ކޮވިޑް-19ގެ ހާލަތު ރަނގަޅުވުމާއެކު ފުވައްމުލައް ސިޓީ މޮނިޓަރިންގެ ހާލަތުން ނަގައިފިއެވެ.
ކޮވިޑް-19ގެ ކޭސްތަކާ ގުޅިގެން ފުވައްމުލައް ސިޓީ ފުރަތަމަ މޮނިޓަރިންގެ ހާލަތަށް ގެނެސްފައިވަނީ ފެބްރުއަރީ މަހުގެ 12 ވަނަ ދުވަހުއެވެ. އަދި 9 މާޗުގައި މޮނިޓަރިންއިން ނަގާފައިވާއިރު، ދެވަނަ ފަހަރަށް މޮނިޓަރިންގެ ހާލަތަށް ގެނެސްފައިވަނީ ރޯގާގެ އަލާމާތް ހުރުމުގެ ސަބަބުން މެއި މަހުގެ 5 ވަނަ ދުވަހު ފުލޫ ކުލިނިކަށް ދެއްކި މީހަކު ޕޮޒިޓިވްވުމާ ގުޅިގެންނެވެ.
ފުވައްމުލައް ސިޓީ ކައުންސިލުން ބުނީ މޮނިޓަރިންގެ ހާލަތު އުވާލި ނަމަވެސް ރައްކާތެރިކަމަށް އަޅާފައިވާ ފިޔަވަޅުތަކާ އެއްގޮތަށް ހުރިހާ ރައްޔިތުން ވެސް އަމަލުކުރަން ޖެހޭ ކަމަށެވެ. އެގޮތުން ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ ގައިޑްލައިންތަކާ އެއްގޮތަށް އަމަލުކުރަމުންދޭތޯ ކައުންސިލުން ބަލައި މޮނިޓަރކުރާނެ ކަމަށެވެ. އިޖްތިމާއީ ގައިދުކުރުކަމާއި މާސްކް އެޅުމުގެ އިތުރުން ގިނަ މީހުން އެއްވެ ބާއްވާ އިވެންޓްތައް ނުބޭއްވުމަށް ކައުންސިލުން އިލްތިމާސްކޮށްފައިވެއެވެ.
ފުވައްމުލައް ސިޓީން ކޮވިޑް-19ގެ ކޭސްތައް ފެނުމާ ގުޅިގެން ރައްކާތެރިވުމުގެ ގޮތުން ގިނަ ފިޔަވަޅުތަކެއް އެޅިއެވެ. ފިޔަވަޅުތައް ވަރުގަދަ ކުރި ނަމަވެސް ގިނަ ރައްޔިތުންގެ ފަރާތުން އެއްބާރުލުން ލިބުނު ކަމަށް ކައުންސިލުން ބުނެއެވެ. މީގެ އިތުރުން ވެކްސިނޭޝަން ޕްރޮގްރާމްއަށް ޚާއްސަ ސަމާލުކަމެއް ދީގެން އެ މަސައްކަތް ކުރިއަށްދާކަން ކައުންސިލުން ފާހަގަކޮށްފައިވެއެވެ. އެގޮތުން މިހާތަނަށް 5078 މީހުން ވެކްސިންގެ ދެވަނަ ޑޯޒު ފުރިހަމަ ކޮށްފައިވެއެވެ. އަދި ފުރަތަމަ ޑޯޒު 6024 މީހުން ފުރިހަމަކޮށްފައިވެއެވެ.
މިވަގުތު އެސިޓީގެ ކޮވިޑް-19ގެ ހާލަތަށް ބަލާއިރު، 44 އެކްޓިވް ކޭސް ހިމެނެއެވެ. ބުދަ ދުވަހުގެ ހަވީރު 5:00ން ބުރާސްފަތި ދުވަހު ހަވީރު 5:00ށް 88 ސާމްޕަލެއް ނަގާފައިވެއެވެ. މި ސާމްޕަލްތަކުގެ ތެރެއިން އެކަކު ވެސް ބައްޔަށް ޕޮޒިޓިވްވެފައިނުވެއެވެ. މިހާތަނަށް އެސިޓީން 888 މީހަކު ޕޮޒިޓިވްވެފައިވާއިރު، 844 މީހުން ވަނީ ބަލިން ރަނގަޅުވެފައެވެ.
