ހިމަންދޫއިން 4 މީހަކު ޕޮޒިޓިވް، ރަށް އޮތީ މޮނިޓަރިންގައި!

ކޮވިޑް-19ށް މީހަކު ޕޮޒިޓިވްވެ އއ. ހިމަންދޫ މޮނިޓަރިންގެ ހާލަތަށް ގެނެސްފިއެވެ.

މައުލޫމާތު ލިބިފައިވާ ގޮތުގައި އެރަށް މޮނިޓަރިންގެ ހާލަތަށް ގެނެސްފައިވަނީ މާލެއިން އެ ރަށަށް ދިޔަ މީހަކު ކޮވިޑް-19ށް ޕޮޒިޓިވްވުމާ ގުޅިގެންނެވެ. އެރަށުގެ ސިއްހީ މަރުކަޒުން، ބަލި ފެތުރިފައިވާ މިންވަރު ދެނެގަތުމުގެ މަސައްކަތްތައް ކުރަމުންދާއިރު، 03 އޮގަސްޓް ވީ އަންގާރަ ދުވަހުގެ ރޭގަނޑު 11:00ށް 28 މީހެއްގެ ސާމްޕަލް ނަގާފައިވެއެވެ. އަދި 4 މީހަކު ބައްޔަށް ޕޮޒިޓިވްވެފައިވާ ކަމަށާއި، 16 ސާމްޕަލެއްގެ ނަތީޖާ ނުލިބޭ ކަމަށް އެ މަރުކަޒުން ބުނެއެވެ.

ސާމްޕަލިންގެ މަސައްކަތަށް ޚާއްސަ ސަމާލުކަމެއް ދޭ ކަމަށާއި، ބަލީގެ އަލާމާތެއް ފެންނަ ނަމަ ފްލޫ ކުލިނިކް ނަންބަރު 7983945 ގުޅައި ސާމްޕަލް ނެގުމަށް ސިއްހީ މަރުޒަކުން އެދިފައިވެއެވެ.

އެގޮތުން ހުމާއި ކެއްސުމާއި ރޯގާ ޖެހުމުން މަރުކަޒަށް ނައިސް ގުޅައިގެން ޑޮކްޓަރަށް ދެއްކުމަށާއި، ރޯގާ ޖެހުމުން އާއްމު އެއްވެއުޅޭ ތަންތަނަށް ނުގޮސް ގޭގައި މަޑުކުރުމަށާއި، ކެއްސާ ކިނބިހިއަޅާއިރު ޓިޝޫ/ރުމާކޮޅަކުން އަނގަޔާއި ނޭފަތް ނިވާކުރުމަށާއި، ސައިބޯނި ލައިގެން ގިނަގިނައިން އަތް ދޮވުމާއި އަދި އިޖްތިމާއީ ގައިދުރުކަން ހިފެހެއްޓުމުގެ އިތުރުން މާސްކު އެޅުމަށް އިލްތިމާސްކޮށްފައިވެއެވެ.

މީގެ އިތުރުން ސިއްހީ މަރުކަޒުން ބުނީ މިހާރަކަށް އައިސް އަރިދަސްފުސް ރޯގާ ވެސް އެރަށުގައި ފެތުރެމުންދާ ކަމަށެވެ. އަދި ބަލި ކޮންޓްރޯލް ކުރުމަށް އަޅާފައިވާ ފިޔަވަޅުތަކާ އެއްގޮތަށް ހުރިހާ ރައްޔިތުން އަމަލުކުރުމަށް ވެސް ވަނީ އިލްތިމާސްކޮށްފައެވެ.

ހިމަންދޫ މޮނިޓަރިންގެ ހާލަތަށް ގެނައުމާ ގުޅިގެން އެރަށަށް އަރާ ފޭބުން މަނާވާނެއެވެ.