"ވަޒީރެއްގެ ހައިސިއްޔަތުން ގައުމީ މަޖިލީހުގައި އިނދެވިފައި، އިންތިޚާބުގައި ވާދަނުކުރެވުނީމަ ހަމައެއްނުޖެހޭ"
މަހުލޫފުގެ މައްޗަށް ދައުވާކުރަން އެދި ޕީޖީ އޮފީހަށް ވަނީ ފޮނުވާފައި
މިނިސްޓަރ އޮފް ޔޫތް، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙުމަދު މަޙުލޫފު
ވަޒީރެއްގެ ހައިސިއްޔަތުން ގައުމީ މަޖިލީހުގައި އިނދެވިފައި، އިންތިޚާބުގައި ވާދަނުކުރެވުމަކީ ހަމަޖެހޭ ކަމެއް ނޫންކަމަށް މިނިސްޓަރ އޮފް ޔޫތް، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙުމަދު މަހުލޫފު ވިދާޅުވެއްޖެއެވެ.
އެމްއެމްޕީއާރްސީ ޚިޔާނާތާ ގުޅިގެން މަހުލޫފުގެ މައްޗަށް ދައުވާކުރުމަށް ޕްރޮސެކިއުޓަރ ޖެނެރަލް އޮފީހަށް ފޮނުވާފައިވާއިރު، އެކަމުގެ ސަބަބުން ގައުމީ މަޖިލީހުގެ އިންތިޚާބުގައި ވާދަކުރުމުގެ ފުރުސަތު މަހުލޫފަށް މިވަނީ ގެއްލިގެން ގޮސްފައެވެ.
އެކަމާ ގުޅޭގޮތުން މަހުލޫފު ވިދާޅުވީ، ރައީސުލްޖުމްހޫރިއްޔާ ކަމާއި، މަޖިލިސް މެމްބަރުކަމާއި، ކައުންސިލް އިންތިޚާބަށް ބެލިކަމުގައިވީނަމަވެސް ޝަރުތު ހަމަވާ ކަމަށެވެ. އެގޮތުން ޖިނާއީ ކުށެއް ސާބިތުނުވާހާ ހިނދަކު ވާދަކުރެވެން ވާނެކަން ފާހަގަކުރައްވައި މަހުލޫފު ވިދާޅުވީ، އެ ޙައްޤު ހޯއްދަވަން މަސައްކަތް ކުރައްވާނެ ކަމަށެވެ. އަދި ވަޒީރެއްގެ ހައިސިއްޔަތުން ގައުމީ މަޖިލީހުގައި އިންނެވިފައި، ގައުމީ މަޖިލީހުގެ އިންތިޚާބުގައި ވާދަނުކުރެވުމަކީ ހަމަޖެހޭ ކަމެއް ނޫންކަމަށް މަހުލޫފު ވިދާޅުވިއެވެ.
މަހުލޫފު ވަނީ މި ކަމަކީ އެމްޑީޕީން އަބަދު ވަކާލާތުކުރި، އިންތިޚާބުތަކުގައި ވާދަކުރުމުގެ ހައްޤާ ވެސް ދިމާ އިދިކޮޅު، އަދި ޑިމޮކްރެސީގެ ރޫހާ ވެސް ޚިލާފު ނިންމުމެއްކަމަށް ވިދާޅުވެފައެވެ. ޚުދު އެ ޕާޓީގެ ރައީސްކަމާއި، ނައިބު ރައީސް ކަމުގެ އިތުރުން، ޗެއަރޕާސަން އަދި ޕްރައިމަރީތަކަށް ވެސް ޝަރުތުހަމަވާއިރު، ގައުމީ މަޖިލީހުގެ އިންތިޚާބުގައި ވާދަކުރުމުގެ ފުރުސަތު ނެތުމުން އެކަމުގެ ކަންބޮޑުވުން މަހުލޫފު ވަނީ ފާހަގަކުރައްވާފައެވެ.
މަހުލޫފު އިތުރަށް ވިދާޅުވީ، މިހާރު ހިނގަމުން މިދާ ކަންކަމަކީ އެމްއެމްޕީއާރްސީ ޚިޔާނާތުގެ ތަހުގީގާ ގުޅިގެން ހިނގަމުންދާ ކަންކަމެއް ނޫން ކަމަށެވެ. އަދި އެތައް ޤުރުބާނީއެއްވެ، މިހާރުވެސް ސަރުކާރުގައި ވަރަށް ރަނގަޅު ނަތީޖާ ނެރެދީފައިވާއިރު، ވެގެން މި އުޅޭގޮތް އެއްގޮތަކަށް ވެސް ނުވިސްނޭ ކަމަށް މަހުލޫފު ވަނީ ވިދާޅުވެފައެވެ.
މި މައްސަލައިގައި ފެށުނީއްސުރެ އެކި ދިމަދިމާލުން ސިޔާސީ ނުފޫޒު ވަދެފައިވާކަމަށް މިނިސްޓަރު މަހުލޫފު ތުހުމަތު ކުރައްވައެވެ. މަހުލޫފު ވިދާޅުވީ، ކުރިން ނިންމަވައިގެން ހުންނެވީ ޕީޖީ އޮފީހުން ގޮތެއް ނިންމުމުން އިސްތިއުފާ ދެއްވުމަށް ކަމަށެވެ. ނަމަވެސް ކަންކަން މިހާ ގޯސްކޮށް ދާތީ ދައުވާ ކުރިޔަސް ދެން އިސްތިއުފާ ދެއްވުމާމެދު ވިސްނަވާނެކަމަށް މަހުލޫފު ވިދާޅުވިއެވެ.
މި މައްސަލައާ ގުޅިގެން ރައީސް އިބްރާހިމް މުހައްމަދު ޞާލިހު ވިދާޅުވީ އެމްއެމްޕީއާރްސީ ޚިޔާނާތުގެ ތަހުގީގާ ގުޅިގެން މަހުލޫފުގެ މައްޗަށް ތުހުމަތު ކުރެވޭ މައްސަލައިގައި ޕީޖީ އޮފީހުން އަވަހަށް ގޮތެއް ނިންމަވަން ޖެހޭކަމަށެވެ.
