ޖާބިރު ފައިސާތަކެއް ދެއްވިކަމަށް ބުނެ ދައްކާ ވާހަކަތައް ގާސިމް ދޮގުކުރައްވައިފި

މިދިޔަ ރިޔާސީ އިންތިޚާބުގެ ދުވަސްވަރު ކާށިދޫ ދާއިރާގެ މެމްބަރު ޢަބްދުﷲ ޖާބިރު, ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު އަދި ޖުމްހޫރީ ޕާޓީ (ޖޭޕީ)ގެ ލީޑަރު ގާސިމް އިބްރާހީމަށް ފައިސާތަކެއް ދެއްވި ކަމަށްބުނެ ދައްކާ ވާހަކަތައް ގާސިމް ދޮގުކުރައްވައިފިއެވެ.

ގާސިމްއާ ހަވާލާ ދެއްވައި ޖޭޕީގެ އިސް ތަރުޖަމާނު އަލީ ޞާލިހު ވިދާޅުވީ، ހ. ތިމާވެށި އަބްދުﷲ ޖާބިރު، ކޮމިޝަނަރ އޮފް ޕޮލިސް މުހަންމަދު ހަމީދުއަށް ފޮނުވި ސިޓީއެއްގެ ވާހަކަ މީޑިއާއިން ފެނިވަޑައިގެންފައިވާ ކަމަށާއި، އެ ސިޓީގައި މިދިޔަ ރިޔާސީ އިންތިޚާބަށް ޖާބިރު، ގާސިމްއަށް ފައިސާތަކެއް ދިން ކަމަށް ބުނާ ވާހަކައަކީ ކަނޑައެޅިގެން ދޮގެއް ކަމަށެވެ.

އަލީ ޞާލިހު ވަނީ މިފަދަ ބުހުތާނު ދޮގު ވާހަކަ ދެއްކުން ވަގުތުން ވަގުތަށް ހުއްޓާލުމަށް ގޮވާލާފައެވެ.

ޖާބިރުގެ އަމަލުތަކަށް އިޝާރާތްކުރައްވައި އަލީ ޞާލިހު ވިދާޅުވީ މީސްމީހުންގެ މުދަލަށް ގެއްލުންދިނުމާއި، އަދި ބޭއަދަބީ ބަސްތައް ބޭނުންކޮށް، އާންމު ތަންތާ އުޅޭ އުޅުމަށް ނަޒަރު ހިންގައި، ޖާބިރުގެ ހޭބުއްދި ސަލާމަތުން ހުރިތޯ ބަލަން ޖެހޭ ކަމަށެވެ.

ޖާބިރު އަތުން ފައިސާ ނެންގެވިކަން ގާސިމް ދޮގުކުރައްވާފައިވާއިރު، ޖާބިރު ވަނީ ފައިސާއަށް ހިޔާނަތްތެރިވި ކަމަށް ބުނެ އެ މައްސަލަ ފުލުހުންނަށް ހުށަހަޅާފައެވެ. ޖާބިރު ފުލުހުންނަށް ފޮނުއްވި ސިޓީގައި ބުނެފައިވަނީ 2013 ވަނަ އަހަރު ބޭއްވުނު ރިޔާސީ އިންތިޚާބުގެ ދުވަސް ވަރުގައި ތ. ތިމަރަފުށީގައި ހުރެ ފަސް މިލިއަން ރުފިޔާ، ޖާބިރުގެ އަތުން ނެގުމަށް ފަހު އެ ފައިސާ އަނބުރާ އަދާކޮށްފައި ނުވާތީ އާއި، ޖުމްހޫރީ ޕާޓީއަށް ހޭދަތައް ކުރުވުމަށް ފަހު އެ ޕާޓީން އޭނާ ބޭރުކޮށްފައި ވާތީ އާއި، އަދި ގާސިމްގެ ޕާޓީގެ ޓިކެޓްގައި ކާށިދޫ ދާއިރާގެ ގޮނޑިއަށް އޭނާ ކުރިމަތިލައި ކެމްޕެއިން ކުރަމުން ދިޔަ ދަނޑިވަޅުގައި ވެސް އަނބުރާ އަދާކޮށްދޭނެ ކަމަށް ބުނެ ފަސް ލައްކަ އެމެރިކާ ޑޮލަރު ނެގި ކަމަށެވެ. އަދި މި ފައިސާތައް އަނބުރާ ދައްކާފައިނުވާތީ މައްސަލަ ބަލައިދިނުމަށް ޖާބިރުގެ ސިޓީގައި އެދިފައިވެއެވެ.

މީގެ އިތުރުން ރިޔާސީ އިންތިޚާބުގެ ކެމްޕޭން ދުވަސްވަރު ކުރީގެ ރައީސް މައުމޫނު އަބްދުލްގައްޔޫމް ވެސް ޖާބިރު އަތުން 29 މިލިއަން ރުފިޔާ ނަގާފައިވާ ކަމަށް ޖާބިރު ގެންދަވަނީ ތަކުރާރުކޮށް ވިދާޅުވަމުންނެވެ. އަދި އެ ފައިސާ އަނބުރާ ދައްކަވާނެ ކަމަށް މައުމޫން ވިދާޅުވި ނަމަވެސް އެކަން ކުރައްވާފައިނުވާކަމަށް ޖާބިރު ވިދާޅުވެއެވެ. ނަމަވެސް ރައީސް މައުމޫން ވަނީ ޖާބިރުގެ އެވާހަކަތައް އެކި ފަހަރުމަތިން ދޮގުކުރައްވާފައެވެ. އެ މައްސަލަގައި ޖާބިރު ވަނީ ރައީސް މައުމޫނާ ދެކޮޅަށް ކޯޓަށް ވެސް މައްސަލަ ހުށަހަޅުއްވާފައެވެ.