ކ. މާލެ
|
15 އޯގަސްޓް 2021 | އާދީއްތަ 03:32
އަލަވޭސް އާއި ރެއާލް ބައްދަލުކުރި މެޗުގެ ތެރެއިން
އަލަވޭސް އާއި ރެއާލް ބައްދަލުކުރި މެޗުގެ ތެރެއިން
ގެޓީ އިމޭޖަސް
ސްޕެނިޝް ލީގު
ފުރަތަމަ މެޗުން ރެއާލަށް ފަސޭހަ މޮޅެއް
 
އަލަވޭސް އަތުން ރެއާލް މޮޅުވީ 4-1 ގެ ނަތީޖާއަކުން
 
އަލަބާ އާއި ބޭލް ފުރަތަމަ އެގާރައިގައި ވަނީ ހިމަނާފައި

މި ސީޒަނުގެ ސްޕެނިޝް ލީގުގައި ކުޅުނު ފުރަތަމަ މެޗުން ޑެޕޯޓިވޯ އަލަވޭސް އަތުން ފަސޭހަކަމާއެކު ރެއާލް މެޑްރިޑް މޮޅުވެއްޖެއެވެ.

ރަށުން ބޭރުގައި ކުޅުނު މެޗުން ރެއާލް މޮޅުވީ 4-1 ގެ ނަތީޖާއަކުންނެވެ.

މި މެޗަކީ އެވަޓަން ދޫކޮށްލައި އިޓަލީގެ ތަޖުރިބާކާރު ކޯޗު ކާލޯ އަންޗެލޮޓީ އަލުން އަނބުރާ ރެއާލާ ހަވާލުވިފަހުން އެ ޓީމުން ކުޅުނު ފުރަތަމަ މެޗެވެ. އަދި މި މެޗުގައި ރެއާލުން ވަނީ މި ފަހަރުގެ ޓްރާންސްފާ ބާޒާރުގައި ބަޔާން މިއުނިކް ދޫކޮށް އެ ޓީމާ ގުޅުނު އޮސްޓްރިއާގެ ޑިފެންޑަރު ޑޭވިޑް އަލަބާ އާއި ވޭލްސްގެ ތަރި ގެރެތު ބޭލް ފުރަތަމަ އެގާރައިގައި ހިމަނާފައެވެ.

ހޮނިހިރު ދުވަހުގެރޭ ކުޅުނު މެޗުގައި ރެއާލުން މޮޅު ކުޅުމެއް ދެއްކިއިރު، އެ ޓީމުން ލީޑު ނަގާފައިވަނީ ދެވަނަ ހާފު ފަށައިގެން ތިންވަނަ މިނެޓުގައެވެ. އެޑެން ހަޒާޑް ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ ތަޖުރިބާކާރު ފޯވާޑް ކަރިމް ބެންޒެމާއެވެ. އަދި އޭގެ އަށް މިނެޓު ފަހުން ނަޗޯ ފެނާންޑޭޒް ވަނީ ރެއާލުގެ ލީޑު ފުޅާކޮށްދީފައެވެ.

މި މެޗުގައި ރެއާލުން ގިނަ ހަމަލާތަކެއް އުފެއްދިއިރު، މެޗުގެ 62 ވަނަ މިނެޓުގައި ބެންޒެމާ ވަނީ އިތުރު ލަނޑެއް ޖަހާފައެވެ. އަދި މެޗުގެ އިތުރު ވަގުތުގައި އަލަބާ ތަނަވަސްކޮށްދިން ފުރުސަތަކުން އެ ޓީމުގެ ހަތަރުވަނަ ލަނޑު ކާމިޔާބުކޮށްދިނީ ވިނީޝިއުސް ޖޫނިއާއެވެ.

އަންޗެލޮޓީގެ އިރުޝާދުގެ ދަށުން މި ސީޒަނުގެ ލީގުގައި ކުޅުނު ފުރަތަމަ މެޗުން ރެއާލް މޮޅުވިއިރު، މިދިޔަ ސީޒަން އެ ޓީމުން ނިންމާލާފައިވަނީ ކާމިޔާބީއެއް ނެތިއެވެ. މިދިޔަ ސީޒަނުގައި އެ ޓީމަށް އިރުޝާދުދިނީ ޒިނެދިން ޒިދާނެވެ. އެކަމަކު ސީޒަން ނިމުމާއެކު އޭނާ ވަނީ ރެއާލުގެ ކޯޗުގެ މަގާމުން ވަކިވެފައެވެ.

އެންމެ ފަހުން އަޕްޑޭޓް ކުރީ: 2 މަސް ކުރިން
ރިވިއު ކުރީ: ހުސައިން ފަރިޔާޒް
0%
0%
0%
0%
0%
100%
ކޮމެންޓް