ކުލަގަދަ ރަސްމިއްޔާތަކާއެކު އާރްވީ ސްޕޯޓްސް އެކެޑަމީ އިފުތިތާހުކޮށްފި
9 އޯގަސްޓު 2021 | ހޯމަ 18:08އެކެޑަމީގައި ބައިވެރިވެވޭނީ އުމުރުން 16 އަހަރުން ދަށުގެ ކުދިންނަށް
އާރްވީ ސްޕޯޓްސް އެކެޑަމީ އިފުތިތާހުކުރުމަށް ބޭއްވި ކުޅިވަރު ފެސްޓިވަލުގެ ތެރެއިން
ކުލަގަދަ ރަސްމިއްޔާތަކާއެކު ހއ. ހޯރަފުށީގެ އާރްވީ ސްޕޯޓްސް އެކެޑަމީ އިފުތިތާހުކޮށްފިއެވެ.
އާދީއްތަ ދުވަހުގެ ހަވީރު އޮތް ރަސްމިއްޔާތެއްގައި އާރްވީ ސްޕޯޓްސް އެކެޑަމީ އިފުތިތާހުކޮށްދެއްވީ މޯލްޑިވްސް ސޮކާމޭޓްސް އެކެޑަމީގެ ރައީސް ހަސަން މަނިކެވެ. ހަސަން މަނިކުގެ އިތުރުން މި ހަފުލާގައި ހޯރަފުށީ ކައުންސިލްގެ ރައީސް މުޙައްމަދު ވަހީދުވެސް ބައިވެރިވެވަޑައިގެންނެވިއެވެ.
އެކެޑަމީ އިފުތިތާހުކުރުމަށްފަހު ހޯރަފުށީ ފުޓްބޯޅަ ދަނޑުގައި ކުޅިވަރު ފެސްޓިވަލެއް ކުރިއަށްގެންދިޔައިރު، މި ފެސްޓިވަލް ކުރިއަށްގެންގޮސްފައިވަނީ ހޯރަފުށީގެ ކުލަބު ޖަމުއިއްޔާތަކާ ގުޅިގެންނެވެ. އެގޮތުން މި ފެސްޓިވަލުގައި 22 ސްޕޯޓްސް ކުލަބު، ކުލަބު ޖީއެސް، ހަހެތި، ދުންމަރު ޔުނައިޓެޑުގެ އިތުރުން އެފްސީ ފްރިގޭޓާސް ވަނީ ބައިވެރިވެފައެވެ.
"ރާއްޖެ.އެމްވީ" އަށް މައުލޫމާތު ދެއްވަމުން އާރްވީ ސްޕޯޓްސް އެކެޑަމީގެ ޗެއާމަން ހާމިދް އާދަމް ވިދާޅުވީ އެ އެކެޑަމީގެ މަގުސަދަކީ ހޯރަފުށީގައި ކުޅިވަރުގެ ރޮނގުން ހެޔޮލަފާ އަޚުލާގު ރަނގަޅު ޒުވާން ޖީލެއް ބިނާކުރުން ކަމަށެވެ. އަދި އެ އެކެޑަމީގެ ސަބަބުން ހޯރަފުއްޓަށް އައު ދިރުމެއް އަންނާނެ ކަމަށް އުއްމީދުކުރައްވާ ކަމަށްވެސް ހާމިދު އާދަމް ވިދާޅުވިއެވެ.
ހާމިދު އާދަމް އިތުރަށް ވިދާޅުވީ އެކެޑަމީން މި ވަގުތު ފޯކަސް ކުރަނީ ހޭންޑްބޯޅަ އާއި ފުޓްބޯޅައަށް ކަމަށެވެ. އެކަމަކު މުސްތަގުބަލުގައި އިތުރު ކުޅިވަރުތަކަށް ކުދިން ތަމްރީނުކުރަމުން ގެންދާނެ ކަމަށްވެސް ވިދާޅުވިއެވެ. އަދި މި ވަގުތުވެސް މޯލްޑިވްސް ސޮކާމޭޓްސް އެކެޑަމީއާ ގުޅިގެން ތަމްރީނު ޕްރޮގްރާމްތަކެއް ރޭވިފައިވާ ކަމަށްވެސް ވިދާޅުވިއެވެ.
އާރްވީ ސްޕޯޓްސް އެކެޑަމީން މައުލޫމާތުދޭ ގޮތުން އެ އެކެޑަމީގައި ބައިވެރިވެވޭނީ އުމުރުން 16 އަހަރުން ދަށުގެ ކުދިންނަށެވެ.
