މާޓިނޭޒް ހޯދަން ޓޮޓެންހަމުން މަސައްކަތްކުރަނީ

އިންޓަ މިލާނަށް ކުޅެމުން އަންނަ އާޖެންޓީނާގެ ފޯވާޑް ލަޓާރޯ މާޓިނޭޒް ހޯދަން ޓޮޓެންހަމް ހޮޓްސްޕާއިން މަސައްކަތްކުރަމުން އަންނަ ކަމަށް ރިޕޯޓުތައް ބުނެފިއެވެ.

ޔޫރަޕުގައި ފާހަގަކޮށްލެވޭ ފޯވާޑުންގެ ތެރޭގައި އުމުރުން 23 އަހަރުގެ މާޓިނޭޒް ހިމެނޭއިރު، އޭނާ އިންޓައަށް ބަދަލުވީ 2018 ވަނަ އަހަރުގެ ޖުލައި މަހު، ފަސް އަހަރުގެ އެއްބަސްވުމެއް ދަށުންނެވެ. އެހެންކަމުން މާޓިނޭޒް އިންޓައާއެކު ހަދާފައިވާ އެއްބަސްވުން ހަމަވާނީ 2023 ވަނަ އަހަރުގެ ހޫނު މޫސުމުގައެވެ.

ރިޕޯޓުތައް ބުނާ ގޮތުން ޓޮޓެންހަމުން މިހާރު އަންނަނީ މާޓިނޭޒްގެ ސޮއި ހޯދުމަށް މަސައްކަތްކުރަމުންނެވެ. އެގޮތުން އޭނާ ގަންނަން ޓޮޓެންހަމުން 60 މިލިޔަން ޕައުންޑް ޚަރަދުކުރާނެ ކަމަށްވެސް ރިޕޯޓުތައް ބުނެއެވެ.

އިނގިރޭސި މީޑިއާ ރިޕޯޓުތައް ބުނާ ގޮތުން މަޓިނޭޒްގެ ސޮއި ލިބިއްޖެނަމަ، ޓޮޓެންހަމުން އެ ޓީމަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން މެންޗެސްޓާ ސިޓީއަށް ވިއްކާލާނެއެވެ. ޓޮޓެންހަމް ދޫކޮށްލަން ކޭން ނިންމާފައިވާ ކަމަށް ރިޕޯޓުކޮށްފައިވާއިރު، އޭނާ ހޯދުމަށް ސިޓީން 100 މިލިޔަން ޕައުންޑް ޚަރަދުކުރަން ތައްޔާރަށް އޮތް ކަމަށްވެސް ވަނީ ރިޕޯޓުކޮށްފައެވެ.

ޓޮޓެންހަމުން މާޓިނޭޒްގެ ސޮއި ހޯދުމަށް މަސައްކަތްކުރަމުން އަންނައިރު، އޭނާއަކީ މީގެ ކުރިން ބާސެލޯނާއިން ހޯދަން މަސައްކަތްކުރި ކުޅުންތެރިއެކެވެ. އަދި މިދިޔަ މެއި މަހުގެ ތެރޭގައި މާޓިނޭޒްގެ އޭޖެންޓް ރެއާލް މެޑްރިޑާއި އެތުލެޓިކޯ މެޑްރިޑާއެކު ބައްދަލުވުންތަކެއް ބޭއްވި ކަމަށް ސްޕެއިނުގެ މީޑިއާތަކުން ރިޕޯޓުކުރިއެވެ.

އާޖެންޓީނާގެ ރޭސިން ކުލަބުން 22 މިލިޔަން ޔޫރޯއަށް އިންޓައަށް ބަދަލުވި މާޓިނޭޒް އެ ޓީމުގައި މޮޅު ކުޅުމެއް ދައްކަމުން އަންނައިރު، އޭނާ ވަނީ މިހާތަނަށް އިންޓައަށް ކުޅެދިން 132 މެޗުގައި 49 ލަނޑު ޖަހާފައެވެ. އަދި ވަނީ އިންޓައާއެކު މިދިޔަ ސީޒަނުގެ އިޓާލިއަން ލީގު ކާމިޔާބުކޮށްފައެވެ. މީގެ އިތުރުން އާޖެންޓީނާގެ ގައުމީ ފުޓްބޯޅަ ޓީމަށްވެސް ކުޅެމުން އަންނަ މާޓިނޭޒް ވަނީ އެ ގައުމާއެކު ނިމިދިޔަ ކޮޕާ އެމެރިކާ ފުޓްބޯޅަ މުބާރާތްވެސް ކާމިޔާބުކޮށްފައެވެ.