"ކުރިން ހުރީ ޕީޖީ އޮފީހުން ގޮތެއް ނިންމީމަ އިސްތިއުފާ ދޭން، ނަމަވެސް ދެން ވިސްނާނަން"
ތަހުގީގުގައި ޗެއިން އޮފް ކަސްޓަޑީ ނެތްކަން ފާހަގަ ކުރެއްވި
ޔޫތު މިނިސްޓަރ އަހުމަދު މަހުލޫފު - މިނިސްޓަރ މިވަގުތު ހުންނެވީ މަގާމުން އެކަހެރި ކުރެވިފައި
އެމްއެމްޕީއާރްސީ ޚިޔާނާތުގެ ތަހުގީގާއި ގުޅިގެން ޕްރޮސެކިއުޓަރ ޖެނެރަލް (ޕީޖީ) އޮފީހުން ނިންމާ ގޮތަކަށް ބަލައި މަގާމުން އިސްތިއުފާ ދެއްވުމަށް ކުރިން ވިސްނެވި ނަމަވެސް، މިހާރު އެކަމުގައި އިތުރު ވިސްނުންފުޅެއް ގެންގުޅުއްވާކަން ޔޫތު މިނިސްޓަރ އަހުމަދު މަހުލޫފު ހާމަ ކުރައްވައިފިއެވެ.
އެމްއެމްޕީއާރްސީ ޚިޔާނާތާއި ގުޅިގެން މަހުލޫފުގެ މައްޗަށް ދައުވާކުރަން ފޮނުވާފައިވާއިރު، މަހުލޫފު މީގެ ކުރިން ވަނީ ވައްކަމެއް ކޮށްފައި ނޯންނާނެ ކަމަށާއި، އަދި މައްސަލަ ބެލުމަށްފަހު ގޯހެއް އުޅޭނަމަ އިސްތިއުފާ ދެއްވާނެ ކަމަށް ވިދާޅުވެފައެވެ. އެމްއެމްޕީއާރުސީގެ ޚިޔާނާތުގެ މައްސަލައާ ގުޅިގެން މަހްލޫފުގެ މައްޗަށް ދައުވާކުރުމަށް ޕީޖީ އޮފީހަށް ހުށައަޅާފައިވަނީ ޖޫން މަހުގެ ތެރޭގައެވެ.
މި މައްސަލައާ ގުޅިގެން މަހުލޫފު ކުރެއްވި ޓްވީޓެއްގައި ވިދާޅުވީ، އެމްއެމްޕީއާރްސީގެ މައްސަލަތައް ނިންމަން ނަގާފައިއޮތް ކޮމިޓީން ދައުވާ ނުކުރެވޭނެކަމަށް ބުނުމުން، އެމީހުންގެ އަތުން މައްސަލަ އަތުލައި އެހެން ބަޔަކާ ހަވާލުކޮށްފައިވާ ކަމަށެވެ. އަދި މި މައްސަލައިގެ ތަހުގީގުގައި ޗެއިން އޮފް ކަސްޓަޑީ ނެތްކަން ފާހަގަ ކުރައްވައި މަހުލޫފު ވިދާޅުވީ، ޗެއިން އޮފް ކަސްޓަޑީ ނެތް އެއްޗެއްގެ އެއްވެސް ގާނޫނީ ބުރަދަނެއް ނޯންނާނެ ކަމަށެވެ. މަހުލޫފު ވިދާޅުވީ، މި މައްސަލައާ ގުޅިގެން ލަންކާގެ ރައްޔިތެއްގެ ބަޔާން ކަނޑައެޅިގެން ރާއްޖޭގެ ގާނޫނުތަކާއި އަދި ލަންކާ ގާނޫނުތަކާއި ޚިލާފަށް ނެގި މައްސަލައެއް ފެންމަތިވެ ލަންކާގެ ކަމާގުޅޭ އިދާރާއަކުން އެ މައްސަލަ ބަލަމުންދާ ކަމަށެވެ. އަދި އެމައްސަލަ ފޮރިން މިނިސްޓްރީންވެސް ތަހުގީގު ކުރަމުންދާކަން ފާހަގަ ކުރައްވައި މަހުލޫފު ވަނީ ޖިނާއީ ތަހުގީގު ޒޫމް މެދުވެރިކޮށް ހިންގިއިރު ލަންކާގައި ހުންނަވާ ރާއްޖޭގެ ސަފީރުވެސް އިންނެވިކަމަށް ތުހުމަތު ކުރައްވާފައެވެ.
