ކޮވިޑް-19 ވެކްސިންތަކުގެ ބޫސްޓާ ޑޯޒް ދިނުން މަޑުޖައްސާލުމަށް ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) އިން އެދިއްޖެއެވެ.
ޑަބްލިއުއެޗްއޯއިން ބުނީ ކޮވިޑް ވެކްސިންގެ ބޫސްޓާ ޑޯޒް ދިނުން މަޑުޖައްސާލުމުގެ ބޭނުމަކީ ވެކްސިން ލިބުމުގައި މުއްސަނދި ގައުމުތަކާއި ފަގީރު ގައުމުތަކުގެ މެދުގައި އޮތް ފަރަގު ބޮޑުވެފައިވުމުން ކަމަށެވެ. އަދި ބޫސްޓާ ޑޯޒް ދިނުން ހުއްޓާލުމުގެ ބޭނުމަކީ ކުރިޔަށް އޮތް ސެޕްޓެމްބަރު މަސް ނިމެންވާއިރަށް ދުނިޔޭގެ ކޮންމެ ގައުމެއްގެ އާބާދީގެ 10 އިންސައްތަ މީހުން ވެކްސިން ޖެހުމަށް ޑަބްލިއުއެޗްއޯގެ ޑިރެކްޓަރ ޖެނެރަލް ޓެޑްރޯސް އަދަނޮމް ކަނޑައަޅުއްވާފައިވާ ލަނޑުދަނޑިއަށް ވާސިލުވުމުގެ ބޭނުމުގައި ކަމަށެވެ.
ޑަބްލިއުއެޗްއޯއިން އަމާޒު ހިފާފައިވަނީ ޑިސެމްބަރު މަސް ނިމެންވާއިރަށް ދުނިޔޭގެ އާބާދީގެ 40 އިންސައްތަ މީހުން ވެކްސިން ޖެހުމަށެވެ. އަދި އެ ޖަމުޢިއްޔާއިން އަންނަ މަސް ނިމެންދެން ބޫސްޓާ ޑޯޒް ކުރިޔަށް ނުގެންދިޔުމަށް ވަނީ އެދިފައެވެ. އެކަމަކު ބޫސްޓާ ޑޯޒް ހުއްޓާލާ މުއްދަތުގައި ވެކްސިން ޖަހާ ރޭޓު ދަށް ގައުމުތަކަށް ވެކްސިން ނުލިބޭނަމަ އެ މުއްދަތު އިތުރު ކުރަން ޖެހިދާނެ ކަމަށް ވެސް ޑަބްލިއުއެޗްއޯއިން ބުނެއެވެ.
ޑަބްލިއުއެޗްއޯއިން މިގޮތަށް ނިންމާފައިވަނީ މުއްސަނދި ބައެއް ގައުމުތަކުން އަންނަ ހަފްތާގައި ބޫސްޓާ ޑޯޒު ޖަހަން ތައްޔާރުވެފައިވަނިކޮށެވެ.
