ޗެލްސީއަށް ބަދަލުވާން ބެލްޖިއަމުގެ ފޯވާޑް ރޮމެލޫ ލުކާކޫ ނިންމާފައިވާތީ، ރޯމާގެ ކެޕްޓަން އެޑިން ޒެކޯ ގަންނަން އިންޓަ މިލާނުން މަސައްކަތްކުރަމުން އަންނަ ކަމަށް ރިޕޯޓުތައް ބުނެފިއެވެ.
ރިޕޯޓުތައް ބުނާ ގޮތުން އުމުރުން 28 އަހަރުގެ ލުކާކޫ ވަނީ ޗެލްސީއަށް ބަދަލުވާން މެޑިކަލް ފުރިހަމަކޮށްފައެވެ. އަދި އަވަސް މުސްތަގުބަލެއްގައި ލުކާކޫ ޗެލްސީގެ އެއްބަސްވުމުގައި ސޮއިކުރާއިރު، އޭނާ ހޯދަން ޗެލްސީ 97.5 މިލިޔަން ޕައުންޑް ޚަރަދުކުރާނެ ކަމަށްވެސް ރިޕޯޓުތައް ބުނެއެވެ.
އެހެންކަމުން އިންޓައިން ރޯމާއަށް ކުޅެމުން އަންނަ ބޮސްނިއާގެ ފޯވާޑް ޒެކޯ ގެނައުމުގެ މަސައްކަތް މިހާރު ފަށާފައިވާ ކަމަށް އިޓަލީގެ މީޑިއާތަކުން ވަނީ ރިޕޯޓުކޮށްފައެވެ. ރިޕޯޓުތައް ބުނާ ގޮތުން އުމުރުން 35 އަހަރުގެ ޒެކޯ ވަނީ އިންޓައަށް ބަދަލުވާން މިހާރު އެއްބަސްވެފައެވެ. އަދި އޭނާ އިންޓައާއެކު ދެ އަހަރުގެ އެއްބަސްވުމެއް ހަދާނެ ކަމަށްވެސް ރިޕޯޓުތައް ބުނެއެވެ.
އިންޓައިން ޒެކޯ ހޯދަން މަސައްކަތްކުރަމުން އަންނައިރު، މިދިޔަ އަހަރު ޔުވެންޓަސްއިންވެސް ވަނީ އޭނާ ހޯދަން މަސައްކަތްކޮށްފައެވެ. މެންޗެސްޓާ ސިޓީން ވިދާލި ޒެކޯ ރޯމާއާ އެންމެ ފުރަތަމަ ގުޅުނީ 2015 ވަނަ އަހަރުގެ އޯގަސްޓް މަހުގެ ތެރޭގައި ލޯނު އެއްބަސްވުމެއްގެ ދަށުންނެވެ. އެކަމަކު ހަމަ އެ އަހަރުގެ އޮކްޓޯބަރު މަހު ރޯމާއިން ވަނީ ޒެކޯގެ އެއްބަސްވުން އާކޮށްފައެވެ.
ރޯމާގައި މިހާތަނަށް ހޭދަކުރި ހަ ސީޒަނުގައި ޒެކޯ ވަނީ އެ ޓީމަށް ކުޅެދިން 260 މެޗުގައި 119 ލަނޑު ކާމިޔާބުކޮށްފައެވެ. އަދި ބޮސްނިއާ ގައުމީ ފުޓްބޯޅަ ޓީމަށް މިހާތަނަށް ކުޅެދިން 114 މެޗުގައި ޒެކޯ ވަނީ 59 ލަނޑު ކާމިޔާބުކޮށްފައެވެ.
ރޯމާއާއެކު ޒެކޯއަށް އަދި މިހާތަނަށް ކާމިޔާބީއެއް ހޯދިފައި ނުވި ނަމަވެސް، އޭނާ ވަނީ މީގެ ކުރިން ސިޓީއާއެކު ގިނަ ކާމިޔާބީތަކެއް ހޯދާފައެވެ. އެގޮތުން ޒެކޯ ވަނީ ސިޓީއާއެކު އިނގިރޭސި ޕްރިމިއާ ލީގު ދެ ފަހަރު އަދި އިނގިރޭސި އެފްއޭ ކަޕާއި، އިނގިރޭސި ލީގު ކަޕް އެއް ފަހަރު ކާމިޔާބުކޮށްފައެވެ.