އޭގެ އިތުރުން، ފެށުނީއްސުރެ މި މައްސަލައިގެ ތެރެއަށް ސިޔާސީ ނުފޫޒު ވަދެފައިވާކަން ފާހަގަ ކުރައްވައި މަހުލޫފު ވިދާޅުވީ، މިއީ ސީދާ ޒާތީ ކަމެއް ކަމަށެވެ. އަދި ދައުވާ ކޮށްފިނަމަ ކޯޓު މަރުހަލާފައި އެ ވާހަކަތައް ހާމަވާނެކަންވެސް މަހުލޫފު ވަނީ ފާހަގަ ކުރައްވާފައެވެ.
މަހުލޫފު ވިދާޅުވީ، ކުރިން ނިންމަވައިގެން ހުންނެވީ ޕީޖީ އޮފީހުން ގޮތެއް ނިންމުމުން އިސްތިއުފާ ދެއްވުމަށް ކަމަށެވެ. ނަމަވެސް ކަންކަން މިހާ ގޯސްކޮށް ދާތީ ދައުވާ ކުރިޔަސް ދެން އިސްތިއުފާ ދެއްވުމާމެދު ވިސްނަވާނެކަމަށް މަހުލޫފު ވިދާޅުވިއެވެ. އަދި އެކަން ރައީސަށް ވެސް ރަސްމީކޮށް ދަންނަވާނެކަން ފާހަގަ ކުރައްވައި މަހުލޫފު ވިދާޅުވީ، މަގާމުން ވަކިކުރުމަކީ ރައީސުލްޖުހޫރިއްޔާއަށް ގާނޫނު އަސާސީން މަތިކޮށްފައިވާ ބާރެއް ކަމުން، ގޮތެއް ނިންމަވާނީ ރައީސް ކަމަށެވެ.
އެމްއެމްޕީއާރްސީ ޚިޔާނާތުގެ މައްސަލާގައި މަހުލޫފުގެ މައްޗަށް ދައުވާކުރުމަށް އެދި އެންޓިކޮރަޕްޝަން ކޮމިޝަނުން ޕީޖީ އޮފީހަށް ފޮނުވާފައިވާތީ ރައީސުލްޖުމްހޫރިއްޔާ ވަނީ މަހުލޫފް މަގާމުގެ މައްސޫލިއްޔަތުން ދުރުކުރައްވާފައެވެ. އެމްއެމްޕީއާރްސީ މައްސަލާގައި މަހުލޫފް މަގާމުން ދުރުކުރި މިއީ ދެވަނަ ފަހަރެވެ. މީގެ ކުރިން 2019 ވަނަ އަހަރުވެސް ލިސްޓެއްގައި މަހުލޫފުގެ ނަން ހިމެނިފައިވާތީ މަގާމުން ދުރުކުރުމަށް ފަހު އަނބުރާ މަސައްކަތަށް ނިކުންނެވީ އެކަން ސާފުވެ މަހުލޫފްގެ އެއްވެސް ބައިވެރިވުމެއް ނެތްކަން ހާމަވުމުންނެވެ.
އޭސީސީން މަހުލޫފްގެ މައްޗަށް ދައުވާކޮށްދިނުމަށް އެދި ފޮނުވިއިރު، އެ ކޮމިޝަނުން އެންމެ ފުރަތަމަ އާންމު ކުރި ލިސްޓުގައި ނަން ހިމެނިފައިވާތީ މަހުލޫފް ސަސްޕެންޑް ކުރީ ފެބްރުއަރީ 2019ގައެވެ. އޭރުވެސް މަހުލޫފް ވިދާޅުވީ އޭގެ ތެރެއިން އެކައުންޓަށް ޖަމާވެފައިވާ ފައިސާ އަކީ އޭނާގެ ކޮއްކޮއެއްގެ ވިޔަފާރިއަކަށް ހިންގި ސައްހަ މުއާމަލާތެއްގެ ތެރެއިން ޖަމާވި ފައިސާ ކަމަށެވެ. އެ ހުރިހާ ކަމެއް ބެލުމަށް ފަހު އެކަމުގައި މަހުލޫފްގެ އަތެއް ނުވާކަމަށް އޭސީސީން ނިންމުމުން މަހުލޫފް އަނބުރާ މަސައްކަތަށް ނެރެފައިވަނީ އޭގެ ދެ މަސް ފަހުންނެވެ.
