ރައީސްގެ ތ. އަތޮޅު ދަތުރުފުޅު: ތ. އަތޮޅު ތައުލީމީ މަރުކަޒަށް ދިމާވެފައިވާ ކަންކަން ހައްލުކޮށްދެއްވާނެކަމަށް ރައީސް ވިދާޅުވެއްޖެ

ތ. އަތޮޅު ތައުލީމީ މަރުކަޒަށް ދިމާވެފައިވާ ކަންތައްތައް ހައްލުކުރުމަށް ސަރުކާރުން ކުރެވެން ހުރި މަސައްކަތްތައް ކޮށްދެއްވާނެކަމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.

ކޮޅުމަޑުލުގެ 7 ރަށަކަށް ކުރައްވާ ދަތުރުފުޅުގެ ތެރެއިން ބުދަ ދުވަހުގެ ހެނދުނު އެ ސްކޫލަށް ކުރެއްވި ޒިޔާރަތުގައި ރައީސް ޞާލިޙް ވަނީ ތަޢުލީމީ މަރުކަޒުގެ އިސްވެރިންނާއި ބެލެނިވެރިންނާ ބައްދަލުކުރައްވާފައެވެ.

ބުަދަ ދުވަހުގެ ހެނދުނު ތ. އަތޮޅު ތަޢުލީމީ މަރުކަޒުގައި ބޭއްވެވި މި ބައްދަލުކުރެއްވުމުގައި ސްކޫލްގެ އިސް ވެރިންނާއި އެސްއެމްޓީގެ ބޭފުޅުން ވަނީ އެބޭފުޅުންގެ ކަންބޮޑުވުންތަކާއި ސްކޫލް ހިންގުމުގައި ދިމާވާ ދަތިތަކާ ގުޅޭގޮތުން ރައީސުލްޖުމްހޫރިއްޔާއާ މަޢުލޫމާތު ހިއްސާކުރައްވާފައެވެ. މިގޮތުން އެބޭފުޅުން ވަނީ ސްކޫލްގެ ޖާގައިގެ ދަތިކަން ހައްލުކުރުމަށް އިތުރު 6 ކްލާސްރޫމް ތަރައްޤީކުރަމުން އަންނަކަން ފާހަގަކުރައްވާފައެވެ. އަދި، ސްކޫލް ޒަމާނީ ފެންވަރަކަށް ތަރައްޤީކުރުމަށް ބޭނުންވާ ރީސްޓްރަކްޗަރިން މަސައްކަތްތަކާއި، ބޭނުންވާ ވަޞީލަތްތަކާއި، ސްކޫލްގެ މަރާމާތަށް ބޭނުންވާ ބަޖެޓް އަދި، ފަންނީ މުވައްޒަފުން ހޯދުމުގައި ދިމާވާ ދަތިތައް ޚާއްޞަގޮތެއްގައި ވަނީ ފާހަގަކުރައްވާފައެވެ. ބެލެނިވެރިން ވަނީ އެޑިއުކޭޝަނުން ދޫކޮށްފައިވާ ޓެބްލެޓްތައް ހަލާކުވުމުން، އަލުން ހޯދުމުގައި ލުއި ގޮތްތަކެއް ހަމަޖައްސަވައިދެއްވުމަށް ރައީސް އަރިހުގައި ދަންނަވާފައެވެ.

ރައީސުލްޖުމްހޫރިއްޔާ ވަނީ ތަޢުލީމީ މަރުކަޒުގެ އިސްވެރިން އަދި ބެލެނިވެރިން ފާހަގަކުރެއްވެވިި ކަންކަން ފަހިކުރުމުގައި ސަރުކާރުން ކުރެވެން ހުރި މަސައްކަތްތައް ކޮށްދެއްވާނެކަމުގައި ވިދާޅުވެފައެވެ. އަދި، އެމަނިކުފާނު ވަނީ ކޮވިޑްގެ ހާލަތުން އަރައިގަތުމަށް ވެކްސިން ޖެހުމުގެ މުހިންމުކަން ފާހަގަކުރައްވާފައެވެ. މީގެ އިތުރުން ވެސް ރައީސުލްޖުމްހޫރިއްޔާގެ ވާހަކަފުޅުގައި އަންނަ އަހަރުގެ ބަޖެޓުގައި ހިމަނައިގެން ތަޢުލީމީ ދާއިރާގެ މުވައްޒަފުންގެ މުސާރައާއި އިނާޔަތްތައް ބޮޑުކުރުމަށް ސަރުކާރުން މަސައްކަތްކުރަމުން އަންނަކަން ފާހަގަކުރެއްވިއެވެ.

ތ. އަތޮޅު ތަޢުލީމީ މަރުކަޒަށް ޒިޔާރަތްކުރެއްވުމުގެ ކުރިން ރައީސުލްޖުމްހޫރިއްޔާ ވަނީ ތިމަރަފުށީގެ ބޯހިޔާވަހިކަމަށް ހައްލެއް ހޯދުމުގެ ގޮތުން އެރަށުގައި އަލަށް ޢިމާރާތްކުރާ 100 ހައުސިންގ ޔުނިޓްގެ މަސައްކަތް ކުރިޔަށްދާ ގޮތް ބައްލަވާލައްވާފައެެވެ. އެސް.ޖޭ ކޮންސްޓްރަކްޝަން ޕްރައިވެޓް ލިމިޓެޑާ ޙަވާލުކޮށްގެން ކުރިޔަށްގެންދާ މި މަޝްރޫޢަކީީ 71،510،250.00 ރުފިޔާގެ މަޝްރޫޢެކެވެ. އެއް އަހަރުދުވަހުގެ މުއްދަތެއް ތެރޭގައި ނިންމުމަށް ރާވާފައިވާ މި މަޝްރޫޢުގެ މަސައްކަތުގެ ބޮޑު ބައެއް މިހާރު ވަނީ ނިމިފައެވެ. މިގޮތުން 64 ގޭގެ ރޫފްބީމް މަސައްކަތާއި، ރޭނުމުގެ މަސައްކަތް ވަނީ ނިމިފައެވެ. އަދި، 42 ގޭގެ ސިމެންތި ޖެހުމުގެ މަސައްކަތާއި، 56 ގޭގެ ރޫފް ޓްރަސް ހަރުކުރުމާއި، 32 ގެ ހިޔާކުރުމުގެ މަސައްކަތް ވަނީ ނިމިފައެވެ.

މީގެ އިތުރުންވެސް ރައީސުލްޖުމްހޫރިއްޔާ ވަނީ ތިމަރަފުށީގައި ކުރިޔަށްގެންދާ މަގު ހެދުމުގެ މަޝްރޫޢުގެ މަސައްކަތްތައް ބައްލަވާލައްވާފައެވެ. އަދި، އެމަނިކުފާނު ވަނީ ތިމަރަފުށީ ޞިއްޙީ މަރުކަޒަށް ޒިޔާރަތްކުރައްވައި އެތަނުގެ ހާލަތު ވެސް ބައްލަވާލައްވާފައެވެ. މިގޮތުން، ޞިއްޙީ މަރުކަޒުން ރައްޔިތުންނަށް ޚިދުމަތް ދިނުމުގައި ދިމާވާ ދަތިތައް އޮޅުން ފިލުއްވައި، ޞިއްޙީ ޚިދުމަތްތައް ފުޅާކުރުމާ ބެހޭގޮތުން ތަނުގެ މުވައްޒަފުންނާ އެމަނިކުފާނު ވާހަކަފުޅުދައްކަވާފައިވެއެވެ.