ޝަރުތުތަކަކާއެކު ވެސް އައްމަޓީ ބަންދުން ދުލެއް ނުކުރި
ހުޅުމާލޭގައި 3،000 ފްލެޓް އެޅުމަށްޓަކައި ބުކިންގ ފީގެ ގޮތުގައި ގިނަ ބައެއްގެ އަތުން އެޑްވާންސްކޮށް ފައިސާނެގި
އަހުމަދު މޫސާ މުހައްމަދު (އައްމަޓީ) / އައްމަޓީ ހައްޔަރު ކުރުމަށް 14 ފަހަރެއްގެ މަތިން ކްރިމިނަލް ކޯޓުން އަމުރު ނެރެފައިވޭ
ސީލައިފް މޯލްޑިވްސް ޕްރައިވެޓް ލިމިޓެޑްގެ ވެރިޔާ ވ. ތިނަދޫ، ރެޑްހައުސް އަހުމަދު މޫސާ މުހައްމަދު (އައްމަޓީ) ޝަރީއަތް ނިމެދެން ބަންދުކުރުމަށް ނިންމި ނިންމުން ދަމަހައްޓަން ކްރިމިނަލް ކޯޓުން ނިންމައިފިއެވެ.
އައްމަޓީގެ ބަންދު މުރާޖަޢާކޮށް ދިނުމަށް ހުށަހެޅީ ދައުލަތުންނެވެ. ދައުލަތުން އަމުރު މުރާޖަޢާކޮށްދިނުމަށް އެދިފައިވަނީ، އޭނާގެ މައްޗަށް 42 ދައުވާއެއް ކުރިމިނަލް ކޯޓުގައި އުފުލާފާއިވާތީ، ކޯޓަށް ހާޒިރުނުވެ ފިލާފައިވާނެ ކަމަށް ބެލެވޭތީއެވެ.
ތަހުގީގު މަރުހަލާގައި ވެސް އައްމަޓީ ހައްޔަރު ކުރުމަށް 14 ފަހަރެއްގެ މަތިން ކްރިމިނަލް ކޯޓުން އަމުރު ނެރެފައިވެއެވެ. ހައްޔަރުކުރުމުގެ އަމުރު އެތައް ފަހަރެއްގެ މަތިން ނެރުނުކަން އެނގި ހުރެ ތަހުގީގަށް ހާޒިރު ނުވުމުން އިންޓަރޕޯލް މެދުވެރިކޮށް ރެޑް ނޯޓިސް ވެސް ނެރެފައިވެއެވެ. އެއަށްފަހު އޭނާ ހައްޔަރުކޮށްފައިވަނީ، ވިސާއާ ނުލައި، ސްރީލަންކާގައި އުޅެމުންދަނިކޮށް، އެ ގައުމުން ޑީޕޯޓްކޮށްލުމުންނެވެ.
އައްމަޓީގެ ފަރާތުން ހުށަހަޅާފައިވަނީ ހަތަރު ފިޔަވަޅެއް އެޅުމަށްފަހު އޭނާ ދޫކޮށްލުމަށެވެ. އެއީ ޕާސްޕޯޓު ހިފެހެއްޓުން، މާލެއިން ފުރާނަމަ ކޯޓުގެ ހުއްދަ ހޯދުން، ޖާމިނުވާނެ ފަރާތެއް ކަނޑައެޅުމަށްފަހު ޝަރުތުތަކަކާއެކު ދޫކޮށްލުން އަދި، ތަހުގީގު އިދާރާއަށް ނުވަތަ އެނޫން ވެސް ތަނަކަށް ވަކި އުސޫލެއްގެ ދަށުން ހާޒިރުވުމަށް ޝަރުތުކޮށް ދޫކޮށްލުމެވެ.
ދެފަރާތުގެ ވާހަކަތަކަށް ރިއާޔަތްކުރުމަށްފަހު ކޯޓުން ނިންމީ، އެއްވެސް ޝަރުތަކާއެކު ވެސް އައްމަޓީ ބަންދުން ދޫކޮށްލެވެން ނެތް ކަމަށެވެ. ދޫކޮށްލައިފިނަމަ އޭނާ ފިލާފާނެ ކަމަށް ބެލެވޭ ކަމަށާއި، އުފުލާފައިވާ 42 ދައުވާއަކީ ވެސް ގިނަ އަދަދެއްގެ ފައިސާއަށް ޚިޔާނަތްތެރިވުން ކަމަށެވެ. ކުށް ކުރިކަމަށް ތުހުމަތުކުރެވޭ ވަރަށް ހެއްކާއި ގަރީނާ، ލިބިފައިވާކަމަށް ޝަރީއަތަށް ފާހަގަވާކަމަށް ވެސް ބުނެފައިވެއެވެ.
ހުޅުމާލޭގައި 3000 ހައުސިން ޔުނިޓް އެޅުމުގެ އެއްބަސްވުމުގައި ސީލައިފްއާ އެކު އެޗްޑީސީން އެއްބަސްވުމެއްގައި ސޮއިކޮށްފައި ވަނީ 13 މާޗު 2014 ގައެވެ. މި މަޝްރޫއުގެ މަސައްކަތް ކުރިއަށް ގެންދިޔުމަކާ ނުލައި އެތައް ރައްޔިތުންގެ އަތުން އޭނާ ވަނީ ފައިސާ ނަގާފައެވެ.
މި މައްސަލައިގެ ހެކިންގެ ގޮތުގައި، އެ ކުންފުނީގައި ކުރިން މަސައްކަތް ކުރި 9 މުވައްޒަފަކު ހުށަހަޅާފައިވެއެވެ. އައްމަޓީއަކީ ކުންފުނީގެ އެމްޑީ ކަމަށް ވެފައި އެމީހުންނާ ޚާއްސަ ގުޅުމެއް އޮންނަ މީހެއް ކަމަށް ވުމުން، ހެއްކަށް ނުފޫޒު ފޯރުވުމުގެ ފުރުސަތު ވަރަށް ބޮޑު ކަމަށް ދައުލަތުން ބުނެފައިވެއެވެ.
