ލުކާކޫ ޗެލްސީއަށް ބަދަލުވަނީ؟

ޗެލްސީއަށް ބަދަލުވާން ބޭނުންވާތީ ކުލަބު ދޫކޮށްލަން ބޭނުންވާކަން ބެލްޖިއަމުގެ ފޯވާޑް ރޮމެލޫ ލުކާކޫ އިންޓަ މިލާނަށް އަންގާފައިވާ ކަމަށް ރިޕޯޓުތައް ބުނެފިއެވެ.

މެންޗެސްޓާ ޔުނައިޓެޑް ދޫކޮށް އުމުރުން 28 އަހަރުގެ ލުކާކޫ އިންޓައާ ގުޅުނީ 2019 ވަނަ އަހަރުގެ އޯގަސްޓް މަހުގެ ތެރޭގައި 74 މިލިޔަން ޕައުންޑަށެވެ. އެ ފަހަރު ލުކާކޫ ވަނީ އިންޓަ އާއެކު ފަސް އަހަރުގެ އެއްބަސްވުމެއް ހަދާފައެވެ. އެހެންކަމުން ލުކާކޫ މި ވަގުތު އިންޓަ އާއެކު ހަދާފައިވާ އެއްބަސްވުން ހަމަވާނީ 2024 ވަނަ އަހަރުގެ ތެރޭގައެވެ.

ރިޕޯޓުތައް ބުނާ ގޮތުން ޗެލްސީން މީގެ ކުރިންވެސް ލުކާކޫއަށް ދެ ފަހަރެއްގެ މަތިން ބިޑް ކޮށްފައެވެ. އެކަމަކު އެ ދެ ބިޑުވެސް އިންޓައިން ބަލައިގެންފައެއް ނުވެއެވެ. އެގޮތުން އެންމެ ފަހުން އިންޓައިން ހުށަހެޅީ 85 މިލިޔަން ޕައުންޑުގެ ބިޑެއް ކަމަށްވެސް ރިޕޯޓުތައް ބުނެއެވެ. އިޓަލީގެ ރިޕޯޓުތައް ބުނާ ގޮތުން ޗެލްސީން މިހާރު އަންނަނީ ލުކާކޫ ގަންނަށް ތިންވަނަ ބިޑެއް ހުށަހެޅުމަށް ތައްޔާރުވަމުންނެވެ. އެއާއެކު ޗެލްސީއަށް ބަދަލުވާން ބޭނުންވާތީ ކުލަބު ދޫކޮށްލަން ބޭނުންވާކަން ލުކާކޫ އިންޓައަށް އަންގާފައިވާ ކަމަށް ވަނީ ރިޕޯޓުކޮށްފައެވެ.

ލުކާކޫ ޗެލްސީއަށް ބަދަލުވާނެ ކަމަށް ބެލެވޭއިރު، މީގެ ކުރިން ދިން އިންޓަވިއުއެއްގައި އޭނާ ވަނީ ކުރިއަށް އޮތް ސީޒަނުގައިވެސް ފެންނާނީ އިންޓައިން ކަމަށް ބުނެފައެވެ. އަދި އިންޓަގެ ފަރިތަކުރުންތަކުގައި ލުކާކޫ މިހާރު ބައިވެރިވަމުން އަންނައިރު، އިންޓަގެ ސީއީއޯ ބެޕޭ މަރޯޓާ ވިދާޅުވީ އެ ކުލަބުގެ އައު ކޯޗު ސިމޯން އިންޒާގީގެ ޕްލޭނުގެ ލުކާކޫ އަކީ މުހިންމު ކުޅުންތެރިއެއް ކަމަށާއި، އެހެންކަމުން ލުކާކޫ ވިއްކުމުގެ ވިސްނުމެއް އެ ކުލަބުން ނުގެންގުޅޭ ކަމަށެވެ.

ލުކާކޫ ހޯދަން ޗެލްސީން މަސައްކަތް ކުރަމުން އަންނައިރު، އޭނާ މީގެ ކުރިންވެސް ވަނީ އެ ކުލަބަށް ކުޅެފައެވެ. އެގޮތުން 2011 ވަނަ އަހަރު ލުކާކޫ ޗެލްސީއަށް ބަދަލުވިއިރު، އޭނާ އެ ޓީމަށް ކުޅެދީފައިވަނީ އެންމެ 15 މެޗެވެ. އަދި ޗެލްސީގެ އެއްބަސްވުމުގައި ހުރެ، ލުކާކޫ ވަނީ ދެ ސީޒަނެއްގައި ލޯން އެއްބަސްވުމެއްގެ ދަށުން ވެސްޓް ބްރޮމްވިޗް އަލްބިއަން އާއި އެވަޓަންއަށް ކުޅެފައެވެ.

މިދިޔަ ސީޒަނުގައި އިންޓައިން އިޓާލިއަން ލީގުގެ ޗެމްޕިއަންކަން ހޯދިއިރު، ލީގުގައި ލުކާކޫ ވަނީ ތަފާތު މޮޅު ކުޅުމެއް ދައްކާފައެވެ. އަދި އިންޓަގައި ހޭދަކުރި ދެ ސީޒަނުގައި ލުކާކޫ މޮޅު ކުޅުމެއް ދެއްކިއިރު، އޭނާ ވަނީ އެ ޓީމަށް މިހާތަނަށް ކުޅެދިން 95 މެޗުގައި 64 ލަނޑު ޖަހާފައެވެ.