކޮށްފައިވެއެވެ. މަޚުލޫފް ވިދާޅުވެފައިވަނީ ޝަރުތު ފުރިހަމަނުވާކަމަށް ނިންމައި ހަވާލާދީފައިވާ ސިޓީގައި ފާހަގަކޮށްފައިވާ ކަމަކީ ދާއިރާތަކުގެ އިންތިޚާބުގައި ވާދަކުރާ ކެންޑިޑޭޓުން ކުރިމަތިލުމުގެ ފުރުސަތު ހުޅުވާލިކަން އެންގުމަށް 24 އޭޕްރީލްގައި ޕާޓީގެ ވެބްސައިޓްގައި ޝާއިއުކޮށްފައިވާ އިއުލާންގައި ހިމަނާފައިވާ ޝަރުތެއް ނޫންކަމަށެވެ. އަދި އެއީ އެމްޑީޕީގެ އިންތިޚާބުތަކާބެހޭ ގަވާއިދުގައި ވެސް ބަޔާންކޮށްފައިވާ ޝަރުތެއް ނޫންކަމަށް މަޚުލޫފްގެ ސިޓީގައި ބަޔާންކޮށްފައިވެއެވެ.

މީގެއިތުރުން އެމްޑީޕީގެ އިންތިޚާބުތަކާބެހޭ ގަވާއިދުގެ 11 ވަނަ މާއްދާއަށް ރިއާޔަތްކުރާއިރު އެ މާއްދާގެ (ހ) ގެ 3 ވަނަ ނަންބަރުގައިވާ ގޮތުން އިންތިޚާބަށް ކުރިމަތިލުމަށް އެދޭ މީހުންގެ ފުރިހަމަވާންޖެހޭ ޝަރުތުތައް އިންތިޚާބެއް ބާއްވާކަން އެންގުމަށް ކުރާ އިއުލާންގައި ހިމަނަންޖެހޭކަމަށް ސިޓީގައި މަޚުލޫފް ބަޔާންކޮށްފައިވެއެވެ. ނަމަވެސް އެމްޑީޕީގެ ދާއިރާތަކުގެ އިންތިޚާބުގައި ވާދަކުރާ ކެންޑިޑޭޓުން ކުރިމަތިލުމުގެ ފުރުސަތު ހުޅުވާލިކަން އެންގުމަށް 24 އޭޕްރީލް ގައި ވެބްސައިޓްގައި ޝާއިއުކޮށްފައިވާ އިއުލާންގައި ހިމަނާފައިނުވާ ޝަރުތުތަކެއް އިންތިޚާބަށް އިއުލާންކުރިފަހުން 27 އޭޕްރީލްގައި ނެރެފައިވާ އިއުލާންގައި ވަނީ ހިމަނާފައެވެ. މިއީ ކަނޑައެޅިގެން އެމްޑީޕީގެ އިންތިޚާބުތަކާބެހޭ ގަވާއިދުގެ 11 ވަނަ މާއްދާ އާ ޚިލާފަށް ކޮށްފައިވާކަމެއްކަމަށް މަޚުލޫފް ވަނީ ވިދާޅުވެފައެވެ.

މީގެއިތުރުން މަޚުލޫފް ވިދާޅުވެފައިވަނީ ބަލަމުންދާ މައްސަލައަކީ ސިޔާސީ ބަޔަކު އަޑީގައި ތިބެގެން ސިޔާސީ އަނިޔާއެއް ދިނުމަށް ކުރަމުންދާ މަަސައްކަތެއްކަމަށެވެ. އަދި ކުށެއް ސާބިތުނުވާހާ ހިނދަކު ކުށްވެރިއެއް ނޫންކަމަށް ވެސް ވަނީ ވިދާޅުވެފައެވެ. މިކަން ގާނޫނު އަސާސީގައި ބަޔާންކޮށްފައިވާއިރު މިހާ ނިކަމެތިކޮށް މި މައްސަލާގައި އަމަލުކުރެއްވީ ކީއްވެކަމާމެދު މިހުރީ ހައިރާންވެފައިކަމަށް މަޚުލޫފް ވިދާޅުވިއެވެ.

އަދި ވަޒީރުންގެ މަޖިލީހުގެ މެމްބަރެއްގެ ހައިސިއްޔަތުން ގައުމީ މަޖިލީހުގައި އިނދެވިފައި ގައުމީ މަޖިލީހުގެ އިންތިޚާބުގައި ވާދަނުކުރެވޭނެކަމަށް އެންގުމަކީ އެއްވެސް ތާކުންތާކު ނުޖެހޭ ހަމަނުޖެހޭކަމެއްކަމަށް ވަނީ ވިދާޅުވެފައެވެ.

ޕާޓީގެ އިންތިޚާބުގައި ވާދަކުރާ ފަރާތްތަކުގެ ޝަރުތުތައް އިންތިޚާބާ ދިމާކޮށް ބަދަލުކުރުމަކީ އެއްވެސް ޑިމޮކްރެޓިކް މުޖުމަތަމައެއްގައި އަމަލުކުރަމުންދާ އުސޫލެއް ނޫންކަމަށާއި ޕާޓީގެ އަސާސީ ގަވާއިދުގައި އަދި ޕާޓީގެ އިންތިޚާބުތަކާބެހޭ ގަވާއިދުގައި ނުހިމެނޭ ޝަރުތުތަކެއް ޕާޓީގެ ހިންގާ ކޮމިޓީގެ ބައްދަލުވުމަކުން ނިންމާ ނިންމުމަކުން ބަދަލުކުރުމަކީ ގާނޫނީ ހަމަތަކާއި އުސޫލުން ބޭރުން ވަކި ބައެއްގެ ނުފޫޒުން ކޮށްފައިވާ ކަމެއްކަމަށް ގަބޫލުކުރެވޭކަމަށް ސިޓީގައި މަޚުލޫފް ވިދާޅުވެފައިވެއެވެ.