މެސީ ދަނޑުމަތިން ފެންނަން ދުވަސްކޮޅެއް ނަގާނެ

އާޖެންޓީނާގެ ތަރި ލިއޮނެލް މެސީ ދަނޑުމަތިން ފެންނަން އަދި ދުވަސްކޮޅެއް ނަގާނެ ކަމަށް ޕީއެސްޖީގެ ކޯޗު މައުރީސިއޯ ޕޮޗެޓީނޯ ބުނެފިއެވެ.

އުމުރުން 34 އަހަރުގެ މެސީ ޕީއެސްޖީއަށް ބަދަލުވީ ހިލޭ ޓްރާންސްފާއެއްގެ ދަށުންނެވެ. 21 އަހަރަށްފަހު ބާސެލޯނާ ދޫކޮށް މެސީ ޕީއެސްޖީއަށް ބަދަލުވިއިރު، އޭނާ ވަނީ ޕީއެސްޖީއާއެކު ދެ އަހަރުގެ އެއްބަސްވުމެއް ހަދާފައެވެ. އެހެންކަމުން އެއްބަސްވުމުގެ މުއްދަތު ހަމަވާނީ 2023 ވަނަ އަހަރުގެ ހޫނު މޫސުމުގައެވެ. އަދި މި އެއްބަސްވުމުގެ ދަށުން ޕީއެސްޖީން ބޭނުންނަމަ މެސީ އިތުރު އެއް އަހަރަށް އެ ޓީމުގައި މަޑުކުރުވޭނެއެވެ.

މިދިޔަ އަންގާރަ ދުވަހުގެރޭ ޕީއެސްޖީގެ އެއްބަސްވުމުގައި މެސީ ސޮއި ކުރިއިރު، އޭނާ އަދި މިހާތަނަށް އެ ޓީމާއެކު ފަރިތަކޮށްފައިވަނީ ދެ ސެޝަނެއްގައެވެ. ފްރެންޗް ލީގުގައި ހޮނިހިރު ދުވަހުގެރޭ ސްޓްރަސްބޯގާ ދެކޮޅަށް ޕީއެސްޖީ ކުޅޭ މެޗުގައި މެސީ ފެނިދާނެތޯ ނޫސްވެރިއަކު ކުރި ސުވާލަށް ޖަވާބުދެމުން ޕޮޗެޓީނޯ ބުނީ މެސީ ދަނޑުމަތިން ފެންނަން އަދި ދުވަސްކޮޅެއް ނަގާނެ ކަމަށެވެ. އެގޮތުން ކޮޕަ އެމެރިކާ ފުޓްބޯޅަ މުބާރާތަށްފަހު މިވީ މަހެއްހާ ދުވަސް ފަހުން މެސީ މާގިނައިން ފަރިތަކޮށްފައިނުވާ ކަމަށާއި، އެހެންކަމުން ބޭނުންވަނީ ފިޔަަވަޅަކަށް ފަހު ފިޔަވަޅެއް ކުރިއަށްދާން ކަމަށްވެސް ބުންޏެވެ. އަދި މެޗުގައި މެސީ ބޭނުންކުރާނީ ފިޓްނަސްއާ ހުރިހާ ކަމަކަށް ބެލުމަށްފަހު ކަމަށްވެސް ޕޮޗެޓީނޯ ބުންޏެވެ.

މެސީ ދަނޑުމަތިން ފެންނަން އަދި ދުވަސްކޮޅެއް ނަގާނެ ކަމަށް ޕޮޗެޓީނޯ ބުނިއިރު، މި ފަހަރުގެ ޓްރާންސްފާ ބާޒާރުގައި ހިލޭ ޓްރާންސްފާއެއްގެ ދަށުން ޕީއެސްޖީއާ ގުޅުނު ރެއާލް މެޑްރިޑުގެ ކުރީގެ ކެޕްޓަން ސާޖިއޯ ރާމޯސްއަށް ވަނީ އަނިޔާވެފައެވެ. ފަޔަށް ލިބިފައިވާ އެ އަނިޔާއިން ރަނގަޅުވެ، އޭނާއަށް ޕީއެސްޖީގެ މެޗުތަކުގައި ކުޅެވޭނީ އަންނަ ސެޕްޓެމްބަރު މަހުގައި ކަމަށް ރިޕޯޓުތައް ބުނެއެވެ.

މި ފަހަރުގެ ޓްރާންސްފާގައި ޕީއެސްޖީން ވަނީ މެސީ އާއި ރާމޯސްގެ އިތުރުންވެސް މަޝްހޫރު ގިނަ ކުޅުންތެރިންތަކެއްގެ ސޮއި ހޯދާފައެވެ. އެގޮތުން ހިލޭ ޓްރާންސްފާއެއްގެ ދަށުން އެ ޓީމުން ވަނީ ލިވަޕޫލުގެ މިޑްފީލްޑަރު ޖިއޮޖީނިއޯ ވައިނަލްޑަމާއި، ނިމިދިޔަ ޔޫރޯ ފުޓްބޯޅަ މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދި އިޓަލީގެ ގޯލްކީޕަރު ޖިއަންލުއިޖީ ޑޮންނަރުއްމާގެ ސޮއިވެސް ހޯދާފައެވެ. ދެން އެ ޓީމުން މި ޓްރާންސްފާގައި ސޮއި ހޯދި ކުޅުންތެރިއަކީ 60 މިލިޔަން ޔޫރޯ ޚަރަދުކޮށް ގެނައި އިންޓަ މިލާނުގެ ޑިފެންޑަރު އަޝްރަފް ހަކީމީއެވެ.

މިދިޔަ ސީޒަނުގެ ފްރެންޗް ލީގު ޕީއެސްޖީއަށް ގެއްލުނުއިރު، މި ސީޒަނުގެ ލީގުގައި ކުޅުނު ފުރަތަމަ މެޗުން ޕީއެސްޖީ ވަނީ އަލަށް ޕްރޮމޯޓުވި ޓުއާ އަތުން ހަނިގޮތަކަށް މޮޅުވެފައެވެ. މިދިޔަ ހަފުތާގައި ކުޅުނު އެ މެޗުން ޕީއެސްޖީ މޮޅުވީ 2-1 ގެ ނަތީޖާއަކުންނެވެ.