ޑޯޓްމުންޑް ބަލިކޮށް ޖަރުމަން ސުޕަ ކަޕް ބަޔާނަށް

ބޮރޫޝިއާ ޑޯޓްމުންޑް ބަލިކޮށް ބަޔާން މިއުނިކުން ޖަރުމަން ސުޕަ ކަޕް ކާމިޔާބުކޮށްފިއެވެ.

މިދިޔަ ސީޒަނުގެ ޖަރުމަން ލީގު ޗެމްޕިއަނުން ކަމަށްވާ ބަޔާނުން ޖަރުމަން ސުޕަ ކަޕް ކާމިޔާބުކުރީ އަންގާރަ ދުވަހުގެރޭ ކުޅުނު މެޗުގައި ޖަރުމަން ކަޕުގެ އެންމެ ފަހުގެ ޗެމްޕިއަނުން ކަމަށްވާ ޑޯޓްމުންޑް އަތުން 3-1 ގެ ނަތީޖާއަކުން މޮޅުވެގެންނެވެ.

ޑޯޓްމުންޑުގެ ދަނޑުގައި ކުޅުނު މި މެޗުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގައި ބަޔާނުން ވަނީ ލީޑު ނަގާފައެވެ. މި ހާފު ނިމެން ހަތަރު މިނެޓަށް ވެފައި ވަނިކޮށް ސާޖް ގްނާބްރީ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ އިތުބާރު ފޯވާޑް ރޮބަޓް ލެވަންޑޯސްކީއެވެ.

މެޗުގެ ދެވަނަ ހާފުގައިވެސް ދެ ޓީމުގެ ފަރާތުން ގިނަ ހަމަލާތަކެއް ފެނިގެންދިޔައިރު، މި ހާފު ފަށައިގެން ހަތަރުވަނަ މިނެޓުގައި ބަޔާނުން ވަނީ ލީޑު ފުޅާކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ތަޖުރިބާކާރު ފޯވާޑް ތޯމަސް މުލާއެވެ. އެކަމަކު މެޗުގެ 64 ވަނަ މިނެޓުގައި ކެޕްޓަން މާކޯ ރެއުސް ވަނީ ލަނޑެއް ޖަހައި، ޑޯޓްމުންޑަށް ފަރަގު ކުޑަކޮށްދީފައެވެ. ނަމަވެސް އޭގެ 10 މިނެޓު ފަހުން އޭރިއާ ތެރެއިން ލިބުނު ފުރުސަތެއްގެ ބޭނުންހިފައި ލެވަންޑޯސްކީ ވަނީ ބަޔާނަށް އަލުން ލީޑު ފުޅާކޮށްދީފައެވެ.

މި މެޗުގައި ޖެހި ދެ ލަނޑާއެކު ލެވަންޑޯސްކީ ވަނީ މިހާތަނަށް ޖަރުމަން ސުޕަ ކަޕް މެޗުތަކުގައި ޖުމްލަ ހަތް ލަނޑު ޖަހާފައެވެ. އެއާއެކު އޭނާ ވެފައިވަނީ ޖަރުމަން ސުޕަ ކަޕް މެޗުތަކުގައި މިހާތަނަށް އެންމެ ގިނަ ލަނޑު ޖެހި ކުޅުންތެރިޔާއަށެވެ.

ޑޯޓްމުންޑް ބަލިކޮށް ބަޔާނުން ޖަރުމަން ސުޕަ ކަޕް ކާމިޔާބުކުރިއިރު، މިއީ މި ސީޒަނަށް ބަޔާނުގެ ކޯޗުގެ މަގާމާ ހަވާލުވި ޒުވާން ކޯޗު ހޫލިއަން ނާގަލްސްމަންގެ ފުރަތަމަ ކާމިޔާބީއެވެ. އަދި މިއީ އެ ޓީމުން ޖަރުމަން ސުޕަ ކަޕް ކާމިޔާބުކުރި ނުވަވަނަ ފަހަރެވެ. ބަޔާނަކީ ޖަރުމަން ސުޕަ ކަޕުގެ އެންމެ ކާމިޔާބު ޓީމެވެ.