ކޭސްތައް މަދުކުރުމަށް ޗައިނާއިން ދަތުރުކުރުމުގައި ހަރުކަށި ފިޔަވަޅުތަކެއް އަޅަނީ

ޗައިނާގައި ކޮވިޑްގެ ކޭސްތައް އިތުރުވެގެން ދިއުމާއެކު ކޭސްތަކުގެ އަދަދު ދަށްކުރުމަށް ހާއްސަ އުސޫލުތަކެއް އެކުލަވާލައި، ދަތުރުފަތުރުކުރުމުގައި އިތުރު ހަރުކަށި ފިޔަވަޅުތަކެއް އަޅަން ނިންމައިފިއެވެ.

ޗައިނާއިގައި ހަލުވިކަމާއެކު ޑެލްޓާ ވޭރިއަންޓް ފެތުރެން ފަށާފައިވާ އިރު، އެގައުމުގައި ކޮވިޑް ވައިރަސް ފުރަތަމަ ފެތުރުނު ވޫހާނުން ވެސް ވަނީ ޑެލްޓާ ވޭރިއަންޓް ފެނިފައެވެ. އަދި މިއާއެކު މުޅި ގައުމުގައި ޓެސްޓްކުރުމުގެ ކަންކަން އަވަސްކުރުމަށް ކަމާބެހޭ އިދާރާތަކުން ވަނީ މަސައްކަތް ފަށާފައެވެ.

މި ފަހަކަށް އައިސް ޗައިނާއިން ފެނުނު ކޮވިޑްގެ އެންމެ ގޯސް ހާލަތު އެގައުމުން ފެންނަމުންދާ ކަމަށް ރިޕޯޓް ކުރަމުން އަންނަ އިރު، އެކި ސިޓީތަކުން 300 އެއްހާ ކޭސް ވަނީ ރިޕޯޓްކޮށްފައެވެ. މިއާއެކު ގައުމުގެ ތެރޭގައި ދަތުރުކުރުމުގައި ފިޔަވަޅުތަކެއް އެޅުމަށް ވަނީ ނިންމާފައެވެ. އެގޮތުން އެއް ސިޓީން އަނެއް ސިޓީއަށް  ދަތުރު ކުރުމުގައި ޓެކްސީ ބޭނުން ނުކުރުމަށާއި އޮންލައިންކޮށް ކާރު ހޯދުން ފަދަ ކަންކަން ނުކުރުމަށް ވަނީ އަންގާފައެވެ. ހާއްސަކޮށް ނުރައްކާ ބޮޑު ސަރަހައްދުތަކަށް ދަތުރުކުރުން ވަނީ މަނާކޮށްފައެވެ.

މީގެ އިތުރުން ހާއްސަ ހާލަތެއް ދިމާވެގެން ނުވަތަ އެމަރޖެންސީކަމެއްގައި މެނުވީ ބޯޑަރު ހުރަސްކޮށް އެތެރެ ނުވެވޭނެކަމަށް ޗައިނާގެ އިމިގްރޭޝަނުން ވަނީ ބުނެފައެވެ.

ވޫހާންގައި މަސައްކަތް ކުރާ ބިދޭސީ މަސައްކަތްތެރިންގެ ތެރެއިން އިތުރު 7 ކޭސް ހޯމަ ދުވަހު ވަނީ ފެނިފައެވެ. ބުދަ ދުވަހުގެ ނިޔަލަށް ޖުމްލަ 20 ކޭހެއް ރިޕޯޓްކޮށްފައިވާ ކަމަށާއި، މީގެ ތެރެއިން އަލާމާތްތައް ނުފެންނަ 8 ކޭސް ފެނިފައިވާ ކަމަށެވެ.