ތަރައްގީއާއެކު މާލޭގެ ވައި ވަރަށް ބޮޑަށް ނުސާފުވެއްޖެ، މާލެ މިސާލަކަށް ނަގަން ހެޔޮނުވާނެ: އީޕީއޭ

އަތޮޅުތެރޭގައި ތަރައްގީގެ މަޝްރޫއުތައް ހިންގާއިރު މިސާލެއްގެ ގޮތުގައި މާލެ ނަގާ ވަރަށްވުރެ މާލޭގެ ހާލަތު ގޯސްވެފައިވާކަމަށް އެންވަޔަރަންމެންޓަލް ޕްރޮޓެކްޝަން އެޖެންސީ (އީޕީއޭ)ގެ ޑިރެކްޓަރ ޖެނެރަލް އިބްރާހިމް ނައީމް ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަމުން ނައީމް ވިދާޅުވީ އަތޮޅުތެރެއަށް ތަރައްގީގެ އެކި މަޝްރޫއުތައް ގެންދަންޖެހޭ ކަމަށެވެ. އެހެންނަމަވެސް ތަރައްގީގެ މަޝްރޫއުތައް ގެންދާއިރު، ވަކި ލެވެލްއެއްގައި މިކަންކަން ހިފެހެއްޓިފައި ހުރުން މުހިންމު ކަމަށް ނައީމް ވިދާޅުވިއެވެ.

އަތޮޅުތެރެއަށް ތަރައްގީގެ މަޝްރޫއުތައް ގެންދާއިރު، މިސާލެއްގެ ގޮތުގައި ބަލަންވީ ދުބާއީ ސިންގަޕޫރު އަދި މާލެ ފަދަ ތަންތަން ނޫން ކަމަށް އޭނާ ވިދާޅުވިއެވެ. މާލެއަށް އައި ތަރައްގީއާއެކު މާލޭގެ ހާލަތު އެއަށްވުރެ މާ ބޮޑަށް ގޯސްވެފައިވާކަމަށް ނައީމް ވިދާޅުވިއެވެ. ނައީމް ވިދާޅުވީ މާލޭގެ ހާލަތު ގޯސްވެފައިވާ މިންވަރު މާލޭގެ ވައި ތަޣައްޔަރު ވެފައިވާ މިންވަރުން ހާމަވާ ކަމަށެވެ.

އަތޮޅުތެރެއަށް ތަރައްގީގެ މަޝްރޫއުތައް ގެންދާއިރު ތިމާވެއްޓަށް ވަރަށް ޚާއްސަ އިސްކަމެއް ދޭން ޖެހޭ ކަމަށާއި، އަތޮޅުތެރެއަކީ ވަރަށް ބޮޑަށް ލޯކަލް ޓޫރިޒަމަށް ބަރޯސާވެފައިވާ ތަންތަނަށްވާއިރު، އެކަމަށް ކުރާނެ އަސަރާ ދޭތެރޭ ވެސް ވިސްނަންޖެހޭ ކަމަށް ނައީމް ވިދާޅުވިއެވެ.

ނައީމް އިތުރަށް ވިދާޅުވީ ހަރުދަނާ ނިޒާމެއްގެ ތެރެއިން، ވައިނުސާފުވެފައިވާ މިންވަރު ބެލޭނެ ގޮތެއް މާލޭގައި މިވަގުތު ގާއިމްކުރެވިފައި ނުވާ ކަމަށެވެ. މާލޭގައި ވައި ނުސާފުވެފައިވާ މިންވަރު ކޮންމެވެސް ވަރަކަށް ބެލޭ ކަމަށާއި، އަތޮޅުތެރޭގައި ވައި ނުސާފުވެފައިވާ މިންވަރު އެއްވެސް ވަރަކަށް ނުބެލޭކަމަށް ނައީމް ވަނީ ވިދާޅުވެފައެވެ.

ނައީމް ވިދާޅުވީ މީހުން ދިރިއުޅޭ މާހައުލުގައި ވައި ނުސާފުވެފައިވާ މިންވަރު ބެލުމަކީ ވަރަށް ބޮޑު އިސްކަމެއް ދީގެން ކުރަންޖެހޭ ކަމެއް ކަމަށެވެ. ދިރިއުޅޭ މާހައުލު ނުސާފުވުމަކީ އޭގެ ސަބަބުން ފުއްޕާމެއަށް ޖެހޭ ބަލިތަކާއި، އަދިވެސް އެހެނިހެން ބަލިތައް ޖެހުމަށް މަގުފަހިކުރުވާ ކަމެއް ކަމަށް އޭނާ ވިދާޅުވިއެވެ. އެހެންކަމުން އެންމެ ކުޑަމިނުން މާލޭގައި އެއާ ކޮލިޓީ މޮނިޓަރިން ސްޓޭޝަންތަކެއް ހަރުކުރެވެން ޖެހޭކަމަށް ނައީމް ވިދާޅުވިއެވެ. މިއީ ވީހާވެސް އަވަހަކަށް ކުރުން މުހިންމު ކަމެއް ކަމަށާއި، ބަލިތަކަށް ހުށަހެޅޭ މިންވަރު ވެސް މިކަމުން ދަށްކޮށްދޭނެ ކަމަށް ނައީމް ވަނީ ވިދާޅުވެފައެވެ.