ޕީއެސްޖީއާއެކު ޔުއެފާ ޗެމްޕިއަންސް ލީގު ކާމިޔާބުކުރެވޭނެ ކަމަށް އެ ޓީމާ ދާދި ފަހުން ގުޅުނު އާޖެންޓީނާގެ ތަރި ލިއޮނަލް މެސީ ބުނެފިއެވެ.

އުމުރުން 34 އަހަރުގެ މެސީ ޕީއެސްޖީއަށް ބަދަލުވީ ހިލޭ ޓްރާންސްފާއެއްގެ ދަށުންނެވެ. 21 އަހަރަށްފަހު ބާސެލޯނާ ދޫކޮށް މެސީ ޕީއެސްޖީއަށް ބަދަލުވިއިރު، އޭނާ ވަނީ ޕީއެސްޖީއާއެކު ދެ އަހަރުގެ އެއްބަސްވުމެއް ހަދާފައެވެ. އެހެންކަމުން އެއްބަސްވުމުގެ މުއްދަތު ހަމަވާނީ 2023 ވަނަ އަހަރުގެ ހޫނު މޫސުމުގައެވެ. އަދި މި އެއްބަސްވުމުގެ ދަށުން ޕީއެސްޖީން ބޭނުންނަމަ މެސީ އިތުރު އެއް އަހަރަށް އެ ޓީމުގައި މަޑުކުރުވޭނެއެވެ.

ރަސްމީކޮށް ޕީއެސްޖީ ކުޅުންތެރިއެއްގެ ގޮތުގައި ބުދަ ދުވަހު މީޑިއާއަށް މެސީ ތައާރަފުކުރިއިރު، ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން މެސީ ބުނީ ކެރިއަރުގައި އަދި އެއް ފަހަރު ޗެމްޕިއަންކަން ލީގު ކާމިޔާބުކުރަން ބޭނުންވާ ކަމަށާއި، އެކަމަށް ބަލާއިރު ޕީއެސްޖީއަކީ އެ ފެންވަރު ހުރި ޓީމެއް ކަމަށެވެ. އެހެންކަމުން އެ ކާމިޔާބީ ހޯދަން ތައްޔާރަށް ހުރި ކަމަށްވެސް ބުންޏެވެ.

ޕީއެސްޖީއާއެކު ޗެމްޕިއަންސް ލީގު ހޯދޭނެ ކަމަށް މެސީ ބުނިއިރު، އޭނާ އެންމެ ފަހުން ޗެމްޕިއަންސް ލީގު ކާމިޔާބުކޮށްފައިވަނީ 2014-2015 ވަނަ އަހަރުގެ ސީޒަނުގައެވެ. އެކަމަކު މެސީ ވަނީ ބާސާއެކު ހަތަރު ފަހަރު ޗެމްޕިއަންސް ލީގު ކާމިޔާބުކޮށްފައެވެ.

ޕީއެސްޖީން ބޮޑު ޚަރަދެއް ކުރުމަށްފަހު ޗެމްޕިއަންސް ލީގަށް އަމާޒުހިފާފައިވީ ނަމަވެސް، އެ ޓީމުގެ ތާރީޚުގައިވެސް އަދި މިހާތަނަށް ޗެމްޕިއަންސް ލީގު ކާމިޔާބުކުރެވިފައެއް ނުވެއެވެ. އެ ކާމިޔާބީއާ އެންމެ ގާތަށް ޕީއެސްޖީ ގޮސްފައިވަނީ 2019-2020 ވަނަ އަހަރުގެ ސީޒަނުގައެވެ. އެ ފަހަރުގެ ފައިނަލުގައި މުޅިން އަލަށް ޕީއެސްޖީ ވާދަކުރި ނަމަވެސް، ފައިނަލް މެޗުން ޕީއެސްޖީ ވަނީ ބަޔާން މިއުނިކް އަތުން ބަލިވެފައެވެ.

ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ޕީއެސްޖީގެ ރައީސް ނާސިރު އެލް-ޚެއްލާފީ ވިދާޅުވީ މެސީއާއެކު ޕީއެސްޖީއަކީ މި ވަގުތު ޔޫރަޕުގައި އޮތް އެންމެ ވަރުގަދަ އެއް ކުލަބު ކަމަށެވެ. އަދި ޕީއެސްޖީގައި މިހާރު އޮތް ސްކޮޑާއެކު ބޭނުންވާ ކާމިޔާބީތައް ހޯދޭނެ ކަމަށްވެސް ވަނީ ވިދާޅުވެފައެވެ.

ދެ އަހަރުގެ އެއްބަސްވުމެއްގެ ދަށުން މެސީ ޕީއެސްޖީއާ ގުޅުނުއިރު، އެ ޓީމާއެކު މެސީ ހަދާފައިވާ އެއްބަސްވުމުގެ ދަށުން އޭނާއަށް އަހަރެއްގެ މައްޗަށް 35 މިލިޔަން ޔޫރޯގެ މުސާރާއެއް ލިބޭނެއެވެ. ރިޕޯޓުތައް ބުނާ ގޮތުން ޕީއެސްޖީން މެސީގެ ސޮއި ހޯދީ ފައިނޭންޝިއަލް ފެއާޕްލޭ (އެފްއެފްޕީ) ގަވައިދުތަކާ ޚިލާފުނުވެތޯ ކަށަވަރުކުރަން ސްޕެއިނުގެ ވަކީލުންގެ ޓީމަކުން އަންނަނީ ޔުއެފާއަށް މައްސަލައެއް ހުށަހަޅަން ތައްޔާރުވަމުންނެވެ. އެ ވާހަކަތަކަށް ރައްދުދެމުން ޚެއްލާފީ ހެއްލާފީ ވިދާޅުވީ މެސީގެ ސޮއި ހޯދީ ޕީއެސްޖީގެ މާލީ ކަންތައްތައް ވަރަށް ރަނގަޅަށް ބެލުމަށްފަހު ކަމަށާއި، ޕީއެސްޖީން ގަވާއިދުތަކާ ޚިލާފުވެފައިނުވާ ކަމަށެވެ.

ޕީއެސްޖީން މެސީގެ ސޮއި ހޯދިއިރު، އެ ކުލަބުން ވަނީ މި ޓްރާންސްފާ ބާޒާރުގައި މަޝްހޫރު ގިނަ ކުޅުންތެރިންތަކެއްގެ ސޮއި ހޯދާފައެވެ.