ތަންތަން ހިއްކައި ފުންކުރުމަކީ ކޮންމެހެން ކުރަންޖެހިގެން ނޫނީ ކޮށްގެންވާނެ ކަމެއް ނޫން: އީޕީއޭ
15 އޯގަސްޓު 2021 | އާދީއްތަ 17:43ތަންތަން ހިއްކުމުގެ ކުރިން ޕްލޭނެއް އެކުލަވާލަންޖެހޭ
ގުޅީފަޅު ޕޯރޓް ޕްރޮޖެކްޓް
ތަންތަން ހިއްކައި ފުންކުރުމަކީ ކޮންމެހެން ކުރަންޖެހޭ ހާލަތެއްގައި ނޫނީ ކޮށްގެންވާނެ ކަމެއް ނޫން ކަމަށް އެންވަޔަރަންމެންޓް ޕްރޮޓެކްޝަން އެޖެންސީ (އީޕީއޭ)ގެ ޑިރެކްޓަރ ޖެނެރަލް އިބްރާހީމް ނަޢީމް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ނަޢީމް ވިދާޅުވީ ބޮޑެތި ފަޅުތައް ހިއްކާ ހިއްކުމަށް އެ އެޖެންސީން އެއްވެސް ވަރަކަށް ތަރުހީބު ނުދޭކަމަށެވެ. އަދި ތަންތަން ހިއްކައިގެން ނަގާ ވެއްޔަކީ އިއާދަނުކުރެވޭނެ އެއްޗެއް ކަމުގައި ގަބޫލުކުރައްވާކަމަށެވެ.
ވެލި ހުރި ސަރަހައްދުތަކުން ވެލި ނަގާއިރު އެތަނުން ނެގި ވެލި އަލުން އުފެދެންވެސް ދުވަސްތަކެއް ނަގާކަން ނަޢީމް ފާހަގަކުރެއްވިއެވެ. އެހެންކަމުން ތަންތަން ހިއްކުމާއި، ތަންތަން ހިއްކުމަށްޓަކައި ވެލި ހުރި ތަންތަނުން ވެލި ނެގުމަކީ ކޮންމެހެން ކުރަންޖެހޭ ހާލަތެއްގައި ނޫނީ ކޮށްގެންވާނެ ކަމެއް ނޫން ކަމަށް އޭނާ ވިދާޅުވިއެވެ.
ނަޢީމް ވިދާޅުވީ, ތަންތަން ހިއްކުމާއި ފުން ކުރުމުގެ މަސައްކަތަކީ ވަރަށް ރަނގަޅު ޕްލޭނެއް އެކުލަވައިލެވިގެން ކުރަންޖެހޭ މަސައްކަތެއް ކަމަށާއި, މި ޕްލޭންގެ ތެރެއިން, އެތަނަކީ ފުން ކުރުމަށް ނުވަތަ ހިއްކުމަށް އެންމެ އެކަށީގެންވާ ތަނެއް ކަމުގައި ޔަގީންކުރަންޖެހޭ ކަމަށެވެ.
ނައީމް އިތުރަށް ވިދާޅުވީ ސަރުކާރުން ކުރިއަށްގެންދާ މިފަދަ ޕްރޮޖެކްޓުތަކަށް އީޕީއޭގެ ފަރާތުން ލިޔުމުން ލަފާދޭ ކަމަށެވެ. އެހެންނަމަވެސް މި ޕްރޮޖެކްޓުތަކުގެ އީއައިއޭ ރިޕޯޓު ހަދަން އީޕީއޭއާ ހަވާލުކުރަނީ އެ ޕްރޮޖެކްޓު ރާވައި، މަސައްކަތް ކުރިއަށްގެންދަން ބަޔަކާ ހަވާލުކޮށް ނިންމާފައި ކަމަށެވެ. އެ ޕްރޮޖެކްޓަކީ އެންމެ އެކަށީގެންވާ ގޮތަކަށް ފަރުމާ ކޮށްފައިވާ ޕްރޮޖެކްޓަކަށް ނުވާ ހާލަތްތަކުގައި އީޕީއޭއިން ޕްރޮޖެކްޓް ރިޖެކްޓް ކުރިއަސް އެ މަޝްރޫއެއް ކުރިއަށްގެންދިއުމުގެ ބާރު މިނިސްޓަރަށް މިހާރު ލިބިގެންވާކަމަށެވެ. އެފަދަ ހާލަތްތަކުގައި އީޕީއޭއިން މަސައްކަތްކުރަނީ އެ ޕްލޭނެއް ރިޖެކްޓު ނުކޮށް، ޕްލޭނަށް ބަދަލު ގެނެސްގެން ކުރިއަށް ގެންދިއުމަށްކަން ނަޢީމް ފާހަގަކުރެއްވިއެވެ.
